(((بسم الله الرحمن الرحيم)))
.
أسعد الله أوقاتكم بكل خير...!
لكل شخص مبادئ .. قد لا تتوافق مع مبادئك لذلك يجب عليك ان تحترمها ..!
لم يكن عدم تقدير لشاعريتها او إقرار بالشعر النسائي بقدر ماهو مبدأ وأقتناع
رفضت أن أللعب محاوره مع شاعره فقالت..
معذور يا ناصر ترى شبت النار..تبغى لها بين المطاليق وافي..!
.
.
فقلت..؟
[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
بدعت من فكري جديدات واْبكار=وفصلت لي ثوبٍ من الشعر ظافي
وفتحت لي قوسين واشعمت لي نار=وأضويت جمرٍ كان بالأمس طافي
جمر القصيد اللي عليه الزمن دار=وطبخت شعري والهجوس الاثافي
ثم جبت لي درٍ من ابحار الافكار=واصبحت الأول والبقيه خلافي
إليا ركبت اركب على قب الامهار=واليا رقيت ارقى ولانيب هافي
واليا سريت ادل في كل الأقطار=و اطى على سود الثعابين حافي
ولاني بأهاب ولا ألحق اللي معي عار=اليا بغى يرجع تراها عوافي
واليا عصبت اْعمامتي وافي اشبار=في ماقفي والا فشعري وقافي
مانيب امدح نفسي اعجاب بي مار=بعض الكلام يجرني للقوافي
كلام بنتٍ قالته سبق وإصرار=تقول بعد مناقشه واختلافي
(معذور يا ناصر ترى شبت النار=تبغى لها بين المطاليق وافي)
يابنت بعض الزرع ما ينبت اثمار=ويابنت بعض الهرج جرح متشافي
والسالفه ماهيب تقدير وإقرار=ولاهيب جلسه في مكان إئتلافي
السالفه مبدأ واحن تونا اْصغار=ان الثقال ثقال ماهم خفافي
يفرق شماغ العز عن رزة خمار=لاهوب لانقصٍ ولاهو جحافي
لكنّ من مبدا لكْلْ صوره إطار=بعض الصور أضفي عليها لحافي
وأختار اسوي شي واحيان ما اختار=مبادئي مركب وشعري مرافي
بكره تجيك اْعلوم واْعلوم واخبار=ويبين لك ما كان بالامس خافي
لو ان في كشف الخفا موت الأسرار=وسْيوف حسادي عليه رهافي
ياما تمنوا روحتي مثل الأنبار=غدت مابين المجزره والسوافي
وانا ليا من الفكر داخلي ثار=آرد على عدٍ رهاوي وصافي
ما كدّره وِردٍ حياما وصدّار=ولا لفاه اْمن الشواعير لافي
تجمّع بيوتي وهجسي لها دار=تجمّع اْشيوخ العرب فالملافي
واسوق بن الفكر والمنطق اْبهار=من شربها ما قال أكرم وكافي
وأن كان ما فالشعر تفكير وإحضار=المنطق وعلم الكلام الثقافي
مال الشعر قيمه اذا طرف الاشعار=متعومسٍ مابين صاحي وغافي
وانا يسّري هاجسي بعض الأمرار=كلام ابن سياب والا الرصافي
واسجّ بعض احيان في وقت الأسحار=سج الحبيب اللي كواه التجافي
لكن على الله ضيقتي والزمن جار=تشفع له الكلمه ولو به تنافي
دام الهجوس الي دعتني للإبحار=من غربتي لا غربتي والمنافي
أسافر فظلمى سراديب الأقدار=واعيش ما بين العدم والتكافي
وأحاول اُبدي قبل لا احتاج الأعذار=وشلون في بعض الأمور التلافي
واذا سألني غاليٍ ويش الأخبار=لو كان بطعوني اقول متعافي
هذي طريقة شاعرٍ يشعم النار=في خافقه ولا تبين الخوافي
بينت لك وش مبدأي بعد ما صار=بيني وبينك فاللقاء إختلافي[/poem]