هاي يا حلوين

بما اني اول مرة اطل عليكم بموضوع جديد خلوني ابربر على روسكم شويه ..


من خلال كلامي وضحت لكم اني كنت حريصه على انه مواضيعي تنقرى ورسالتي توصل للكل لعدة اسباب ..

اولها وقبل كل شي اني ما ابغا اكتم علم نافع ينفع الغير واكسب من خلاله الاجر والثواب
وثانيها مابغا ابالغ و اقول الهوس ولكن لازم اهتم جدا في نظافتي الشخصيه وفي اناقتي وجمالي .. وانا والله سرت احزن عالبنات اللي متبنيين فكرة انه الوحدة ما تهتم في نفسها الا اذا انخطبت او اتزوجت .. يا جماعه احنا في القرن الواحد والعشرين ولسه عندنا هادا الفكر؟! يا امهات اهتمو في بناتكم وخافو الله فيهم .. وجههوهم للطرق السليمة بالعناية الشخصيه والنظافه.. معظم البنات اللي بيشتكو من الالتهابات في المنطقه الحساسه ومشاكل البشرة والفطريات والامراض هادي كلها ناتج عن عدم توجيه او قلة اهتمام .. وانتو كمان يا بنات اهتمو في انفسكم ترى النظافة من الايمان .. يعني ديننا يحب النظافه ويحب الجمال .. الله جميل يحب الجمال ..بس لا تركزي عالجمال والمكياج واللبس وتهملي نظافتك الشخصيه.. افتكر في الجامعه كنت اشوف مناظر مخجله والله.. تلقيها حاطتلط داك الروج الاحمر ولكنه كله سايح على اسنانها وشعر يدينها استغفر الله مقزز.. المهم.. المنتدى ماشالله مليان مواضيع حلوة ومميزة .. كل وحدة تاخد اللي يناسبها .. لا تاخدي شي عشوائي يمكن ما يناسبك وبعدين تندمي .. ان كانت بشرتك جافه احرصي انك تستفيدي من خبرات العضوات اللي بشرتهم جافه واذا كان شعرك دهني ترا ما يناسبك تاخدي اي خلطة تعدمي شعرك لانه بنسمع مآسي كتيرة ومحزنة ..

شكرآ لكم عشان سمحتولي افضفض وافش خلئي على قولة اللبنانين والآن نبدا بالشغل ..

موضوعي عبارة عن ريفيوز لبعض منتجات العناية بالجسم اللي استخدمها .. اغلب منتجاتي من حبيب ألبي باث اند بودي ووركس.. انا وهادا المحل عايشين قصة حب مستمرة لاكتر من 3 سنوات ههههههه .. اتمنى يفتحوه عندنا قريبا في السعوديه ولو اني سمعت انه فتح في الرياض بس مو متاكده من صحة الخبريه ..

الموضوع بالترتيب حيتناول :


· عنايتي بالوجه


· عنايتي بالجسم


· عنايتي باليدين


· عنايتي بالقدمين




بس سامحوني ترا مالي في الفوتوشوب .. يادوب نسقت الصور عن طريق الرسام ..





أولا: العناية بالوجه

My Face Care



هادي صورة جماعية لمجموعتي الاسبوعيه للعناية ببشرتي .. وراح اشرح لكم عن كل منتج بالتفصيل



[IMG]http://im22.********************************************/2012-01-20/1327074714791.jpg[/IMG]




(1)


7day scrub cream- Clinique



اول شي خليني اعطيكم فكرة عن نوعية بشرتي.. عندي بشرة مختلطة.. يعني الخدين عاديه ومنطقة الجبهه والانف والذقن دهنيه ..


