مشكور يا بايع مشاعرك مشكور
...................العام ذنب وهالسنة ذنْب ثاني
وش عاد أقول ولا بقى شيّ مستور ؟
...............ما طعتني يوم إبتسم لي زماني
لا تعتذر لو خاطري منك مكسور
.....................لا تفتكرني دام قلبك نساني
لا لا تقول إنّ الليالي لها دور
............شف من هو اللّي كان فينا .. أناني
مدري تصنّعت الغلا زور في زور
..............مدري أنا اللّي حيْل كنت إمتفاني
مثل العمى .. ما تنفعه طلعة النور
..................... النور بعيون العمى ما يباني
عندي خبر لو جاك من يمّي قصور
..................لا آقول أنا مخطي وربّي جزاني
لو شفتني قاسي عليك .. إنت معذور
..........شفني من أوّل جرح .. لا زلت أعاني
أنا بشر مثلك .. لي إحساس وشعور
................و أغتاظ لا مسّ الكلام .. بكياني
حتى وأنا في قمّة الغيظ مقهور
.................بعض الحكي عيّا يقوله لساني
بقولها لو قلت لي صابك غرور
................ما فيه أحد .. ياخذ بقلبك مكاني
العام قلبي فيك هايم ومجبور
..................العام لا منّي جفيتك .. عصاني
واليوم حبّك في حناياه مقبور
..................لو ما دعيته للمفارَق .. دَعاني
ذاك الهوى ما عاد لك فيه مقدور
.................أبعَد من أيّام الرشي والسواني
ما دمت راضي عن عذابي ومسرور
................ملعون أبو قلبٍ .. عليك يحداني