قصتي مع السوق
في يوم من الايام كان لا لي ولا علي
مرتاح البال والضمير كنت بعد صلاة الفجر انتضر متى يبدا الدوام على شان الساعه 10 يجيب لنا المراسل الفطور حتى نفطر مع الزملاء بكل حب وسعاده وسوالف تشرح البال والخاطر
بعد الفطور الجميع على مكاتبهم حتى الاستأذان وقتها له طعم خاص عند ماتخرج نص ساعه من الدوام تحس انك خلصت كل شغلك جميع موظفين الدوائر الحكوميه كلن على مكتبه مافيه شيء اسمه الموظف ماهو موجود لان البديل موجود
المهم في يوم من الايام ونحن نفطر
قال احد الزملاء اليوم مكسبي من السوق 12000 ريال
قال الزميل الاخر انا اليوم 6000ريال
واستمر هذا الكلام المغري كذا يوم والربح مستمر
حدثتني نفسي وينك يامحمد عن هذه المكاسب وانت بحاجة اكثر منهم
طبعا استعنت بالله وذهبت للبنك العربي وهوا في عمارة مؤجره
وسويت حساب ومحفظة
وذهبت الى الدور الثاني في البنك وكان يوجد به غرفتين غرفه يوجد بها رجل على الكمبيوتر يبيع ويشتري للناس
وغرفه وجدت فيها مجموعه من الناس يتفرجو على التلفزيون ومتابعين شريط الاسهم
المهم سلمت عليهم وعرفت ثلاثه ثنين شريطية واحد خابره بالحراج يبيع غنم
سمعتهم يقولو اليوم السوق متفاعل ومجموعه يقولو اليوم السوق نسبه
بصراحه انا وقتها ماني عارف وش متفاعل وش نسبه
سألت بياع الغنم لاني اعرفه وقلت وش اشتري
قال عليك بالغنم قلت وينها الغنم وكان يقصد مكيرش
اشتريت في مكيرش في نفس اليوم وربحت حدود 3000 ريال
بديت اتعلم شوي شوي وشتريت كمبيوتر وحولت فلوسي الى البنك الاهلي وسويت محفظة ودخلت تداول الاهلي والفلوس كل يوم تزود
ماطولت هذه الطفره كثير حتى حلت الكارثة بعت بيتي الشعبي 110 الف ريال وكان دخله 2500 ريال شهري لعلي اعدل وتهون الخساره زادت الخساير اكثر واكثر
خرجت من السوق بالحكاكه ورضيت من الغنيمة بالسلامة وتركت السوق اللي رفع سكري وضغطي وسبب لكثير من الناس امراض وجلطات لانه للاسف ليس سوق مجرد مرجيحه خشبية ان ركبها التحتوح رفعك فوق واذا نزل منها نزلت بقوة وكسر ظهرك
لكن بعد مدة من تركي لهذا السوق رجعت على امل ان ارد خسارتي وارجو ذالك
التمنى ان لااقول مثل قولي زمان
ول ياسوق ياللي يوم خشيت فيك
ارتفع سكري والضغط بالحيل عالي
صرت اصارخ على الورعان وفرك فريك
وانتفض كل ماسهمي تدحدر ريالي
اخوكم محمد من الشمال المطل على البحر الاحمر
انا هنا معكم لاتهمني خسارة المال فلقد خسرت الكثير
كل الخساير تهون الا في اربع
ان تخسر نفسك
او دينك او اخلاقك
او الرجال اللي مثلكم وشرواكم والسلام