جابتني الذكرى على الماضي كتاف
...........................سجيت كني توني مكتشفها
سرى بي الهاجس ومريت الاطراف
...........................دوجت حول الساعتين بطرفها
نعم تذكرت الزمان الذي طاف
...........................غديت مثل اللي عيونه طرفها
لي في غرام(ن) فات كلمه وميقاف
...........................لولا خفوقي هام بك ما وقفها
اول غيابك قلت انا مابي خلاف
.........................واليوم شف حالي غيابك تلفها
تجهل جروحي ياللي جروحك خفاف
............................معذور لو قلبك جهل ما عرفها
ياليت مجروح الهوى جرحه يشاف
...........................لقول قرب من جروحك وشفها
شفها بعينك كانك من الله تخاف
.............................وحاول تصلح غلطتن مقترفها
العمر لامنه خلا منك ينعاف
............................في حال والا حال غير تعرفها
قدام عينك لو تطلعت وخلاف
.......................تلقى الخفايا خاطري لك كشفها
خايف ومن مثلي معه حق لو خاف
............................تبعد ونفسي ماتحقق هدفها
ماللهوى عندك مواثيق وانصاف
..................................ماكنه الا لعبتن محترفها
اليوم لو ذكراك ترجع بي خلاف
.............................محبتك سيل التهايم جرفها