الشاعر مجتمع كامل بكل اطيافه واختلافاته
يحكي بكل لسان ويعبر عن كل شعور ويصف كل احساس
ليس بالضروره ان يكون قد احس الالم ليعبر عنه , او عاش الفكره ليكتبها
المهم ان يصل ما يريد ان يوصله لكل قلب وعقل , والا !!!!
[poem=font="Simplified Arabic,6,sienna,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
انا منهو ومن ياللي بداخل هالجسد موجود=انا لمعة نجم والا شهابٍ ناض بهبوطه ؟
انا شيخ انتهى عمره ويرقب ساعته بركود=او صغيّر , همومه بين ميكيّه وبطوطه ؟
انا رجلٍ ورث جوده , وزاده بالمراجل جود=او بنيّه ضفايرها بورد العز ممشوطه ؟
انا مسافر بلا وِجهه , بكونٍ ما حصره حدود=او مْقيم ومريح وكل شف موافق شروطه ؟
انا في عتمة الدنيا طريقٍ موحش ومسدود=او ارضٍ مْنوِره خضرا ومد الشوف مبسوطه ؟
انا حرفٍ بلا معنى ولا بالأبجدي معدود=اوحروفٍ اساسيه لها شكلٍ ومنقوطه ؟
انا دمعٍ حرق اجفان , وذوب باللهيب خدود=اوبدنيا الفرح دوّيت بين الناس زغروطه ؟
انا غصن اجْرد بصحرا جداب وحاد عنها الذود=او زهور وْروايحها بنشو السيل مخلوطه ؟
انا خيبة امل حلّت على اللي بالرجا موعود=اوبشارة نجاح احيت مجدٍ محري سقوطه ؟
انا عقلٍ بليا قلب , او اني قلب دون قيود=وحساس او بتكويني رموز الحس مغلوطه ؟
انا كذّابٍ او صادق , انا حاسد او المحسود=انا مْداوي لهيب السوط او اللي يحرق بسوطه ؟
انا المقبل او المقفي او اللي مكتنفه برود=فلا بايع ولا شاري , رجاه بْعيد وقنوطه ؟
انا أي الوجيه اللي ذكرت البيض والا السود=رسومه عابسه , والا نداويه ومبسوطه ؟
من يْجاوب ويعطيني جوابٍ واضح ومحدود=بكلمه , بس ما ابغاها باداة الشرط مشروطه !
ولكن من يجاوبني ويفهم قصدي المنشود=وليه اسأل وموضوعي انا اللي كاتب خطوطه !
انا هذا , وانا هذاك , وغير اللي ذكرته زود=ولا يكفي لذكر الزود دفاتر والف مخطوطه
انا الرجال والانثى , انا الطفل البري والعود=انا صورة جميع الناس وبالاحساس مضبوطه
انا الطيب وانا الشرير , انا التابع وانا اللي يقود=وانا المسرح وكل دْماه , وانا اللي يلعب خيوطه
انا شاعر وباوراقي وحبري والقلم مولود=ولي دنيا حواشيها بفن القاف مخيوطه
انا شاعر ولا أحتاج على نظم القصيد شهود=انا شاعر ولكن , زد عليها تاء مربوطه !![/poem]وسلامتكم ,,,,,,,,