يالعقااااب


يالعقاب اللي على المشراف وسـع لـي ترانـي
ضايق (ن) من عاما الاول وادهله قبلـك وادلـه
يوم ربي قد كساك بريش وش لك فـي مكانـي
ماتخـاف مـن العقوبـه يـوم تاتيـه وتحـلـه
دام لك جنحـان وش تبقـي بمشـراف البيانـي
خل مشراف الفقيـر اللـي بـلا جنحـان خلـه
ذا مكاني يوم رمح الغـدر مـن حـره زوانـي
مـا لختالـي علـي حجـه وانـا سلـه ودلـه
وهو علـى ماقيـل شماعـة همومـي لابلانـي
صاحب(ن) ياكل يديه وهو على مذهـب وملـه
وهو ملاذي عقب خالقنا جميـع الـى ضوانـي
ظيقـة فالصـدر ولا جاتنـي للـدمـع خـلـه
لابديتـه ماحسـد راع التـرف واهـل المبانـي
يحسبون ان فرقهـم واضـح علـي واقـول لله
سجة في راس مشرافي وانا اغطرف الاغانـي
والله انها في عيونـي عـن ميـة فنـدق وفلـه
فيه احس اني على احسن حال واني شخص ثاني
واتحلـل مـن حـرام الهـم لاجينـه واحـلـه
وذا مكاني عقب ماصبري على كبـدي كوانـي
والله ان كني عقـب فرقـاه بيـن كفـوف ملـه
واحد(ن) زله حشـاي ومسكنـه بيـن المحانـي
مسكنـه بيـن المحانـي والحشـا والصدرزلـه
قلتها له قبل لا وقتـي علـى الشعـر يحدانـي
خايـف مالله يتمـم واعـرف ان فـلان عـلـه
قال خل اشكوكك اللي تتـرك الـراوي ظمانـي
مايصيبك فـي جبينـك مـن خلقـك الله تشلـه
قلت ذا والله بلاي واشـوف وش مـدة زمانـي
لايكون اللي كتب لي (فارقه مـن غيـر زلـه)
لا تضيق مـن التشـاؤم واحتمـالات الأ نانـي
خايف(ن) اشرب بعد كاس النصر كاس المذلـه
قال وش تبغي بحكـي الحـزن والدنيـا فهانـي
لاتعيشنـا زمـان الحـزن قبـل يحـل حـلـه
قلت ماتـدري وانـا الـداري بعاقبـة التمانـي
غير عاهدنـي وريحنـي واشـل الحـزن كلـه
قال شفت الموت لو بيدي ماهـو كفـو لخذانـي
بس لاتشره علي لـو لبسونـي غصـب حلـه
قلت اجل وانا وفاي من الجـدي حتـى اليمانـي
مرتضـي غيـرك ولااظنـه ولاظـنـي لابالله
قال اجل سلم على روحـك وانـا كلـي تهانـي
يـوم عرسـك والله ان اهـل مجدولـي وافلـه
وراحت اسنين التلاقي مشيهـا مشـي الثوانـي
مـادرى عـن حبنـا الا ظـل محبوبـه وظلـه
غير حـول يالعقـاب وخـل مشرافـي ترانـي
ظايق(ن) من عاما الاول وادهلـه قبلـك وادلـه
قلتها ماقصـدي انـه يقـال صـح الله لسانـي
قلتهـا لعيـون مـن سبـب كتابتـهـا لعـلـه