اسعد الله اوقاتكم بالخير والمسرات
بصراحه ترددت كثيراً بإنزال هذا الموضوع ولكن توكلت على الله وقلت انزله لعل الله ان نجد الحل لديكم هنا بمنتديات غرابيل
اخواني اخواتي بصراحه معاي واحد من اعضاء منتديات غرابيل رجال شاربه مالي وجهه قد يعرفه البعض وقد يجهله البعض المهم
هذا الشخص للاسف مهووس بسوالف النسوان ويحب يناقشك وسأل عن فلانه وعن علانه ومن معاك بالمسنجر وشلون فلانه شفت ردها عليك شفت فلان يطارد فلانه ... الخ يعني مثل هالامور
والله العظيم اني احيان كنت اعطيه على قد عقله لكن شفت الرجال يستمر بالسؤال بالاول كنت احسبه يستعبط او يمزح لكن بما انه صار يستمر فسألته
وقلت له بالحرف الواحد( يافلان انت وش فيك تحب سوالف النسوان انت فيك عرق حرمه ) <<( اقصد تربية حرمه عايش بين نسوان ) لانه فيه نوعيه كثيره كذا
رد علي قال وش اسوي عندك علاج << طبعاً رده فيه نوع من الاستهزاء لكن ماكان قدامه الا هالرد لانه انصدم من جرأتي وسؤالي له هالسؤال
قلت له ابد خلاص بنزل موضوع بغرابيل والاخوان والاخوات مراح يقصرون بالمساعده طبعاً هو يحسبني استعبط او استهبل !
طبعاً مثل هذه المشاكل بكثره نواجهها بعالم المنتديات سواء من البنات او الشباب
وهنا نبي نبحث عن حل لمثل هذه الفئه من الشباب والفتيات واتمنى من لديه قصه او شخصيه مشابها لمثل هذه الفئه يخبرنا وكيف نتعامل معاه وماهي النصيحه التي نوجهها لهم ..؟
لانه هناك من يستغل مثل هذه الاسئله ويشوه سمعت فتاه ليتفاخر بها وهي عكس كل مايقوله بها لاني والله العظيم حصل معي قصه مع شخص وكان يتكلم عن فتاه وهي والله انها اطهر من ثوبه اللي عليه واطهر من شاربه
وكذا مره سمعت ايضاً قصص من اشخاص اخرين يقومون بتشويه فتيات وهن والله مافيهن الا طلاق الوجه وحسن الاخلاق
والعكس ايضاً فتيات يشوهن بعض الشباب وهناك قصص لا اود ان اذكرها فقد يعتبرها البعض من نسج الخيال وهي والله العظيم حقيقه ولكن لا اريد الاطاله فالموضوع واضح وضوح الشمس
علماً انني هنا لم انقل لكم هذا الموضوع لكي ابحث عن فتنه او اوجهه الكلام لحد معين بالعكس هذه فئه ولا احد ينكر وجودها بيننا وخاصه بعالم المنتديات ناهيكم عن الامور التي بخارج المنتديات سواء بالعمل او بين الاسر والاصدقاء
اتمنى انني وفقت في توضيح الصورة بالشكل المطلوب كما اتمنى ان اجد من اقلامكم ماهو مفيد سواء من نقد او حل
احترامي لكل من مر من هنا ..