من لا نشدني مـا عطيتـه علومـي
لو جيت من بعض المطاريش بعلوم
اسكت ومن بعض الكلام مخدومـي
زود الكلام وناقصـه فيـه مخـدوم
واجلس على رغبة هوايـة وقومـي
اسمع وخلي عايـل الهـرج وقـوم
أرفى لسانـي والضميـر مختومـي
يبقى على ما فيـه مغلـق ومختـوم
والصمت حكمـة للبيـب الفهومـي
وكثر اللغـى يثـر مناقيـد وثلـوم
والصمت ستـرٍ للخطـى والثلومـي
خصلة وقار ويودع الرجل محشـوم
وعلمٍ ما هو مطلوب ما هو لزومـي
خله ويبقى داخـل الجـوف مكتـوم
يمكـن تقولـه والقبـول معدومـي
ويصير علمٍ ناقص الـذوق معـدوم
وإن نشـدوك الطيبيـن القـرومـي
هات العلوم الطيبـة واسمـع القـوم
خلك لجـزلات المعانـي عزومـي
واعرف ترى بالهرج طيب ومذموم
وهايبٍ من عنـد منشـي الغيومـي
الطيب وهبة والردى حـظ مقسـوم
والحر عن هزل المعانـي يشومـي
الطيب نوه والـردى عنـه مفطـوم
وإن شفت لقاف السوالـف يزومـي
هرجه كثير وفيه ذوقٍ مـن الثـوم
اعرض وخله فـي سبيلـه يعومـي
خله عسـاه بضيعتـه دايـم الـدوم
واصبر ليا لمـت عليـك الهمومـي
ساعة بدل ساعة ويوم عوض يـوم
واطلب من الرب الكريم الرحومـي
اللي من الظالم نصر كـل مظلـوم
وان شفت من بعض الرفاقة وهومي
لا تنطح الخـلات بالسـب واللـوم
اترك وسامح والردى مـا يدومـي
والطيب يبقا لك مع الحـي مرسـوم
إلا ليـا نـاش الكـلام الخشومـي
الصبر ما هو زين والخشم ملطـوم
صبرٍ على العوجا دليـل الرخومـي
والـذل مـا هـو للمناعيـر للبـوم
والحق لا تخفيـه تحـت الكمومـي
عده ترى من يكتم الحـق محـروم
واترك سبيـل مضيعيـن السلومـي
نقالة الهرجة علـى غيـر ملـزوم
اللي على الغافـل تشـن الهجومـي
بياعة الذمـة رخيصـة بـلا سـوم
دحامة المجلـس كبـار الجرومـي
جرمٍ كبيـر ولبـة العقـل مفـروم
هدايـد(ن) لمعورجـات الرقومـي
ضبـع الرجـال وللغناديـر داهـوم
تمت وربي له صلاتـي وصومـي
على الرسول اللي عن العيب معصوم