ملاحظه: سالفة ولد عمي حقيقيه قسم بالله
*****************
المكان: الرياض
الزمان: 3/1/2007
((مقطع فيديو لـ برج الفيصليه من فوق لتحت))====عبد الخالق وشلونك؟
الحدث:
نبض قومي الله ياخذك...بيت عمّك جايين عالغدا قووومي
نبض: يووووووه يمه..خليني انام حرام عليك...ماصار لي 300 ساعه من نمت((ياويلي البنت مرهقه مسكينه خلوها تنام ))
امي: بتقومين والا شلون؟؟
نبض: لا منيب قايمه بشوف وش بتسوين((بجيحه ))..... فكّيني واللي يرحم والديتس..ابي انام ابي انام..تعرفين يعني وشو ابي انام؟؟ يعني يمكن اقوم الحين واتبّرا منك عادي...اهم شئ انام..وخري وخري...لاتخليني اسويها((لا نبض تكفين ارحميها عشاني ))
فجأه اسمع صوت مويه جايّه بأتجاهي...واقوم احط يدي تحت السرير واطلّع الشمسيه حقّتي...حاطتها للاحتياط..على بالهم غشيمه انا...
فتحتها وحطيتها على وجهي وحسّيت بشي بارد على رجولي...قمت اطالع وش صاير لقيت امي ماسكه بطنها ومنزّله راسها وميته ضحك..تسنها من الرسوم المتحركه
قمت من فراشي وانا معصبه ورميت البطانيه بقوّه ومسكتها من رقبتها وقلت لها شوووفي...حركات نص كم ماابي...حركات بزارين ماابي..حركات الخدع برضو ماابي...تجين تكّبين على وجهي مويه اهلا وسهلا..لكن مسويه فيها اصغر عيالك وتقصّين علي وتكبّين على رجولي..لا.....مااتفقنا على كذا اوكي ماما؟؟(((طبعا وانا اكلمّها ملصّقتها على الجدار وكل شوي اعطيها كف)) ((الحين منهو الام ابفهم؟؟))
ماشفتها الا ماسكتي من شوشتي وحسّيت بشئ كبير ومربّع ولونه رصاصي كل شوي ويجي على وجهي..والغريبه ملمسه خشن وفيه شوية شعر ووصخ وجراثيم وبكتيريا وحاجات زي كذا..اثاريها قاعده ترفسني برجلها وتقول: ياشين اللي بيسوي نفسه قوي قدام الاعضاء...قومي الله لايبارك فيك
واقوم من مكاني وانفض ملابسي من الطفيليات اللي طاحت من رجولها واقول لها..الوعد بعد القصه..الحين اخاف اطوّلها شوي ومابعد دخلنا في صلب الموضوع..خليني اخلص من الاعضاء وبعدين ارجع لك
قمت وكالعاده رحت قدّام المرايه واشيل الغمص واحطه في قوطي صغير..عشان اذا كنت جالسه عالنت في الليل وحسّيت ان فيه احد جاي اقوم آخذ شوي واحطه في عيوني واسوي نفسي نايمه...بالله مانيب فطينه؟؟
ماعلينا..لبست لي ذاك الشورت الابيض وبلوزه لونها اخضر ومع الكشّه صايره كنّي لاعب كوره ايام السبعينات
نزلت وسلّمت على بيت عمي وقعدت على جنب حالي حال اي مزهريه ((قصدك حالك حال اي حوض سمك انتي مع هالشكل اللي عليك)) ...جاني ولد عمي الصغير((ابو 3 سنين)) ويطالع فيني وهو ميت ضحك..في البدايه ماعطيته أي اهتمام..واعتبرته هو والزباله واحد((الله اعلم منهو الزباله)) ...لكن لما شفته زودها قمت سحبت اللعبه اللي في يده وحطيت يدي على خصري وقمت اهز واقول له..كيفي...هذي لعبتنا..
طالع فيني شوي وبدت عيونه تلمع ونزل برطمه 3 انش تحت وقال: ياطمااااااطه
بيني وبينكم انا شكّيت في اذوني..وقلت الظاهر ماسمعت عدل..رجّعت له اللعبه وسحبتها من جديد عشان اتأكد من اللي قاله..و فجأه دمعت عينه وقال :ياخبزه محروقه
خبزه محروقه؟؟ انا هنا انصدمت..ومو مستوعبه هالبزر ذا وش قاعد يقول...كمان رحت ورجّعت اللعبه وسحبتها مره ثانيه وسمعته يقول لي: يادفتر
..وش فيه ذا؟؟ رحت وحطّيت يدي على جبهته ابقيس درجة الحراره..لا..الولد صاحي..اجل وش قاعد يقول؟...فجأه راح يركض عند امه ويأشر علي من بعيد وهو يبكي ويقول..ماما..شوفي التفّاحه خذت مني اللعبه..مااحبها..ياطاوله..يا فراشه...
