مساء الخير أخواني و أخواتي في هذا المنتدى العزيز أقدم شكري الجزيل للأخت الغالية
(( مذهلة )) على دعوتها لي حبيت أطرح أول مشاركاتي وهي قصيده بسيطه
تعبر عما يجول في خاطري من خلالها ابين فلسفتي المتواضعه في الحياه..
اتمنى ان تنال رضاكم واعجابكم..
كل علم ٍٍ له علومه.. والسياسه للسياسي
وكل حد في الوقت هذا له تفاكير وسياسه
وكل لين ٍ رغم لينه مع مرور الوقت قاسي
والزمن وان كان قاسي يعرف العاقل قياسه
ياقلم اكتب حروفٍ صغتها من فكر راسي
ماكتبها اللي كتبها الا عن علم ودراسه
من يعيش اليوم يعرف كيف هو لعب الكراسي
والزمن لو طاب مهما طاب عوّد لانتكاسه
المراجل للرجال اللي شديدة بالحماسي
والمكارم نالها اللي طيبٍ والطيب ساسه
والقوي من كان يقوى للوقوف بكل باسي
قوته بالعز تحفظ صورته وتعز ناسه
والضعيف يعيش دايم في الهموم وفي المآسي
يلبس ثياب المذله من طرف رجله لراسه
والغني من كان نفسه تبذل الخير وتواسي
الدراهم عند كل الناس طهر ٍ اونجاسه
والغني من كان طبعه بالوفا والعز كاسي
كل من يدعيه لبّى دعوته واظهر حماسه
والشرف محلاه ثوبٍ خير من اية لباسي
مايصون اللاش ثوبه طول عمره في الدناسه
والوفا طبع النشاما لي تذكر كل ناسي
ماتخون العهد مهما طال وقته وانحباسه
من مشى في الناس يسعى بكل زيفٍ والتباسي
تلعنه كل الليالي والخلايق بالتباسه
ومن يبا يوصل لمجدٍ اويبا منصب رياسي
مابيوصل بالتمني لين يشرب مُر كاسه
المطر يحيي اراضي عقب ماتصبح يباسي
والعطا يحيي نفوس ٍ صابها وقت النحاسه
بعض ناس الوقت تعطي بالعطا بلا قياسي
وبعضهم يّده بخيله كنها سوق النخاسه!
الرجا في شخص تافه مثل راجي زرع غاسي
لو سقته الارض يبقى طول عمره في يباسه
وطالب الدنيا مريض ٍ ضاع وقته في انغماسي
واشهد انه دوم يبقى في الملذات انغماسه
والخلايق ماتساوى فرق واضح بالجناسي
كل واحد في الخلايق له مكان وله مقاسه
من يشوف الناس دونه والله انه شخص خاسي
ومن يشوف الناس فوقه نال في الدنيا وناسه
التجارب علمتني ماقطع لي غير فاسي
والزمن لا مايوقـّف ومن وقف في الدرب داسه
شاقني ليل التأمل شاقني رغم النعاسي
نظرة ٍ تاخذ عيوني والمدى كنـّه حراسه
مارحم وقتي شبابي ومانفع فيه التماسي
عايش ايامي لحالي عمر شاعر وانعكاسه
واحد من الناس والله كم يذوق وكم يقاسي
القصايد بعض زاده.. والحروف امست لباسه