هاك ذكراك من ذكراك ويش أستفيد
.......................كافي أن المشاعر هايمه كلها
ودي انساك والنسيان ماهو اكيد
...............كيف ابنسى عيون(ن) رمشها ظلها
من هك اليوم وانت اللي بعيني وحيد
........................ماخبرت العيون تمل من خلها
مير نفسي عزيزه وانت رايك عنيد
..........................والنفوس العزيزه ماتبي ذلها
ليه تعطيني الدافع واقول القصيد
........................ليه صفحه غرامي ترجع تفلها
ليه ترجع على الماضي تزيد وتعيد
......................وانت من عام الاول عاجز تحلها
مابرى الجرح الاول كيف يبرى الجديد
....................شوف حالي نزيف جروحها سلها
كل ماشفت لك ذكرى وربي شهيد
............................كن نزاع روحي بالخفا تلها
اندفعت لغرامك يالغزال الفريد
...........................والغلا له دروب خاطري دلها
فرحتي بالقا رغم انها ماتفيد
...........................فرحه القاع لامن المطر بلها
وش بقى يالسراب اللي قريب(ن) بعيد
...........................المحبه وراحت وانتهى حلها
لو كل بكيفه ياخذ اللي يريد
..................كان ماشفت ناس تموت في غلها
هاك فرقاك خذها خل قلبك شديد
...........................خلها ماشيه بحمولها خلها
كل مازاد تعذيبك ذنوبك تزيد
..........................الله اعلم صلاتك باطله كلها