بسم الله الرحمن الرحيم
السلام عليكم ورحمة الله وبركاته
الحلى هذا له قصة .. عبارة عن مقلب .. بإمكانك تسوينه مع صاحباتك أو أهلك إذا الطبق جديد عليهم ..
السالفة وما فيها ..
أختي مجاملة من الدرجة الأولى .. ما تحب ( تفشل ) أحد .. دايم هالكلمات على لسانها : ( يجنن ، يهبل ، روعة ... )
حتى لو ما أعجبها ..
مرة من المرات وحدة من زميلاتها ( اللي كان عليها القهوة ذاك اليوم ) .. حطت سفرتها .. وبدوا يتقهوون .. وبنص القهوة قالت البنت : يا بنات أنا معاي بضاعة عطتني إياها وحدة تبيني أبيعها لها .. وبصراحة مستحية أرجعها ما أحد أشترى منها .. يعني لازم تشترون .. والبضاعة عبارة عن ( معمول ) ودهن عود ..
أختي أخذت ( حبة معمول ) وشمتها ، قالت زميلتها : وش رآيك ؟ .. حلوة صح ؟ .. قالت : تجنن ..
وأخذت دهن العود الأبيض وفتحته ومسحت على كفها من فوق .. ومسحت عليه بيدها الثانية وقالت : وش فيها يديني تلاصقت ؟!!
والثانية مسحت به على وجهها .. والثالثة على ملابسها !!
وحدة رابعة أخذت دهن العود البني .. خافت زميلتهم عليهم من الحوسة أكثر .. قالت : لا ما عليش ، ما ترضى صاحبته إنكم تستخدمونه ..
وقالت وحدة منهم : حطي لي 10 حبات من المعمول بس ترى ما فيه فلوس إلا على الشهر الجاي .. قالت البنت : عادي ، ما عندها مانع بس أهم شي تشترون .. وراحت تجهز لها عشر حبات بـ ( منديل ) .. وفجأة أخذت حبة من المعمول وكلتها .. واللي انقرفت منها ، واللي استغربت .. بالنهاية اعترفت لهم إنه حلى مو معمول ..
وهذي مقاديره :
شعيرية باكستانية + حليب نستلة + بسكويت أوريو . ( معاه شغلات ثانية بس ما سويتها ـ اختصرت ـ )
ونحتاج لصندوق خشبي ، أو أي علبة ( معمول ) .. + تولتين جديدات <<< انتبهوا من المستخدم .
عاد أنتم تفننو بأشكال التولات ..
،
،
وبعدين تكسرون الشعيرية وتحمرونها على الفرن شوي لحد ما يصير لونها أشقر :
وبسكويت الأوريو تطحنونه طحن بالطاحونة :
وبعدين تصبين عليها حليب النستلة ( طريقة حلى الشعيرية القديم والمعروف )
وبعدين تكورينها وتغمسينها بالأوريو المطحون :
وآخر شي تصفينها بالعلبة .. بس لازم تغطين مساحة العلبة ، لأنها بتكون عميقة .. أنا حطيت فيها كيس فاضي وغطيته بمناديل سفرة ، وممكن تغطينه بقماش ستان أو شرائط .. مثل الصورة اللي شفتوها بـموضوع ( وش الطبخة ) .
طبعاً ما ترتبينها .. تحطينها عشوائي ..
وبعدها تآخذين تولات دهن العود .. وحدة تعبينها شيرة ، والثانية هيرشي :
طبعاً الشيرة والهيرشي ما لها علاقة بالحلى كله ، بس تبع المقلب .
،
،
وبالعافية على قلوبكم .
رد مع اقتباس
