اهلا بالجميع
قبل يومين كنت اتابع بزارين العيله وهم يلعبون مع بعضهم وحاولت افهم شي من العابهم وللاسف ماعرفت ورجعت فيني الذاكره ريوس لايام زمان والعابنا
اتذكر كان معانا وحده من الشله اسمها فايزهوكنا ندلعها فواز ,,, سميناها فواز بسبب ميولها للعب مع الاولاد اكثر من البنات وحتى ملابسها كانت ولاديه اكثر من الاولاد نفسهم ,,, كلها ترنقات رياضه نصراويه ودايم نلقاها لابسه من ثياب اخوانها ورافعه الكموم لنص الذراع ومشيتها زيهم وقصة شعرها جيرسون وللي مايعرف جيرسون يعني قصة ولد ولو ركزنا شوي نلاقي شعر خفييييف على يدينها ووجها سمعنا بعدين ان امها كانت تشيله بالحلاوه عشان لايطلع لها شنب وهي عاجبها الوضع ,,, حتى امها ماكنا نناديها الا ام فواز وتضحك علينا وكنا ننبسط من اللعب مع هالفايزه لكن بسطتنا هذي كانت تجي فوق روسنا دايم
:هاها: :هاها: :هاها:
مثال على كذا كانت تلعب لعبه مع الاولاد يجمعون علب سنتوب فاضيه فوق بعض واللي يطيحها بكوره صغيره هو الربحان وكانت الاخت تتمرن علينا حنا تصفنا على جدار وكل وحده على راسها علبة سنتوب والمشكله ماهي في انها تطيح علبة السنتوب لا المشكله انها تبي تلصق علبة السنتوب بقوه في الجدار اللي ورانا عشان كذا ترمي بكل قوتها ومن ثاني تمرين تعلمنا نوقف ووجيهنا للجدار حماية للعيون والخشم من كورها الطايشه ههههههههه وياكثر كورها الطايشه وطبعا انواع التآوهات والتمزيع في روسنا وظهورنا وبنت امها عاد اللي ترفض أو تقولها لا
:11retcher
ونجي للعبة العريس والعروسه ماكنا نحاول نلعبها وهي معانا عمرها مالعبت دور عروس دايم تبي تكون العريس وانواع التكفيخ لتعيسة الحظ اللي بتكون العروسه ,,, كل اللي تشوفه في المسلسلات الكويتيه والمصريه تطلعه على راسها ولاتنتهي اللعبه الا والعروس طالبه العفه ومنحاشه على بطنها وظهرها لبيت اهلها وتلعن الزواج وسنينه
:كلوش: :كلوش:
ولعبة الجارات ,, كنا نتخيل انفسنا كبيرات ومتزوجات وجارات ونسير على بعضنا وتتوزع بيننا الادوار الصغار مره نخليهم اولادنا وكل شيء تمام الا فايزه لا ماتبي تكون جاره كانت تسوي نفسها سواق ليموزين وندق عليها تجي توصلنا مشاويرنا ههههههههههههههههههه وتجلس على كرسي وتجلسنا على كراسي وراها زي السياره يعني وتسوي صوت فرامل قويه بفمها وياويلنا اذا ماطحنا من الكراسي وراها على الارض ,, ليش ؟ عشان تنزل وتصفقنا وتقول ليش ماربطتوا حزام الامان ياغبيه انتي وهي ,,, وفي الطريق انواع المغازل الله يرج ابليسك يافايزه كانت تغازلنا وهي تسوي نفسها تسوق السياره وعاد ليتها تعرف تغازل هي كلها كلمتين من كلام العرابجه ,, ارحم يامسلم ,,,,, او اموت في الخربز والمشمش وتغمز بعيونها وترمي مناديل علينا ترقمنا يعني وياويل اللي ماتاخذ المنديل تنزلها في نص المشوار من السياره يعني تطلع من اللعبه ههههههههههههههههههه وبس تروح ثلاث ارباع اللعبه في ليموزين فايزه نلقط مناديل ونطيح من فوق الكراسي
:mf_popean :mf_popean :mf_popean :mf_popean
ونجي للعبة البليستيشن حنا كنا نلعب العاب نعومه مثل كراش 1 وطرزان وهيركيوليس وهي اول ماتجي تقلبها كرة قدم او تيكين 4 لعبة الكونغ فو واتحدى احد يغلبها بهاللعبتين والغريب اذا بغت تريح من هاللعبتين قلبت على لعبة رعب نسيت اسمها وشف الرعب عاد والدم اللي في اللعبه وهي مبسوووووووطه وتضحك ,, طيب علمينا نلعب معاك ترد اووووه ماراح تفهمون شي يعني نصير متفرجات لين تنتهي من اللعب
ويصادف مرات نكون متجمعات وتجي مباراه منقوله للنصر وتصفنا حنا واخوانها بقرنه وتقول ماابي اسمع ولا نفس لين تنتهي المباراه وتبدا تزاعق من اول المباره لين اخرها وكل صياحها على الحكم ياحكمممممممممممم ياغبببببببببببي بلنتي يا اعمى وكل شي عندها بلنتي حتى لو الكوره بنص الملعب واول مره نشوف بنت تشجع النصر كل البنات هلاليات العاده الا هذي نصراويه وياويل وحده او واحد تسب النصر يوم اهلها مالوش ملامح على قولة المصاروه وسواء فاز النصر او تعادل او انهزم تقلب البيت مناحه وصياح وكانت ملصقه على دفاترها صور ماجد عبدالله ومحيسن الجمعان ايامها كانوا هم اللي ماكلين الجو
مره اشترت قطار لعبه وكانت تصفنا حنا وتبني سكة القطار وتخليها تمشي من بين رجولنا وتقول انتم كباري وحده اسمها كبري الوشم والثانيه كوبري الخليج ووحده خلتها توقف على يدينها ورجولها ومسميتها جسر البحرين ,,,,,, ماصدقنا على الله ينكسر قطارها ذاك ونفتك من الوقفه اللي بالساعات اما البنت اللي اسمها جسر البحرين ماعاد شفناها عقبها الا بعد 3 شهور قلنا اكيد تحرولت من وقفتها الغلط كل يوم
:11retcher :11retcher :11retcher
الله يذكرك بالخير يافواز ,,, بديناها بالالعاب ولفت السالفه على فايزه سألت اختي يوم كبرنا عنها قالت سمعت انها تبي تتزوج قلت غريبه تتزوج هذي قالت لا هي تقول انها بتتزوج عشان تتطلق وتتفرغ لنصف دينها الثاني هههههههههههههه يعني تبي تضمن النصف الاول وتخلص منه سريع سريع وبتفتح عقبها مكتب عقار ههههههههههههههههههههههه
ياليت كل اخت واخ هنا يمر يعطينا سالفه من سوالف العاب زمان ومفارقاتها الطريفه لابد كل واحد مرت عليه مواقف تستحق التدوين ومشكورين عالمرور مقدما
اختكم /// النجلاء
رد مع اقتباس
[/mark]
