بعد غياب طويل عن صفحات الشعر ..
إليكم مع التحية /
[poem=font="Simplified Arabic,5,darkblue,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
يحق لك لا صرت بالحيل دلوع=تامر وأجي يمّك وأمشّي كلامك
إلا الكرامة عندها حط ( ممنوع ) =والله ما يمشي عليها نظامك
في الذل أنا ما أجي على السمع والطوع=ريّح شياطينك ووفّر ملامك
بلاش من حبٍ يجي منّه خضوع=فراق ,, وألا أنه يقل احترامك
ودّك تغيب أسبوع ؟! من عندي أسبوع=ومانيب ناشد يا حبيبي علامك
راجع حكاية حبنا بصوت مسموع=وقلّي متى بالله حزت اهتمامك ؟!
كان الطموح أول يجي الحب مجموع=وصار الطموح اليوم ترمي سلامك
كنت انتظر توقد علشاني شموع =ما كان في بالي أضيع بظلامك
أنا انتظرتك غيث والحب ينبوع=وحبيت .. لكن ما سقاني غمامك
سقت الغلا يمّك على الكم والنوع=وما جت مراسيل الغلا مع حمامك
صحيح أنا حبيت والحب مشروع=لكنّ ما ظنيت تخطي سهامك
اظما على شوفتك لحظات وأجوع=وتسقي عيوني من مرارة خصامك
اسمك على ضلوعي من العام مطبوع=وللحين مدري من توّده عظامك ؟!
وفي داخلك إن كان مانيب مزروع=وش عاد أبي في شئ اسمه غرامك
عليك أنا مانيب مجبر ومدفوع=بربط حزامي وأنت جوّد حزامك
بترك طريقك دامه دموع × دموع=يعني فمان الله واجمع حطامك
المستحيل اللي مع حبّة الكوع=أهون علي لو قلت برفع مقامك !!
ما هو علشانك رقيّق ودلوع=تهين قلبي لاجل يمشي كلامك[/poem]