مشكور اخوي مشغل
================================
دخلت لي سوقٍ ابـي اشتـري عقـال
وشماعٍ احمـر لـه معـزة ومرمـوق
سوقٍ جمع امـة محمـد علـى هبـال
مـن كثرهـم ماكـن بـراه مخلـوق
قمـت اتلفـت كنـي السـارق الـذال
والقلب يركض مثل جربـوع ملحـوق
حاكيت نفسي هـم بنـي عـمٍ وخـال
او اني داخل عرس واحسبني في سوق
انحش يامشعل شكـل ذا بيـت رجـال
خابرني بعض الوقت عجـلٍ ومطفـوق
قلـت إلا بقعـد والله يدبـر الـحـال
اما غنات الذيـب او رحـت مطقـوق
من عذري كن الناس في عيـد شـوال
اللي مشخـص واللـي بزينـه يمـوق
سألت لي واحد بغـا يمـد لـي ريـال
وشكيت انا اني لابسٍ ثـوب مشقـوق
قال أنت صـادق بالله ذي كلمـه تقـال
هذا التطـور انـت ماتعـرف الـذوق
قلت ايييييه هذا هو التطور ذا الأشكـال
اسف ياخوي ورحت انا لطابـقٍ فـوق
وياليتنـي مارحـت غـزلان تجـتـال
قطعان تمشـي زينهـن مابـه فـروق
وقمت اتفكـر الضبـى مالهـا جفـال
بين الذيابـه تمشـي بغنـج ورفـوق
الوحده كـن حجاجهـا رسمـت هـلال
من الكحل والرمش غصنٍ بـه عـذوق
واللي شعرهـا يرتهـش مثـل شـلال
والخد بالحمـرة تقـل كـف مصفـوق
ومن الكعب قصارهـم صـاروا طـوال
الا مشت من علـوه الـراس مفهـوق
وحسبي على هاك العبايه كمـا ظـلال
تحسبها تجليده البستها مـن الضـوق
تقسـم الأجسـاد لـو كانـت نـحـال
ياجعـل صانعهـا وبايعهـا للـعـوق
ويوم اقبلت هاك المزن برقهـا اشعـال
قلت ابعد ابعد المطـر يسبقـه بـروق
قمت اتحـرا وقلبـي للشـوق مدهـال
سحاب عجـل خافـق لمـاك مشفـوق
واثره من المكيـاج محطـوط بخبـال
تفضحها ذرعانٍ تلـوت بهـا عـروق
قامـت تغـلا تفتكـر خافقـي مــال
تغنـج بعلـك وتـزوي لهـا شـدوق
قالت وش تطالـع وقلـت المثـل قـال
السمكـرة ماتخفـي للخـردة طقـوق
افحمتهـا ومكياجهـا وكحلهـا سـال
ذاب الصبغ صارت كما قـدر محـروق
واقفت عساهـا ماتجـي لشاعـرٍ فـال
يقطعك وجهٍ يجعـل الـرزق ممحـوق
وشفت اللي يتميلح يـرزز لـه جـوال
رقمـي مميـز كـل بنـتٍ لـه اتـوق
ولبسه من الوانه تقـل دفتـر اطفـال
ونظـارة مـن كبرهـا كنهـا طــوق
وهذا ايتمسمس مشيته مشيت ابطـال
وش غنتره والزيـر للبنـت معشـوق
وقصـات شعـرٍ كنهـا قفـول وحبـال
ديك واسـد هـذا نمـر ذاك غرنـوق
ونظراتهـم نظـرت نضـولٍ ومحتـال
كـلٍ عيونـه طايـره تقـول مخنـوق
وهذا وضـع سكسوكـةٍ مثـل فنجـال
تمـس وجهـه والزقـم كنـه البـوق
وفزعت انا لواحد عصب راسه بشـال
وش بك عسى ماشر وش فيك مفلـوق
قال انقلـع وش عرفـك لبسـت بـدال
ملقوف وش لي بورع مايعرف حقـوق
وسمعت انا بلوتـوث وخزنـت بالبـال
بكرا اتفلسف عند ربعـي هـل النـوق
وسئلت انا بلوتوث وش تعني ياعيـال
غشونـي الله يغشـهـم اكـلـة ذوق
اطلبها بالكتشب تـرى مالهـا امثـال
واطلب موبايل تنسى قرصان ومرقـوق
مانيب جايع بـس مـن شفـت البـال
ركض للمطعم عسـى مانـي مسبـوق
بلوتوث تكفا مع موبايل علـى الحـال
تكفا ابي الكتشب على الخبـزه طبـوق
قام ايتحمـد قلـت وش فيـك مهتـال
قال انت صاحي ولا في عقلـك فتـوق
عشا اكترونـي محنـا يابـان ياخـال
احنا عرب ناكـل ونشـري ولا نفـوق
قلت اصحا منك وماني من عصر جهال
ياخوك انا امزح جيت ابي بيض مسلوق
وضحـك ترنبيـلٍ تقـل بـاص شغـال
هذا المربط كيف اجـل خبـل مطلـوق
قال البلوتوث بينهـم خـوش مرسـال
خطابه نشميـه تجـي بعلـم موثـوق
قلـت الا فلونـزا وفيـروس الأجيـال
يعديك من عطسه بلا سلـك وطـروق
قلـت العـذر يـانـاس مانـيـب دلال
اللي يحرج لـه علـى شـي مسـروق
مع السلامة اشتقت انـا لفوحـت دلال
حول السمر والرمث في حزت شـروق
ونفحات هيـل تعطـر انفـاس فنجـال
ونجرٍ لحونـه تجعـل البـن مدقـوق
راعي قهوة
رد مع اقتباس
