بسم الله الرحمن الرحيم ~

حبيت اعلمكم طريقه باستا مع دياي علمتني عليها خدامتنا قبل لا تسافر الله يذكرها بالخير

المهم :D

أول شي المقادير

كل كمية استخدمتها اللي راح تشوفونها بالصور كفتنا ك3 اشخاص اذا كنتو اكثر زيدو الجيلة شوي

1- معكرونيا ايطاليا (خذيت ربع الجيس)

2-صدور من دياي ساديا (خذيت قطعتين)
ملاحظة : لازم تكونون مطلعين الدياي من الفريزر بالليل او الصبح يا تحطونه بالثلاجة او برا علشان ما يكون متيمّد .. انا حطيته بالثلاجة بالليل

- واحد فلفل اخضر + واحد جزر + واحد بصل ابيض (عقب ما تقصونهم غسلونهم عدل)


4- كريمة نستلة (انا استعملت قوطي واحد)


و قطعه وحدة ماجي اللي على ديج

نسيت اصور لكم البهارات
(استخدمت كاري + زنجبيل + بودرة ثوم + ملح)

الطريقة

اول شي نحط ماي و ملح بجدر المعكرونيا و نخليه ليما يصير حار
ملاحظة:لا تحطون المعكرونيا و الماي لي الحين بارد خلوه يصير حار عقبها حطو المعكرونيا

نقطع الدياي صغار و نغسله عدل


عقبها نفوحه ليما يصير ابيض شوي

نحمس البصل ليما يصير بني



نحط الجزر و الفلفل الاخضر

عقبها نسكر الجدر ليما الجزر يصير ليّن شوي بعدين نحط الدياي و نسكره مرة ثانية ليما يستوي الدياي

عقبها نحط كل البهارات و الماجي و نحوس .. عقبها ذوقو الدياي اذا كان يحتاج ملح ولا لأ


عقبها نحط الكريمة و نخلطهم



لا تنسون المعكرونيا .. اذا استوت كتو الماي


عقبها نحط المعكرونيا مع الخلطة اللي سويناها و نحوسهم مع بعض


ترى حلاتها تنوكل على طول ما انصح تغطونها .. الا اذا بتاخذونها حق زوارة او مكان برا البيت كيفكم


و بالعافية