الا ياحمام الورق ياللي ضحى غنيت
ألا واهنيك من عناء الوقت مرتاحي
تغني على غصنٍ خضر يوم به عديت
بوسط الحديقه بين خوخ وتفاحي
انا لا طرى لي طاريٍ داخلي ونيت
ونين الصويب اللي قضى النحب بسلاحي
خطيرٍ تفيض النفس لو اكتم التنهيت
وكني على موج البحر دوم سباحي
ليا اقبل ظلام الليل لمسامره خاويت
ويطلع عليّ الفجر ماذقت الأمراحي
كن الحزن وسط الضماير بنى له بيت
تلج الضلوع بليلها لين الاصباحي
سبايب هنوفٍ خانت العهد بعد أوفيت
بعد خلت بقلبي سكاكين ورماحي
هواها ذبحني نعنبو حيها والميت
ومن شافني يقول هذا مهو صاحي
ظهر حبها اللي فالضماير سنين اخفيت
عفت الكرى من بعد زين التسناحي
وماينفع المشتاق قولت عسى ياليت
ولايرجع اللي فات بصياح ونياحي
انا من مسيرة حب ومن الشقاء مليت
ولا فادني فالحب جيه ومرواحي
تعلمت درس إن الهوى يتعب العنتيت
ولايمكن تعيشه سهالات وافراحي
ويالي تحفظ السر سري عليك ابديت
وترى السر حساسٍ ولايبغي فصاحي