هادا مقشر للوجه من ماركة كلينيك الغنية عن التعريف .. بدات قصة اعجابي فيه من سنواااات .. كنت في دبنهامز مع صديقتي تبغا تشتري مستحضرات تجميل من كلينك وانا واقفه معاها اتفرج قام البياع قللي "انتي مش عايزة تشتري حاقه! طب خدي قربي المقشر ده وهتدعيلي وترقعي تشتري منه".. اعطاني عينة مجانيه ومن اول استخدام الصراحة اغرمت فيه بشدة .. يخلي البشرة صافيه وناعمة ومشرقه وتلاحظي الفرق من اول استعمال .. انا استخدمه يوميا .. والحلو انه مناسب لجميع انواع البشرة .. وfragrance free


طريقته انك تغسلي وجهك بماء دافي وتوزعي قليل من السكراب على وجهك وتعملي مساج خفيف بحيث تفركي كل

انحاء وجهك متجنبه منطقه حول العين وبعدها اشطفي وجهك بماء دافئ ونشفي وتمتعي ببشرة صافيه وحلوة ..



هل حارجع اشتريه ؟


لي اكتر من سته سنوات استخدمه ومهما جربت سكرابات غيره ما لقيت احسن منه .. في نظري هو الافضل واكيد حارجع اشتريه.. اشكر كلينك على هادا المنتج الرائع





(2)


True blue spa blackberry face mask- Bath and Body Works



وهادا قناع للوجه بريحة التوت الاسود من باث آند بودي ووركس .. من خلاصة التوت الاسود وزيت شجرة الشاي او Tea tree oil..



طريقته ..حطي طبقة خفيفه على وجهك وانتبهي لا تقربي منطقة حول العين و الحواجب وحول الشفايف .. وخليه اقل شي 20 دقيقه الين ينشف القناع وبعد كدا ابدئي اسحبيه بشويش من الاطراف.. هادا القناع من جد عجيب لانه يشيل كل القشورو الدهون والجلد الميت اللي في الوجه وهادا الشي تلاحظيه بوضوح لما تبدي تنزعي القناع .. حتلاقي كل الاوساخ فيه خاصة انه لونه اسود يعني يبينلك الاوساخ ..بعد ما تنزعيه كله من على وجهك حتبقى فتافيت صغيرة عالقه اغسليها بالماء عادي.. احب ريحته رهييييبه وتجنن..انا استخدمه مرة في الاسبوع ..



ملاحظة: تقدري تستخدميه كسلاح لتخويف اللي يزعلك في البيت لان لونه اسود وبجد يخوف ههههههه




هل حاشتريه تاني؟


اكيد نعم




(3)


Tea tree blackhead exfoliating wash- The Body Shop



كانت الرؤوس السوداء مسببتلي عقده نفسيه وكنت افكر لاول مرة في حياتي اني اسوي تنظيف بشرة في الصالون لكن بصراحة سمعت قصص ما تطمن عن مساويء تنظيف البشرة من ضمنها انه الكوافيرة ممكن تفتح مسامات الوجه وما تعرف كيف ترجع تقفلها وبكدا حتنكب البشرة لانه حيدخل فيها كل الاوساخ والاتربه ..غير كدا انا شخصيا دايما الاحظ اللي تسوي تنظيف بشرة يعطيها نضارة لوجهها لمدة لا تزيد عن اسبوع وبعد كدا يرجع الوجه اسوا مما كان ويصير شاحب غير الحبوب اللي ممكن تطلع اذا اتحسست البشرة .. عشان كدا قلت خليني اريح راسي وبلاش العب في بشرتي و اسوي شي ممكن اندم عليه ..ومرة من المرات قرات موضوع لوحدة من العضوات جزاها الله خير في منتدى تاني تمدح هادا المنتج من ذا بودي شوب وتقول انه حقق حلمها في ازالة الرؤوس السوداء وانا عاد جري على ذا بودي شوب >> ما صدقت الاخت ههههه ..



