السلام عليكم ورحمة الله وبركاته
كل عام وانتم بخير
ورمضان مبارك على الجميع
كيرلا
فاتنة الهند
جنة الله في الأرض
منطقة اللي يشوفها يكون شاف تلاتة ارباع جمال الطبيعة في العالم
لا تتمالك أمام جمالها الا انك تردد ( سبحان الله )
هي ولاية استوائية تقع جنوب الهند بها العديد من المدن .. التي تتنافس في جمالها وسحرها
بدأت السياحة تزدهر فيها مؤخرا .. لكنها مازالت تحتاج للكثير الكثير لتصبح من أشهر الأماكن السياحية في العالم
وربما كان عدم الاهتمام بالسياحة هو سر الجمال .. لأنك ترى فيها الطبيعة البكر ..
أبدأ في سرد تقريري .. لذا سأزيح الفصحى جانبا
وأرجع للهجتي .. عشان آخد راحتي
وبما اني التقطت اكتر من 1500 صورة .. سار لازم اقسم الموضوع لحلقات أو محطات عشان اصنف الصور واختار افضلها من جوالي >> نسيت الكاميرا معلقة على باب السيارة اللي وصلتني المطار .. وما اتذكرتها الا وانا في الطيارة .. وبغيت ابكي من القهر
ماكانت الهند أبدا في قائمتنا .. وما كان السفر اصلا في بالي .. كنت ادور في النت عن افضل الاماكن السياحية عشان ماما وبابا .. وسمعت اسم كيرلا مدري فين .. وسويت بحث .. وطلعتلي صور تبكِّي .. ومن وقتها شبطت فيهم .. وقلت مالي شغل .. بسافر معاكم يعني بسافر معاكم .. والا اروح الجوازات ادعي اني هندية متخلفة .. وخليهم يسفروني
طبعا خافوا أسويها .. فأخدوني معاهم .. وعشت الحلم
خططنا للرحلة عن طريق مكتب .. كنا خمسة .. أب وأم وتلاتة أطفال .. عفوا قصدي أبناء خخخخ
وللأسف كان قرارنا متأخر فما لقينا حجز الا على شركة هندية نسيت اسمها .. أظن ( جت إيروايز ) .. والعودة على السعودية .. وكلفت التذكرة الوحدة 2600 ريال .. علما انها كانت قبل اسبوعين من حجزنا وشراءنا للتذاكر بين 1900 و 2300 ..
وكان خط سيرنا كالتالي :
كوتشي
مونار
تكدي
كوماراكوم
إلبي
كوتشي
السعودية
وجا اليوم المنتظر .. وحركنا من الطايف على جدة ..
وركبنا الطيارة ..
وبعد تقريبا 5 ساعات وصلنا مطار مومباي اللي عرفت بعدين انو هيا نفسها بومباي
ولما وصلنا .. لقطت صورة مالها داعي .. بس ما كنت حارتاح لو ما أخدتها :)
وانتبهت لحاجة .. انو حظنا في المقاعد مرة مو حلو .. دايما مقاعدنا عند الجناح .. مهما كان رقمها .. ليش وكيف .. مادري !!!!
26 عند الجناح .. 32 عند الجناح .. 45 برضو عند الجناح .. مدري هما يحركوا الجناح ويجيبوه عند مقاعدنا والا ايش الحكاية
واتلطعنا هناك حوالي 8 ساعات .. واتمرمطنا مرمطة .. لدرجة نمنا على كراسيهم المتواضعة .. وفوقها اتأخرت الرحلة لكوتشي تقريبا ساعة
المهم اننا في الأخير ركبنا الطيارة وشويات واحنا في كوتشي أو كوتشين .. محطتنا الأولى