[poem=font="arial,6,blue,bold,normal" bkcolor="transparent" bkimage="" border="none,4," type=0 line=1 align=center use=sp num="0,black""]
صرخة !! إلى من يهمه الأمر ؟!!
الجوع وِصْل حلوقنا يالهوامير = وانتم موايدكم طعام البساســـة
ياسارقين أموالنا يالخنازير = خنتوا بنا ياشاربين الخساســـة
متآمرين ومااجتمعتم على خير = تجمّع العقبان حول النجاســـة
والله مافيكم شريفٍ ولااْمير = لو يدّعي إنه حفيد الرياســــة
أكالة أموال اليتيم المغارير = غرتكم الدنيا بســاعة وناســـة
لادين يردعكم ولاصحوة ضْمير = والذيب يطمع في ضعيف الحراسة
ضعنا مابين ارجافكم والتباشير = نزيد فقر وزدتم انتم شراسة
( شغل احتكار ) وحجب رؤية وتغرير = تشفير معلومة ولعبة بلاسة
السوق سوق لبعض بعض المشاهير = أهل نفوذ وجاه وأيضا سياسة
الطغمة اللي تعتبرنا صراصير = بيّاعة المسلم بسوق النخاسة
بثّوا لنا بافتاتهم كالعصافير = وحنّا على ماقيل ضروة لحاسة
وجينا على النية بزفة وتصفير = الشمغ طارت من شديد الحماسة
كبودنا ملّت جفاف الأعاصير = يعني حرام نْذوق لو ربع كاسة ؟!
حنا بشر دم ولحم حلمنا صغير = عيشٍ كريم ولاطمحنا بماســـة
يكفي دفعنا غاليات الفواتير = ويكفي تجرعنا صنوف التعاســـة
شف حالنا يوم الرواتب طوابير = من حاجته كلٍّ يزاحم براســــه
وبالاكتتاب تْشوف موتٍ وتكسير = من ضيقة الأحوال ماهي غلاســة
كنّا عطاشى حاضبينٍ على بير = هماج ماه وهابطٍ في مقاســه
كلٍّ ترك خلفه ضعوفٍ مكاسير = هذا يصيح وذاك حارب نعاسه
الجوع كافر ماتفيد التخادير = ويالعن أبوه الذل ياقو باســـــه !
الحاصل إن الوضع عكس التقارير = ضياع أسر .. أمراض .. حزن .. انتكاسة
إفلاس شعب ... أفلام رعب ... ومحاذير = مؤامرة ماظن تبغى فراسة !
تكتيك حشّاشين تصفيق سكّير = غياب هيئة سوق ... ضياع طاسة
ادعوا عليهم سارعوا يالجماهير = ماعاد ينفع صمتنا والدساسة
ادعوا عليهم صبح وبليل وعصير = في دعوة المظلوم طهر وقداسة
ياالله تخيط جلودهم بالمسامير = إلين واحدهم يضيّع مداســـه
وتصيبهم بالهلوسة والتفاكير = خذهم بليلْ حالكٍ في دماســــــه
هذي كوارثهم بدت يمّنا تْغير = واصبر شوي الوضع ملعون ساسه
وين الخطط وإلاّ الخطط بس تنظير = وين الأمان بسوقنا من أساسه
طيحة مؤشّرنا ولابالأساطير = يابوي مطبوخة بفن ودراســــة [/poem]
رد مع اقتباس
المشاركة الأصلية كتبت بواسطة حمدان بن سالم
-new.gif)
