السلام عليكم ورحمة الله وبركاته
تماشياً مع المثل الشائع والقائل : مع الخيل يا شقرا <<< مشكلتي إني شقراء ولازم أطبق المثل بحاذفيره لأنه وجه نداء لي ..
وبعد ما شفت إن الموضة هالسنة في المنتدى هي الكتابة في قسم الغربلة ..
قررت أكتب دفاعاً عن روحي المأسورة في غيابت [ الجدية والرسمية ] وأقول :
بناءً على ما تناقلته وكالة جي ون ون ون جي عني .. بأني فتاة لا أعرف طريقاً للمرح <<< مضيعه الكروكي طيب
وأني رسمية لدرجة إني ذاكـ اليوم يوم دخلت موضوع أمل سمعتهم يقولون : خلاص خلاص لا عاد تضحكون أسكتوا ..
ثم طلعت ورحت لموضوع فايز شفتهم يتناحشون ويتهاوشون على المناديل عشان يوضحون ويأكدون إنهم معاي قلباً وقالباً .
بصراحة ضاق بي المنتدى بكبره .. حسيت إني إنسانة ثقيلة الوزن .. وأبلغ من الحجم ما مقداره كذا وكذا ..
لحظة بروح أشوف لقيماتي ..
فاصل ونواصل :
يقولون إن التكنولوجيا داهمت حياة الإنسان مداهمة غير طبيعية واستولت على كيانه .. وصار ما عاد يقوم ولا يجلس إلا بالتكنولوجيا .. وإذا الواحد قام يحوس بغرفته يدور له قلم ضايع .. وإلا مفتاح .. وإلا قطعة شوكولاتة موزيها عن البزران عشان يبلعها لحاله وما لقاها .. يقولون .. ترى يقولون ـ والعهدة على الراوي ـ إنه يفتح النت ويبحث في قوقل !!
ويقولون بعد إن الأقلام والقراطيس .. ستندثر عما قريب .. ليحل محلها الجوال .. والأزواج بيصيرون يسجلون مقاضي حريمهم في جوالاتهم .. بس المصيبة لو ينتهي شحن بطارية الجوال في السوق !! .. وش السوات ؟ <<< احترت هنا مدري هي بالتاء المربوطة وإلا التاء المفتوحة !!
<<< وتبين تتركين [ الجدية ] .. ما كو أمل ..
هذا آخر ما وصلنا من أخبار عن التكنولوجيا .. من وكالة [ يقولون ] ..
وتراهم يقولون : إن وكالة يقولون وكالة أنباء كاذبة <<< هذا كلام الشيخ سعيد بن مسفر حفظه الله .. يعني لو أحد نقل لكم خبر وسألتوه : من قال ؟ ورد عليكم : يقولونه .. أدروا إنه كذاب .. فلازم يجيب المصدر عشان تتحققون من صحة الخبر .
،
،
،
،
،
،
،
نرجع لمحور حديثنا ..
أبشركم لقيماتي ما احترقت .. بس فيه وحدة ما ضبطت طالعٍ لها رآس وفيه ثنتين متلاصقات :
المهم .. أنا قعدت أفكر وأفكر وأفكر .. ثلاث مرات .. ورجعت بي الذكرى كم شهر ورى .. تذكرت يوم أكلم دفا المشاعر وتهزأني وتقول ليه أنتِ ما تضحكين في المنتدى ؟! ..
وتذكرت يوم أمزح مع العضو الفلاني ويزعل .. ويوم أستهبل مع العضوة الفلانية وتزعل .. مشكلتي إني أمزح وأستهبل .. ثم أقول خلاص بس يكفي !! <<< ماش ما تعودت .
المهم أخيراً وليس آخراً .. قررت ما يلي :
* كتابة جميع مواضيعي بلون واحد وعدم التنسيق .. <<< يا ملحي يوم أنا باالمدرسة .. [ المقلمة ] مليانة أشكال وألوان من الأقلام .. ودفتري حديقة غناء .. منسق ومسطر .. وعليه ملصقات ورد .. واستانس إذا قالت لي الأستاذة / أشكركـ على الترتيب .
* إستبدال [ كـ ] بـ [ ك ] ... يقولون ما يستخدمها إلا الرسميون والرسميات .
* أبدأ موضوعي بـ [ هههههههههههههه ] واختمه بـ [ هههههههههههههههههاي ] .. وما فيه أي مشكلة أسجل ضحكتي وأنزلها كـ رد .. من باب التجديد .. بس تراني أخلي مسئوليتي لو سألت وقلت وين العضو الفلاني ؟ وقالوا : يطلبكـ البيحة .. أو سألت وقلت : وين العضوة الفلانية : وقالوا : بشهار !!
* في جميع ردودي لازم الضحكة ما تفارق مخيلة كيبوردي .. حتى لو إنه موضوع خاطرة حزينة .. عشان يقولون : ما شاء الله عليها .. بالها وسيع ودايم بشوشة . <<< يعني مرحة .. لا أحد يفهم إن لي شوشة !!
* ينبغي أن أتعلم أين أضع الأيقونة المناسبة في مكانها المناسب ؟
* عدم الدقة في الكتابة اللغوية والنحوية والإملائية . مثال : بدل ما أكتب [ لا أحد ] أكتب [ لحد ] .. وبدل ما أكتب : [ ما أدري ] أكتب [ مدري ] .. وبدل ما أكتب التنوين [ ٍ ] نكتبه : نون .. مثال : [ حالاً ] أصير أكتبها : [ حالن ]
* محاولة استخدام بعض العبارات المشهورة والتي يتم تداولها في قسم الغربلة كـ : [ ماش / علامكـ / بنيخي <<< الله يغربل عدوكـ يا ابن ضاوي .. شبكت الحروف وغيرت المعنى .. [ بنيخي : ابن أخي ] <<< للترجمة فقط ] .
* منافسة كوتو موتو وعطر طيبة في المقالب .. ويا أنطرد .. يا أتشوت !!
أنتهى كلامي رحمني الله وعفا عني .
،
،
،
ملاحظة / لحد يشره علي لأني صايمة .. <<< سلامات أول مرة تصومين !
ملاحظة ثانية / ما نسقت موضوعي وذلكـ تطبيقاً للشروط اللي اشترطتها على روحي .
ملاحظة ثالثة / لحد يقط معاي الميانة ويمزح على طول .. ترى بزعل .. خلوني أتدرب شوي شوي .
ملاحظة أخيرة / هذا الموضوع كُتب لعيون أمل بنت عبد العزيز .
،
،
،
،
،
،
،
،
وتفضلوا حياكم الله .. بروح أفطر أذن عندنا .. وعلى جميع الأعضاء مراعاة فارق التوقيت :
رد مع اقتباس
[/img]
[/mark]