قمت وانا غشيانه ضحك ورحت عند غرفة اخواني اصحّيهم واقول لهم قوموا قوموا..عندنا مشررروع خكري ..لايفوتكم قسم بالله ..قوموا وانتهزوا الفرصه..واللي معه جوال كاميرا يجيبه..نسوي مقاطع ونروح اي مقهى وننشرها قوموا ==تفكير سعودي بحت
...ولكن لاحياة لمن تنادي...جتني فكره ونزلت جبت ولد عمي وسحبته معي وحطّيته على راس اختي الكبيره وهي نايمه..انقلبت على بطنها وخذت ولد عمي وصكّته بالارض ...قام ويصيح وهو خايف مسكين ويقول يا ورقه محروقه..فزّت اختي من نومها وقالت شنو؟؟
مت من الضحك وقلت لها وش رايتس بالله؟؟ قالت : وش جايبة انتي؟؟ وش ذاا؟؟ قلت لها: مالتس شغل..خوذي هاللعبه وعطيه اياها بعدين اسحبيها بقوه وشوفي وش يقول لتس...
قعدنا انا واخواني نلعب في حسبة ولد عمي ليييييييين جو يطلعون ...وهم طالعين مسكت زوجة عمي وقلت لها...اما ولدك ذا فله.. الله يسعده ياشيخه ...موّتنا ضحك...كل ماسوينا له شئ قام يسّبنا بخضروات والا بدفاتر
قالت لي: وليه تضحكين؟؟ انا مربّيته على كذا ..هذا هو اسلوب التربيه الحديث..لازم نعلّم اطفالنا من صغرهم على السلام والحب والتعطاف ..((منّك لله يا يافوزيه الدريع ))...
قلت لها بالله الحين هذا تسمينه جيل جديد؟؟ بكره يجيك وهو لابس تنوّره وحاط بكله في شعره وكل مااحد طقّه يقول له ياورقه والا يادفتر.وتقولين جيل جديد؟؟..لعنبوتس انتي يوم انك حاملتن به متوحمتن على مكتبة جرير؟؟...ياشيخه طيري بس..ياعزتي على جيلنا أي والله...البزر اول مايطلع من بطن امه تلقينه ماسك عجرا بيده وحاط المهاد على كتفه وعقال ابوه على راسه ومتوّجه لغرفة الدكتوره ويقول لها ان شفتتس مرتن ثانيه ماسكتني من رجولي ومنكّستني عالارض قسم لاافقع راستتس لابوتس لابو اللي جابتس..هذاك اليا قامت امّه تروّشه يصكّها كف ويقول لها استحي على وجهتس تراني كبر جدّتس..هذاك اليا جا احد وخذ منه لعبته قام ورفع بنطلونه وطلّع الربع وطخّه براسه...هذاك اليا تهاوشتي معه قام وعدّد لك اسماء الحيوانات كلها ..آه ياسفابي بس..راحوا الرجال
مسكتها من يدها وقلت لها..اطلعي بس اطلعي الله يصلحتس..وخلي اسلوب الحب والسلام وهالخرابيط ينفعتس...
طالعتني بنظرة احتقار ومسكت ولدها وقالت.ا.لشرهه علينا جايين نزوركم..صكّيت الباب في وجههم وقلت: مع السلامه يا كتب مشقّقه
رحت عند المرايه اللي بالصاله ومسكت شعري وقاعده اقرا عليه المعوذات يمكن يهجّد شوي ..فجأه سمعت صوت صراخ جاي من الصاله اللي فوق...رحت وانا اركض ابشوف وش السالفه...لقيت اخوي الصغير ابو 5 سنوات يلحق امي وبيده اليمين كبريت واليسار سرندل غاز ويقول لها..وين شريط كراش حقّي
انتهى
والآن..اليكم نقاط النقاش
1:..وش رايكم بهالقضيه؟؟هل انتم مع..او ضد..التربيه الحديثه...وكيف تنظرون لها؟؟وهل لها حدود والا شالسالفه؟؟==منيب عارفه اكوّن سؤال
2:من افضل عندكم؟؟ بزارين هاليومين اللي كل واحد ماسك له جوال وماينام الا عقب صلاة الفجر واسلوبه اسلوب بنت ...والا بزارين ايام زمان اللي ماشافوا الجوال الا بعد الثانويه وماتجي السعه 8 الا وهو نايم واسلوبه في التعامل اسلوب رجاجيل يالبى كله والله
بأنتظاركم
وبس
طحياطي ياحياطي
نبووضه