الموضوع جميل .. مسلي ومفيد ..
مثل اليوم
" ياغريب كن أديب "
************
رجل إشتهر بالكرم وكان كريم جدا .. كرم ما يوصف..
لكن بنفس الوقت اشتهر عن هـ الرجل هذا شي شين ....................؟!
*
*
*
وهو إنه يضرب ضيفه ؟
ولا يعقل أن هـ الميزتين تتوافق جميع يعني ماتجي...........
كرم وضرب ؟!
وقد اشتهر عنه مثل ماذكرنا إنه كريم وبنفس الوقت يضرب ضيفه ؟
مع مرور الأيام إنتقلت سمعة هـ الرجل للقرى المجاورة له ..
و كان فيه واحد قلبه حي يعني يحب المرجلة وعلوم الرجال وسمع عن هـ الرجل
هذا اللي كريم ويضرب ضيفه قال لازم اروح
و أتقهوى عنده و أشوف ليش يضرب ضيفه ؟
طبعا المسافة بعيده وبعد يومين وصل يم قرية
هـ الرجل الكريم ..
والرجل الكريم من أول
بيته معروف يكون بطرف الديرة
يعني بمدخل الديرة مثل مانقول
عشان الضيف اذا دخل الديرة يصير من نصيبه
المهم دخل عند الرجل وسلم عليه
رحب به ترحيب يشرح الصدر
وهلابه وتحفى به هـ الرجل راعي المثل
والضيف اللي جاي من بعيد جاز له الوضع
بس بنفس الوقت خايف كل شوي يقول بقلبه :
الحين يبي يضربن الرجال ؟
الكريم سوى القهوة والضيف
ساكت ويراقب
وسوى الشاهي وصب للضيف فنجال
وقرب له القدوع وتقهوى وقدع
وصب له شاهي وشرب الشاهي الوضع كله زين ..
الى الحين مافيه ضرب ولا شاف اللي سمع عنه :fu:
وبعد الشاهي رحب وهلا وصب قهوة له
الضيف تقهوى وانتهى قال أكرمك الله
يبي يمشي خلاص شاف إن
الرجل تمام التمام
قال المعزب حياك الله ..
إستغرب الرجل قال بصدره وين الكلام اللي سمعت
رده عليه مرة ثانية قال اكرمك الله قال حياك الله ...
قال أمشي أروح؟؟؟ قال إذا تبي تغدى معي حياك الله
قال لا.. لا أكرمك الله .. بس خلاص أمشي قال إيه حياك الله
*
*
*
قال ماأنت ضاربني ؟
قال ليش أضربك ؟!
قال أنا سمعت أنك تضرب ضيوفك ؟
قال لا اللي سمعته ماهو صح
أنا أضرب الضيف اللي مايحترم المجلس ..
أما أنت تحترم المجلس أنا يجين ناس مايقدرون قيمة المجلس ؟
ولا يعرفون آداب المجالس ولاهم رجال !!
*
*
*
قال الضيف شلون يعني ؟
قال يعني : اذا سويت قهوة وفاحت الدلة قال هه هه انتبه الدلة فاحت ؟
واذا فاح البريق قال البريق إنتبه
انتبه فاح واذا النار دخنت قال زين النار دخنت علينا ؟
واقلق راحتي وهو في مجلسي !!
فلذلك اضربه و أطرده من المجلس لانه ماهو بـ رجل ..
أما أنت جيت وجلست وسويت عندك قهوه وشاهي
وشبيت ناري ولا تكلمت ؟
مع العلم
ان القهوة فاحت و إنكبت
وأنا متعمد هـ الشي ..
وأنت ماتكلمت وهذا يدل على أنك رجل كفو
وتحترم مجالس الغير ..
..ويا غريب كن أديب ..
انتهت قصة مثل اليوم .. وهناك المزيد.. تابعوني :smile:
رد مع اقتباس
