ياوجودي وجد طير(ن) وصقاره فقير
تو ماخوى على الشيخ من ضمن اخوياه
حدته الايام والدين والوقت العسير
ومن خلقه الله والطير ماعمره قناه
مايميز طلع طيره اليا تله اعصير
وكل ماهده على الطلع من دونه دعاه
والنداوي غلق اسبوع ماذاق النسير
عرضه برد الهبايب وخطراله عشاه
في حياته مابعد شل ولاهد له طير
وابتلا في الطير والطير فيه الله بلاه
مالقاله من ردى الحظ في الحمله شوير
والمعزب قدم عينه وديانه وراه
اتوجد وجد طيره وانا ماني بخير
لو يفيد الوجد حولت من راس العلاه
منك ياللي تسكن القلب من عادك صغير
قبل تقراء سورة الحمد وتعرف الصلاه
عاد اهلكم فاول القيض تنزل جال بير
فوق عد(ن)منزله حد عرق(ن) من حصاه
وعاد ورد الطرش يومين والثالث صدير
فاخر المصايف والقيض فاول مبتداه
وعاد ابوك الراي عنده وفي ربعه الامير
والجماعه في ذرا الله ومن بعده ذراه
وعاد بيته في الرفاعه ومفروشه حصير
شاهق لاشافه الضيف من بعد(ن) نصاه
وعاد ضوه من سناها على العارض تنير
قبل يذن مذن الفجر ووجاره شعاه
وعاد خيره عند ربعه ويلقاه القصير
ومايذوق الزاد من دون ربعه وقصراه
وعاد مربط خيلكم حي والسيف الشطير
والصدا ماناش حده وقلل من شباه
وعاد هطلان اليماني تشار وتستشير
والرفيق ان زل يذخر ويدمحله خطاه
وعاد قلبك في المدينه مثل عين الضرير
والقصر ماذقت زاده ولاشربت ماه
وعاد تفكيرك ليا جيت للجم الغزير
كيف اموتك عشق وارجع على قيد الحياه
كل هذا قبل دورات بقعاء تستدير
والسنين تمر والوقت ماتاقف رحاه
كان عشقك غير والحين عشقك صار غير
لو تشوف الضامي الحنج ماتقطع ضماه
ولا انا لدلبح النجم وجه فالغدير
قمت اجر الصوت واكتب على حيد النباه
بيت شعر ماكتبه اصمعي ولا جرير
بس يبقى من جماله وترويه الرواه
اي ليل (ن)لا ارى ذلك البدر المنير
اي عشق(ن) يقتل العاشقين هواه
وياصغير في عيوني وفي قلبي كبير
ليت قلبي برق غيرك ليا شافك رعاه
كان من ضره فراقك ولا الفرقا تصير
والسهر يقطع نواصيه في سمر الجباه
ومل قلب مابقى الا من ضلوعه يطير
كل مادقه على الغالي المقفي غلاه
السهر جاعد اشداده وونته البعير
والحزن لوح المسامه ودمعاته عصاه
ياقليل الشوق ماعاد من عقبك كثير
الجفا فج الحنايا ومعلوقي براه
لك علي اني احبك ولو ماني بخير
من غلاك اللي ذبحني ولا منه غناه
وسلامتكم
اتمنى تعجبكم
رد مع اقتباس
المشاركة الأصلية كتبت بواسطة غـ شمر ــلا