طريقته انك تحطي ماء دافي عالمنطقة اللي فيها الرؤوس السوداء وبعدها تحطي هادا السكراب وتبدئي تفركي لمدة خمس دقايق وبعدها غسليه ونشفي خشمك او وجهك وعلى طول استخدمي الحديدة المخصوصه للرؤوس السوداء برضه تلقوها في ذا بودي شوب .. حتلاقي الرؤوس السوداء تطلع معاكي بسهوله .. انا استخدمه مرتين في الاسبوع.. بس يبغاله شويه صبر وطولة بال .. يعني النتيجة ما راح تظهر من اول مرة بس حتلاحظي ان الرؤوس السوداء بتقل مرة بعد مرة الين تختفي .. طبعا ريحة التي تري شويه قويه وفي كتير ما يحبوها بس اعتبريه علاج واللي يبغا الدح ما يقول اح هههههه



هل حاشتريه تاني؟

المنتج رائع وخاصة انه من خط منتجات التي تري المعروفه بجودتها من زمان بس عتبي الوحيد اني كنت اتمنى لو انهم مزودين الحبيبات المستخلصه من المشمش في السكراب اكتر شوي .. من ناحية ارجع اشتريه او لا راح اقول يمقن ايوة ويمقن لا هههههههه




يمكن لاحظتو اني ما استخدم مرطب لوجهي والسبب يعود لانه بشرتي مختلطة زي ما قلت لكم في بداية الموضوع .. طبعا البشرة الدهنية لو رطبناها وحطينالها كريمات حنزود كمية الدهون فيها وحتصير تلمع ومنظرها بشع .. غير كدا البشرة الدهنيه ماهي في حاجة الى ترطيب لانها في الاساس بتفرز كميه زايدة من الدهون ازود من الطبيعيه ..يعني هيا بترطب نفسها بنفسها وفي فائض كمان .. هادا الفائض بنعالجه بالتقشير والماسكات والغسولات ..




Gohnson's face care




بالنسبة لتمسيح المكياج .. جربت انواع كتيييرة وعديدة ..جربت غسولات تمسيح الماكياج بس بصراحة ما عجبتني احس حوسه كل شويه جايبه قطنه وكابة عليها واحيانا ينكب عالتسريحة .. لكن المناديل المبلله احلى بكتير واسهل.. طبعا زي ما احنا عارفين الواحد يحتار ايش يختار من هادي المناديل ..في انواع كتيرة وشركات عديدة ومتنوعة لكن خلوني اكتفي بالقول اني ماعرفت قيمة هادي المناديل الا لما جربت غيرها .. على قول المثل :" ما تعرف خيري لين تجرب غيري" ههههههه ..



كنت افكر مناديل تمسيح المكياج كلها زي بعض واي نوع حيفي بالغرض ولكن جربت انواع كتيرة مو حلوة ابدن.. يا تلقيها مو مبلولة بلل كافي لمسح المكياج او تلقي مافيها المادة المرطبة للوجه يعني تسبب جفاف للبشرة او تسبب خدوش للبشرة وتهيجها وتخليها تصير حمرا .. بالنسبة لي هادا النوع يناسب بشرتي ومرتاحة عليه كتير .. عجبني انهم متحكمين في نسبة المحلول صح يعني المحلول فيها موازن لا تجيكي غرقانه مرة ولا ناشفه مرة وفيها فيتامينات مغذية تحتاجها البشرة بعد ما اجهدناها و ارهقناها بالمكياج.. بس خلي بالك تقفلي الغطا كويس عشان لا تنشف المناديل ..





راح اشتريه تاني؟


اكيد تاني وتالت وعاشر كمان




ملاحظة عن سعره: انتبهو يا بنات اشتريته من الصيدليه ب30 ريال ولقيته بعدين في السوبرماركت ب 24 ريال ولما رجعت للصيدلي وسالته قللي" معلش يا مدام اصله اسعار الادويه ثابته من الشركة و احنا ما بنكسبش فيها ولا حتى نص ريال فبنرفع الاسعار في المستحضرات" قلت اهااا الشغله كدا .. طيب خير ان شاء الله ..





انتظروني للموضوع بقية ..