0
0
تخوفني مشاوير الطريـق المظلـم المهجـور
.........والي مني ذكرتك قلـت طولـي يامشاويـري
عزاي انك رجاي العذب لو كل الدروب عثور
...........وصلت او ماوصلت اعرفك مانته منتظر غيري
حبيب وكل الله .. لاتحسب اني بليـد شعـور
..........لو انت المستحيل الصعب مابدي لك معاذيـري
احبك رغم تجريح الليـال .. لقلبـي المقهـور
...........اشوف الجرح يكبر .. وانت تكبر وسط تفكيري
احبك لو يموت الحب .. وتصير القلوب قبـور
..........احبك كلمـة .. لـو حرموهـا حـل تفكيـري
احبك من هنا حتى طلوع الفجـر حـد النـور
..............صحيح انك قدر محتوم بس اجمـل مقاديـري
بعذر اللي يحبك لو يصير الشاعـر المشهـور
..........لانك تنهمـر حلـو القصيـدة فـي تعابيـري
احد ربي يحطك له حبيب .. وما يجيه غـرور
..........وانا مهما بغيـت استوعبـك ياقـل تقديـري
هلا بك من قدمك لغرتك .. لشعـرك المنثـور
...........هلا في كل شئ فيك وانـت اغلـى مساييـري
اثر صدق الغلا يجبر حطام الخاطر المكسـور
..........وانا مهما منحتك من غلاي .. اشعر بتقصيري
ولو طالت مشاوير الطريق المظلـم المهجـور
.............انا لامن ذكرتك قلـت .. احبـك يامشاويـري
مساعد الرشيدي