[frame="1 98"]
[poem=font=",6,white,bold,normal" bkcolor="transparent" bkimage="http://www.g111g.com/vb/mwaextraedit2/backgrounds/9.gif" border="none,4," type=1 line=0 align=center use=ex num="0,black""]
بســم الله ابدا و ابتــدي بالتراحيــــب =يا مرحبا ترحيب مثل الخيـــالي
مزنة كرم سيلة يطم الاشاعيب =حتى يغطّي ماه روس العوالي
يا مرحبا بالضيف عند المعازيب =في دار من تفداه روحي ومالي
صباح ستر الغافلات الرعابيب =ملجا العرب والي لمن دون والي
جوده على كل العرب والاجانيب =سحابة (ن) ما تقطع الانهمالي
ما للشعب في ظل حكمه مطاليب =يجهد ويرخص للوطن كل غالي
ياسيّدي في ملتقى الاسلم ايطيب =ليلي وفي برغش يطيب احتفالي
شيخ(ن) ومن صفوة هل المجد والطيب =ساس الجبل ستره من اول وتالي
بالقصر الاحمر لخو صلفة تجاريب =تاريخ يبقى ثابت ولا يزالي
من فوق سودا ما تشوف الشخانيب =من سرعها تاطا الوعر ما تبالي
ما قادها اللي لو تصك المغاليب =يرف جنبه خوف والا جفالي
خيّالها يقطع عليها العباعيب =ما حسّب احساب الدروب الطوالي
والهيبته روس السيوف المحاديب =تحنا تعظّم سطوته بالقتالي
تاريخ الاسلم شمس لا يمكن تغيب =بياضها يجلي سواد الليالي
من دونهم ما يكمل (ن) المواجيب =ومن دونهم ما يكملون الرجالي
غلاف جو المرجلة والهناديب =الطيّبة والوافية والجزالي
افعالهم بلسم يزيل العذاريب =وارجاله ارفع من شموخ الجبالي
ترى الكرم لولاكم ايشيب ويعيب =انتم اساسة في جنوب وشمالي
قبل الرسول ومن بعد نوح وشعيب =للجود حاتم سطّر اروع مثالي
نور(ن) على نور(ن) ولا هي مشاهيب =يكمل بكم نور القمر والهلالي
يا قبلة الطيب النقي والمحاريب =سكينة المذعور يوم الهوالي
زبن الدخيل وستر من تشعط الجيب =ما حسّبت للكايده والثقالي
فزتوا بخمسة دون شكّ(ن) ولا ريب =الطيّبات الخمس بين الخصالي
أولهن حميّا عطيب المضاريب =ضاري وضاري للطنايا ظلالي
لولاه ما نرقا بعالي المراقيب =ومامن نصر بالجوف لولا الطوالي
لولاه ما كان الشجاعة لها صيب =تحيل ما تنجب قروم العيالي
والثانية للّي يحل الاصاعيب =من لحيته مكرم كرام السبالي
كريم سبلا يوم دور الدواليب =عاشوا رغد بحماه عن كل صالي
شيخ الجبل فكاك صم الكلاليب =ما عقّدوه معقّدين الحبالي
والثالثة جزلة طوال الاشانيب =شبره على شبر الاجاويد طالي
لهل اللحيسا طيّبين الاصاليب =يشهدله البندق وضرب السلالي
غطا كرمهم شرق حايل وتغريب =بالحايل من الضان والا الجمالي
والرابعة لعيال عكف المخاليب =لهل الجوار بدون شك وجدالي
ذرا لجاره عن سموم اللواهيب =عون الرفيق الاجنبي والموالي
والخامسه تبرى جروح معاطيب =لبن لهيميد الرّحم والواصالي
لو بعض ناس يلفّقون التكاذيب =عليه محد بالرحم له مجالي
هذا ترى من غيض صافي المشاريب =والفيض ما يكفيه هرج ومقالي
انتم خلاصة عنبر(ن) ينفح الطيب =يحيي القلوب ويجعل المر حالي
هذا شعور الترقصي جهر(ن) وغيب =يشهد علي ما قلت رب الجلالي
ولو كان ماني شمري ذيب من ذيب =ما طوّل الشارب وأميّل عقالي
[/poem]
[/frame]
رد مع اقتباس
