لي قصةٍ تبكي عيون الرياجيل
لي قصة(ن) تبكي عيون الرياجيل = من قبل ما تبكي عيون الصبايا
بي عبرة(ن) مدري دموع(ن) هماليل = جارت همومي ما بقى بي بقايا
وبي صرخة(ن) بالجوف من زايد الويل = وبي ونة(ن) ونيتها للنهايا
ومن الشقا والهم ما عاد بي حيل = قدامي مصيبة والاخرى ورايا
جتني هموم(ن) كنها عاتي السيل = ترعد وتمطر بالمصايب سمايا
احاول القى لي دروب ومداهيل = احاول اطلع في اقل الضحايا
حظي عدلته للاسف زاد بالميل=كنه يعاندني شحيح العطايا
جريت انا موال .. مدري مواويل = والكل راقد يوم زدت ببكايا
ولولا الحيا جريت صوت الولاويل = واصرخ واشق الجيب واكشف خفايا
بللت طول الليل بيض المناديل = ابكي ولا احد(ن) داري(ن) وش بلايا
ابكي شباب(ن) راح من دون تحصيل = عزاه ضيعت الشباب بغبايا
راحت سنين(ن) كلها بالاقاويل = يقول لي واقول نفس الحكايا
قصة غرام وحلم.. قصة تهاويل = وحطيت رجلي في طريق البدايا
امشي الطريق المايل بدون تعديل = لاجله سهرت الليل يومه هوايا
مامن ورى حب ((......)) محاصيــل = مالي ومال اللي علومه رزايااا
هي غلطتي اني عشقت الوفا حيل = يتعب ولا يلقى شبيه لوفايا
من عقبه اسهر بالبكا تالي الليل = وادعي عسى ربي يجيب المنايا
ترا الحقيقة واضحة دون تعديل = من يوم عرفك كنت غامض معايا
واضح بصدك والهجر والبهاذيل =حاولت تبعدني بكل السوايا
يومك تبادرني بصد وتناكيل = كنت ابتسم لك واتحمل عنايا
جيتك باخفف همك وزايد الويل = يومك مبيت لي جميع النوايا
واقول لك ترا الفرج بالمقابيل = اصبر جعل يفداك كل الردايا
اثرك تبيني ابتعد دون تعليل = وانا على النية مشيت بعمايا
كنت الكريم وصرت بالعاطفة بخيل = يومك تقول ارجوك منتي منايا؟
مشاعري.. عواطفي كالمهابيل = لان المشاعر والعواطف ضمايا
بالصد لاتكثر علي المكاييل = ارجوك .. (تكفى) لا تخيّب رجايا
دخيلتك ما عاد بي للجفا حيل = جيت اتشكى.. ليه تسفه شكايا
جيتك خضوع(ن) وانكسار(ن) وتذليل = جيتك عليلة في يدينك دوايا
ترا خضوعي ما يجي بالتساهيل = ارجووووك يا الغالي كفايا كفايا
ذلي ترا عندك باسميه تدليل = حتى طعونك باعتبرها هدايا
جيتك واشوف الغير عقبك تماثيل = سقت المشاعر والغلا بالحنايا
وقالوا ترا تكفى تهز الرياجيل = وانتَ اصيل(ن) من كرام اللحايا
تكفى يا خلي لاتزيد البهاذيل = تكفى رجيتك لا تسبب شقايا
في قربك الراحة وفي بعدك الويل =بعدك همومي واقترابك هنايا
هذي الحقيقة دون شرح(ن) وتفصيل = هذي القصيدة بوح بنت الطنايا
السلام عليكم جميعا
هذي الول مشاركه لي بالمنتدى العملاعق
قصيده منقوله بس فعلا تستحق النشر بريي
تقبلو ا تحيات اختكم حزن النوايف:خجل:
رد مع اقتباس
-new.gif)
