[poem=font="Simplified Arabic,5,white,bold,normal" bkcolor="transparent" bkimage="backgrounds/26.gif" border="none,4,gray" type=0 line=0 align=center use=ex num="0,black"]
أقولها لك بالفم المليان = ماني ولد نعمة ولاتاجر
وسويسرا مالي بها ميلان = مستور حال ومكسبي طاهر
لازرت لالندن ولا اليونان = ولاملكت المنزل العامر
حدّي إذا خرّبتها عمّان = وإنْ ماتهيّت لي أنا صابر
سيارتي ماطورها خرفان = مرّة تنام ومرّة إتطامر
من قدمها صارت بدون ألوان = وأحيان تمشي بي بلا تاير
تخر زيت وتقذف الدخان = كما عجوزٍ حظها عاثر
لاهي ألمانية ولا نيسان = من ربع بوش السافل الكافر
لكنّها ياصخيّف الذرعان = عندي غلاها بالحشا غاير
فيها سحر ملعونة الحرثان = لو مابقى فيها ولاواير
تسوى الهمرهو والشبح والفان = والفكس آر بجنبها باير
تدري مدام إنك فضيت الآن = وْلابيننا حاجز ولاساتر
اسمع كلام الجد يافتّان = أرجوك تسمعني على الطاير
أنا أنا وألعِنْك ياالشيطان = أعْجِبْك لاصار الزمن جاير
ليّه هدف لو خانني النيشان = لليل حد وللفجر ناطر
لي فلسفة لوعشت بالخليان = كل التراب بنظرتي طاهر
كوميديا عمري بها أحزان = أحزان لكنْ ضِحْكَها آسر !!
واضح أنا حد الغموض احيان = بريء لكنّي أنا الجاير
غريب واملك وش كثر اوطان = حرّيّتي حرّيّة الطاير
فيني من الصحرا فضا الوديان = وفيني من الضيقة رجا عاقر
ماني بحاجة بس أنا الحرمان = ولاني كسير ولاني القادر
أغلب حوايجنا دلع ورعان = رغباتنا أول بلا آخر !!
عاجز ولكنْ صِحّتي حْصان = شيٍّ يعوّض شي ياشاطر !
ألبس مثل مايلبس البردان = نظيف لكنّه مهو فاخر
وآكل من اللي يقسم الرحمن = وإنْ شح يومي أنتظر باكر
أنام نوم القانع الرضيان = واصحي مريحٍ عابدٍ ذاكر
كم من غنيٍّ مقرشٍ مليان = نومه على كوعه تقل كافر
مافاده اللولو ولاالمرجان = ولا وقاه فراشه الواثر
أعماه جمع الدرهم الرنّان = خلاّه من بد البشر ساهر
لو هو ملك وادي من الذهبان = ماينفعه مادام هو ناكر
لو هو شكر زاده عظيم الشان = ماخاب ظن العابد الشاكر
المال زينة وايضاً الصبيان = يابخت من ماله غدا وافر
الجيب لامنّه غدا عمران = وعزوة ولد يفرح لها الخاطر
نعمة كريمٍ خالقٍ منّان = ماغيره اللي للبشر ناصر
لاصار تدبيرك لها باحسان = أبشر بخيرٍ وافرٍ زاخر
وإن كان فيها غرّك الزّنّان = تلقى نتيجة فعلك الغابر
أرجع وأقول وكلمتي برهان = إني على ماشفتني ظاهر
إنسان واضح يرفض الكتمان = ماأقول تم إلاّ وانا حاضر
فيني مثل كل البشر نقصان = لاني ملاك وْلاأنا ساحر
أعيش بالواقع فرح وأحزان = لاصرت قادر قلت أنا قادر
للحلم حد وللخيال أثمان = والكذب حبله دايمٍ قاصر
ترى العطا مرة يجي حرمان = مثل الألم في معظمه طاهر !!
لو غابت الدمعة عن الاجفان = صار الفرح في أغلبه فاتر !!
ولو ماتضم ضلوعنا أشجان = ماطل صبح وْ ولاطلع باكر
أنا خليط الثلج والنيران = مؤمن مثل ماني بعد كافر !!
آمنت في ماجابه القرآن = وكفرت بالكاهن وبالساحر
صحيح أحب الورد والأغصان= وصحيح فيني رقة الشاعر
وصحيح يغريني شجى الألحان = فيني شبه من كاظم الساهر
نعم اجامل وأستحي أحيان = واكتم وامرّر غلطة الشاطر
أجي على روحي لو الميزان = يميل حيل بحكمه الغادر
وياكثر ماعالجت بالنسيان = زلة صديقٍ طبعه إمكابر
وياكثر ماكذّبتها الأعيان = تشوف لكنّي لها ناكر
ماني غشيم إلاّ وسيع إبطان = عزيز لو ضعفي هو الظاهر
ياسائلٍ عنّي أنا ( حمدان ) = ربعي ( هل العوجا) سلى الخاطر
لا قلت أنا من زمرة (الويلان ) = ينزاح هم وينشرح خاطر
عزوة فخر سلايل كحيلان = خيّالهم مايقهره قاهر
للضيف هم ألطف من الإخوان = وللي يعيل سلاحهم كاسر
قصيرهم مايلحقه حقران = ألين حظّه بينهم وافر
فيهم فقير وطايش وفلتان = ولابد فيهم تاجرٍ خاسر
وبرجالهم تلقى سليط إلسان = وفيهم سفيه وفيهم إمغامر
لكن ولاواحد بهم خوّان = يطعنك وأنت الساهي الفاغر
أوتِيِّهُم دايم مع البيبان = وضح النّقا طبعٍ لهم زاهر
لاحاربوا يجون لك فرسان = نطح النطوح وْلابهم ناير
نزّة ركايبهم لها دخّان = خيولهم معروفة الحافر
وإن عاهدوا ماخانوا الأيمان = ماعاش فيهم غادرٍ ماكر
لو قلت ربعي باللقا شجعان = ماجبت غير الواضح السافر
وإن قلت ربعي للكرم عنوان = تاريخهم هو شاهدٍ ذاكر
وإن قلت ربعي للتقا الجمعان = يجيك صوت خيولهم هادر
تضحك صحاري نجد باستحسان = ويشع نجم ويندحر كافر
وتزغرد الخفرات بالميدان = ويطيب ليل العاشق الساهر
وإن قلت فيهم كان ياماكان = أدهى من الماضي ترى الحاضر
شعر \ حمدان بن سالم العنزي
[/poem]