بسم الله الرحمن الرحيم
مساء / صباح الخير جميعاً
أول شي العنوان ماله دخل بالموضوع
لأني أشتركت بلعبة أدخل السجن وطلبوا مني أنزل موضوع بمنتدى قضايا
احترت وش ادور موضوع للنقاش
وقلت بجيب لكم موضوع مضايقني شخصياً
وهو اني ما ارسل على احد ايميل إلا يحطني في قائمته الطويلة ويمتحني برسايله السامجة
المشكلة ودي أعرف وش يحس فيه إذا نسخ خبر من جريدة او من صحيفة الكترونية وارسلة لمية واحد
يعني لاتعب على محتوى الخبر ولا تأكد من تاريخه ولا تاكد من صحته أو من جوازه شرعاً
اغرب شي واحد معي مره يرسلي احلفك بالله ترسله لكل اللي عندك وتطلع رسالة دينية
ومره يرسل لي جديد شريط خالد عبدالرحمن المسرب من الشركة المنتجه
تصدقون أني تعرفت على ثلاثة يعرفون بعض وصارت تجيني الرسالة مكرره ثلاث مرات
وهذا يدل انه مرض معدي
مره ضاع ورع في القصيم ووصلتني من الاول وبعدها بساعة من الثاني وبعدها بساعه من الثالث بعدها بسنه جتني نفس الرسالة من شخص مايعرفهم
وارسلت له وقلت هذا باقي مالقوه اهله
يمديه اتزوج وصار رجال
تصدقون ؟
اعطيت مصري ايميلي يرسل لي صور حفل
اليوم اللي بعده لقيته مرسل لي رسالة هل تدري ماهي الوان السموات السبع
يعني المشكلة مهي محلية سعودية
المشكلة عربية على نطاق واسع
والله لا يوريكم طحت في القروب المصري وانواع الرسايل اللي مالها مذهب
وصرت " مدور ورعان " على مستوى دولي
وبدل ما كل يوم تجيني رسالة ورع ضايع في القريات وشرورة صارت تجيني رسايل ورع ضايع في كفر الشيخ والفيوم
لذلك طرت علي فكرة
بكتب ايميل منمق
وابيكم ترسلونه لكل اللي عندكم على الايميل
وشوفوا بيجيب نتيجه او لا
واذا ما جاب نتيجه نبي نزيد من قسوة الكلام في الايميل
نص الرسالة :
أخي / اختي العزيز/ة
صباح / مساء الخير
أعلم جيداً أنك مواطن عادي لا يمكن ان تقوم بضافة شي جديد لي
وانك لا تفقه في عالم الانترنت أكثر من اعادة توجيه الرسالة
لذلك أرجوك أرجوك أرجوك
ان تستبعدني من قائمة خياراتك أثناء إعادة بث رسائلك
فأنا لا أدقق بوجيه الاطفال لكي ابحث عن المفقودين منهم
واستطيع الدخول بنفسي على موقع جريدة الرياض والجزيرة نت وجميع الصحف الاخبارية
وعندما أريد أن اخدم ديني فسوف أقوم بذلك بمالي ولمن يحتاج وليس بازعاج الناس بالرسائل المجانية .
أقدر لكم شغفكم لتكونوا مركز إعلامي ولكن ليس على حساب صندوق رسائلي
هذا والله يوفقكم ويرعاكم وتجدون ما يلبي رغباتكم الاعلامية الجامحة .