السلام عليكم
مساءكم /صباحكم
اوركيد كامش من المربعانيه :)
تنبيهههههههه فيه مصطلحات مشفره بالعاميه اللي مايفهمهما يرجع لقاموس تفسير الماء بالماء يمكن يفيده :)
بالصراحه انا عندي مشكله اذا جيت انزل موضوع اجلس كم من يوم احتاروين انزله في اي قسم واخيرا اسوي مناقصه وقرعه تطيع في هالقسم
وماادري هو مناسب ولا لا لكن ان كان ماهو مناسب على المشرفين هنا سحبه بهدوء لكي لايتجرح ويضعونه في المكان المناسب :)
هنا ابي اسولف لكم عن العيد
فالعيد في ربووووووووووووعنا فله
ربوعنا ولا خميسنا :)
<<< ينكت
وابي اذكر لكم موقفا صغيرحصل علي انا وعمي
تعرفون انتم ثلاث الايام الاولى من العيد يتبرمج لسانك على قولة من العايدين الفايزين
من كثر ماتقولها ومن كثرماتعايد خلق الله
وصار اليوم الرابع وفاه لاحد ماعرفنا
وقال عمي نبي نروح نعزيهم قلت سمعا وطاعه اجر وغنيمه
وانا عارفه ماغير يبيني اوديه :)
المهم رحنا للرياجيل ويوم جيناهم دخل عمي قبل
ورد السلام وقابله ولد المتوفي وحنا معايدينهم العيد الاول
وبعد مارد السلام قال عمي من العاااااااي ثمن وقف عرف انه اخطاء بدال مايقول احسن الله عزاكم وعظم الله اجركم
المهم رده الله الى الصواب ههههه اللي يشوفك يقول انه قايل شي منكر :)
وانا واراه خنقتني العبره ماهي عبرة حزن عبرة الضحكه اللي كاتمها
المهم ماطالع في عارف انه لو طالع في يبي يجيب العيد ويفكها ضحكه
والرجال زين مااستنكر اللي حصل ،،، انتهى موقفي بسلام :)
ابي اردكم لعيدنا
العيد في نجد له طعم اخر وله نكهته الخاصه بالذات هالايام
نظرا لانتشار الانفلونزا الخنازير والازمات الاقتصاديه
العيد في ربوع نجد فله
ابي اترككم مع هالقصيده للشاعر اخوي محمد
[bimg]http://up.arab-x.com/Dec09/9pg06315.jpg[/bimg]
يانجد لايلحقك «غيره» وتوهيم
مالك ترى «ضره» ولالك قرابه
مالك شبيه في جميع الاقاليم
انتي لنا باريس.. لندن.. وطابه
والله لو «بحلف» علي الملازيم
يانجد غيرك في عيوني خرابه
انتي لنا طب الكبود «المكاليم»
وغيرك يجيب لنا المرض والكآبه
سج القدم في «عبلتك» يشفي الضيم
في صحصح ممطور ماحدن مشابه
يسوقني الماطر على نجد واهيم
لا اروحت انا ريح «الثرى» في ترابه
يامحلا ذود «العفر» و«المجاهيم»
«يبرالها» شاص وفوقه زهابه
نتبع ضعون ماتجي بالملاليم
في محجر كنه من العشب غابه
كن «النفل» ويا «الخزامى» معازيم
في «كف» اخضر والبختري خضابه
تلعب طيور الوسم ولها تقاسيم
تشبه تقاسيم «الوتر» و «الربابه»
والا «الرياض» الها تحية وتسليم
دار قضى فيها «المولع» شبابه
دار الشيوخ «منكسين» المرازيم
اللي لهم بالمجد «عز» و«مهابه»
بس عاد لو بحلف!! علي الملازيم
«يانجد» غيرك في عيوني خرابه
والقصيده ماني حافظها كلها :)
والآن ابي اترككم مع بعض الصور لعيدنا اعاده الله عليكم بالفرح والسرور
وهذه صوره للخيمه اثناء هطول المطر
وهذه صوره لشبة النار
[bimg]http://up.arab-x.com/Dec09/ZJd06316.jpg[/bimg]
وهذه صوره لعمل الكبده على النار
[bimg]http://up.arab-x.com/Dec09/4C806316.jpg[/bimg]
وهذه صوره من داخل المخيم
[bimg]http://up.arab-x.com/Dec09/Yze06316.jpg[/bimg]
وهذه صوره لتقديم وجبة الغداء
[bimg]http://up.arab-x.com/Dec09/8Ut06316.jpg[/bimg]
والآن انتقل بكم الى صور من رحلتنا جهة الذود المغاتير اثناء الامطار
صوره وانا في طريقي للأبل
احد الاوديه يمشي من المطر
الجو ممطر والارض مويه اللهم لك الحمد
ياحي نجد اللي تخاتيخها جرد
ارض الملوك اللي عريبا نسبها
ولحظة وصولنا للذود
[bimg]http://up.arab-x.com/Dec09/cou06110.jpg[/bimg]
على طول ماعندنا صبر نبي نشرب حليب
[bimg]http://up.arab-x.com/Dec09/7cl06110.jpg[/bimg]
ثمن صلينا صلاة العصر
[bimg]http://up.arab-x.com/Dec09/7R306110.jpg[/bimg]
ثمن اتجهنا للمحل والمبيت
[bimg]http://up.arab-x.com/Dec09/Fjz06110.jpg[/bimg]
[bimg]http://up.arab-x.com/Dec09/zjH06109.jpg[/bimg]
ثمن هنا جلسه في الجو اللي يبري الكبد العليله
[BIMG]http://up.arab-x.com/Dec09/Hl606172.jpg[/BIMG]
ومره اخرى شربة الحليب
[bimg]http://up.arab-x.com/Dec09/5cr06172.jpg[/bimg]
وهذه هديه لكل من مر من هنا
[bimg]http://up.arab-x.com/Dec09/MBA06172.jpg[/bimg]
وشكرا لمن اخذنا من وقته هنا
واللي مايعجبه الموضوع يجامل ويقول شكرا مره وحده
واللي يعجبه يقول شكرا مرتين :)
ولا اقول اللي مايعجبه الموضوع يشوف اقرب زاويه :)
يمكن الله يفرج همه
ولكم مني خالص الود والتقدير
رد مع اقتباس
الا السعــــادهـ ..
الا دمـوع 
الان وعند الكِـبـر 
المشاركة الأصلية كتبت بواسطة فهده
.. لالا يعني اشمو دا اقيمو أحط له نجوم ههههه "
