الشاعر/ مسلم ربيع بن غبيشان السبيعي
ياهل الرنج يااللي رحتو مسافرين == معكم ابو العيون السود كامل حلاه
بشرو لا وصلتو داركم سالمين == قلبي من المحبة صار له ما كفاه
سلموا لي على اللي راكبٍ في اليمين == والله إنه حبيب القلب ما أبغى سواه
والله إنه حبيبي لو تطول السنين== كثرت الصد عني ماتنقص غلاه
السفر حان وانتم للسفر عازمين== والمولع تنكد يوم لاعه هواه
ينشد الريح لا هبت عن الياسمين == ياعساها تعلم عقب طولت جفاه
يسهر الليل ويقضيه كله ونين == يبتلنه هواجيسه وتبحث خفاه
ونتي ونة اللي سجن مطلوب دين== لاعه الفقر وهموم الزمن من وراه
شايلٍ هم دين وساكنٍ بيت طين== يردم الدين فوق الدين والله بلاه
أو ونة مريضٍ صايبه علتين == استشار الطبيب ولا عرف وش دواه
يجذب الونه من الشين في كل حين == وكل ما ذكر له طبيب شعبي نصاه
المواقف تخلي كل خافي يبين== ومن تولع بحب الأجنبي ياعناه
لا بغى يدغم الموضوع عله يزين== ما عرف وش خطى علمه ووشهو قداه
يطلب الله يفرجها على كل حين == طول اللي يبيه وكل يوم برجاه
ياسهوم الغدر منا وش اللي تبين== كل يومٍ ولك خلفيةٍ واتجاه
نبرة الحزن تظهر في كلام الحزين == كلمةٍ من لسانه تلفت الانتباه
رد مع اقتباس
