مساء الورود والعود على الجميع
اخواني واخواتي , هذه اول قصيده لي بعد ما غيرت اسمي
وبما ان اسمي الجديد عذبة النوح اروجو ان تجدون العذوبه فيما اطرح
وودعو معي اليوم اسمي السابق ((( الورقا ))) - مكتوب علي اودع ما احب
والان اترككم مع جديدي ,,,,,,,,,,,
,
,
[poem=font="Simplified Arabic,6,firebrick,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
قالو تحبين ؟ قلت الحب وش لي به=مالي وماله , شغلني عنه غربالي
حملي ثقيلٍ ومن ثقله اهذريبه=لو زدت للطين بله يثبت هبالي
الحب بلوى على العشاق ومصيبه=كم من صحيحٍ شكا بعده سقم حالي
وكم من حكيمٍ يجيب الراي ويصيبه=امسا يغني خلاوي لال يالالي
وكم واحدٍ كل هرج الناس في طيبه=يوم ابتلا فيه قالو : كان رجالي !!!
والمشكله لا غرز نابيه بالشيبه=وابدل وقاره بطيش عيال جهالي
اقوى النشاما شكا من صبوة قليبه=واصبح اسيرٍ بقبضة لابس الشالي
والترفه الي لها بعلوها هيبه=صارت فرس طايعه والقلب خيالي
وش لي وترهيب الهوي بعد ترغيبه=همه يبي له فـؤادٍ خالـي وسالـي
يعيش بين الوجل والشك والريبه=ولو حصل له مراده سج بالتالي :
اما فراقٍ يشب القلب ويذيبه=او عين حاسد تصيب , او هرج عذالي
يعني كذا او كذا , كدره مشاريبه=متى - على الله - يريح القلب والبالي !!
ترى الهوى لذته باسباب تعذيبه=واذا تسهل - بهت - كنه خلق بالي
كله صياغة خيال , وبعض الاعيبه=وما قد تحقق خيال , بكل الاحوالي
وانا بليا الهوى وبدون تجريبه=اشرب من الهم صافي واشرب حثالي
مالي وللحب ومعقد اساليبه=القلب مليان ما به منزلٍ خالي
والدمع وينه وكيف العين تصخي به=ما باقيٍ به - من الليعات - مثقالي
معقول انا احب !! ليه ؟ الحب وش لي به !=مالي وماله يكفيني شقا حالي[/poem]
,
,
وسلامتكم
عذبة النوح