رسالة سعودية مقهورة ....
زواج اخو زوجي المعاق ... تعبني !!! صرت نفسية
السلام عليكم
اخو زوجي عمره 28 سنه فيه اعاقه بسيطه (يعرج) موظف وساكن عند اهله وخطب اكثر من مره بنات اقل منه بالشكل وبالتعليم ورفضوا ...وهو محبوب جدا من كل اللي حواليه وكان صديقه حلاق تركي راح يحلق عنده وشكا له الوضع , قام التركي طق الصدر وقال انا عندي قريبتي ملتزمه وامنيتها بالحياه تسكن بلاد الحرمين . البنت من قرية ريفية .............................
عاد هو اقتنع وراح مع زوجي و2 من عيال عمه وخطبوا البنت وعقد قرانه عليها وجلس 3 اسابيع بتركيا , كل الوقت كانت ام زوجي تبكي على ولدها , كانت رافضه الفكره وتدعي ان الله يوفقه وحنا كنا نهدي فيها ونقول لها ازين من السعوديات فيهم شوفة نفس .
اتصل اخو زوجي وقال انه جاي هو وزوجته , طبعا زوجي كان جاي قبله وحكالي ان اهل الزوجه مره بسيطين ومسلمين سنه ويتبعون المذهب الحنبلي والعروس حافظه القران , المهم اهل زوجي سوو عشا عائلي بسيط لاستقبال العرسان
وماكنا مهتمين لان الجو كان كئيب لان ام زوجي تبكي لانها كانت تبي سعوديه , وخوات زوجي مو متحمسات
اول ما وصلوا العرسان حسيت ان البيت هدى من صراخ البزران , ودخل اخو زوجي وزوجته وكانت لابسه عبايه ساتره وكانت تساعد زوجها تمسك بيده وتعينه ماقالت عروس وابي اترزز عند حمواتي بالعبايه
المهم كنا حنا و2 من حريم اخوان زوجي و3 خوات زوجي نبي نستقبل العروس القرويه خخخخخخخخخخخخخخ
وكانت الصدمه دخلت علينا وبدون مبالغه انارت الغرفه ااايه ااايه , جمال وجسم بياض وعيون غمازات ابتسامه خجل كامله
انا كان بيغمى علي من القهر ... مرة اخو زوجي الثانيه تقول جاتها جلطه خفيفه ... خوات زوجي جاتهم ضحكه انتصار
دخلت وسلمت وقبلت ايد ام زوجي وراسها وحظنتها وجت تسلم علينا كانها تعرفنا من زمان ... مالت عليها مانبي نصادقها وش تبي ذي
انا حسيت نفسي البيضا الصاروخ طلعت شهباء وبشرتي خرابيط ... والثانيه تحسب نفسها جسم طلعت زوائد ماكنت اشوفها قبل تدخل علينا هالتركيه .....
المهم اخت زوجي تقول ترى اخوي يقول عمرها 18 سنه عاد انا تذكرت شكلي بعمر 18 هيكل عظمي وحبوب تارسه خشتي ..
وصرت افكر بزوجي لايكون شافها وانا اقول وش فيه عايفني من يوم جاء من تركيا (والله بعذره شاف ذي )
واقول بخاطري وشفيه مامدحهم يمكن شافها ويمكن لا
واناظر لفيسات حريم اخوان زوجي كل وحده سرحانه في وادي حرقت شسبودنا بدون ماتدري .. ليتهم قايلين انها صاروخ كان تهيأنا نفسيا
وجا وقت الصلاة وقامت توضى وتصلي وتسأل عن القبله والله ماخافت المكياج بيروح ولا بتطيح الرموش كل شي جمال رباني بكيفي ابي اعينها خربت علي حياتي خل تقولون شي
مرت 3 شهور من زواجه وهي ساكنه عند اهل زوجي وحامل وكل مره زوجي يقول بسلم على امي اقوم ارتز معه اخاف ذي تطلع له ويتذكر مآساته معي ....
المشكله اخلاق وحبوبه زود على جمالها وش تبي ذي وطباخه وتسوي خبز يجنن
دايم احصلها بالمطبخ ودي ادخل عليها واخرب بينها وبين اهل زوجي واقولها انت ليه كل يوم في مطبخ ليه كزا انتا فيه شغل كتير انا سيم سيم انت مافيه شغل انت حامل بس خساره ماتفهم علي >> نذله ابي اخرب سمعتها
قبل امس كان فيه زواج لواحد يقرب لاهل زوجي وجلست انا وسلفاتي على طاوله وحرب نفسيه خايفين لاتجي وتحضر
والمشكله حضرت واكلت الجووو لبسنا كعوب ولا وصلنا لطولها لبسنا مشدات لين طلعت ارواحنا وماجا زي جسمها وطن ميك اب ولا غير فينا شي...
وش تبي ذي ودي تطلع من حياتي ..... خلتنا مسخره انا وزجة اخوه الثانيه تقل خوات سندريلا كاشخات وشينات بجنبها ....
طبعا في ملاحظه رجااال العائله واولهم زوجي لعنوا العجله اللي ورطتهم فينا وتمنوا اعاقه على شان يتزوجون تركيه والله بعذرهم بس هين ناشبتلك ناشبتلك ...
بنتي اللي كانت شايفتني توب ... قالت ماما ابي لاصرت كبيرة اصير زي زوجة عمو التركيه قلت اشربي حليب ,,,,,, قامت وجابت كاس اطول منها تشرب واقول في نفسي رددي ياليل ماطولك
غير كذا صرت افكر ااجل الحمل 5 سنوات اخاف احمل الحين وتجيب بنت وانا اجيب بنت وتعالوا شوفوا المقارنات .. ولا وحده تقول عادي ,,
وفي الاخير ماشاء الله تبارك الله على شان لاتقولون تبين تحسدينها ****!!!!!!!!!!!!!
رد مع اقتباس
