لا تفرح إن الوقـت أسعدك واعطاك = لابــد مـاســود اللـــيالي تـبـكـيـــك
دنــــــيا تقلـّــب علــها مـــاتــولاك = تمسي عزيز وتصبح من الصعاليك
إلى اقبلت تخفي عيوبك عن اعداك = وإلى ادبرت تظهـر عيوبك لاهاليـك

اغنم من صروف الدهر كان امـداك = قبل اللحد عن ظاهر الارض يخفيك
وترى التشكّي للمخاليق يشــــــنـاك = يحط من قدرك ويفـرح مــعــاديـك
وكـثر التـشّره يجعـل الناس تجفاك = ولا عــاد تلـقى بيـنهـم من يخاويك
ولا تمادى في زعل من ترضــّــاك = مادام جاء عاني على شأن يرضيك
ولا تخــاوي من على ابوه بـــــدّاك = هذاك وان طال الزمان يغدر فـيـــك
والـجـاهـل احـذر لاتجـادلـه يـبـلاك = في كـلـمة بين الـمخاليـق تعـمـيــك
والهرجه العوجى لو أنها تنصــــاك = حـاول تجـاهـلهـا وخــلها تـعـديـــك
ولاتخـيـب هـقـوت اللي تـهـقـــواك = مادام جاء بين المخاليق ناصيـــــك
واحـذر تـهـزا يـافـتـى بخلق مولاك = تـشـوفـها باقـرب قـريـبٍ يوالـيـــك
ولاتفرح بزودٍ على الحق وان جاك = زودك ترى نقصٍ على حق ذوليـك
وخل القناعه ميزةٍ من مزايـــــــاك = مـع الـقـناعـه كــل شـيٍ يـكـفـيـــك
وان جت لك الدنيا على غير مشهاك = اصبر ترى بالصبر تدرك امانيـك
ولا تأمـن الدنيــا تـرى الوقـت فتــّاك = لجا القـدر كثـر الحـذر ماينجيـــك