كرة قدم حريمى ( ماتش طويييييييل ورزل أنا حذرتكم )
أنا حذرتكم من الأول ( الماتش طوييييييييل أوعوا تزهقوا )
**************************
سيداتى أنساتى ساداتى كابتن ( ميمي حلابسة ) يحييكم من إستاد ( أوعى وشك ) ويسعدنا بل يشرفنا أن ننقل لكم مباراة كرة القدم بين فرقة ( البنات الهاى كلاس ) وفرقة ( البنات البيئه )
و ( فرقة بنات الهاي كلاس ) بتتكون من :
* لحراسة المرمى ( ماهيتاب ) وبالمناسبة يا جماعه ماهيتاب خريجة فنون جميلة رسامة يعنى طول النهار ماسكة الفرشة وعمالة ترسم علي ( وشها ) شوية أحمر فوق المناخير وشوية أخضر تحت الحواجب وبالليل تنزل الشارع ( ترسم علي الرجالة )
* وفى الدفاع ( لولا ) ودى بقي يا جماعه دكتورة عيون تخصص (ننى )
و ( هايدي )ودى بقي 4سنين نهائى كليه طب ومش عارفه تاخد الشهادة قال إيه بتنكسف
( أصلها في كلية طب تخصص مسالك بوليه )
* وفى الهجوم ( سوزى ) و ( نانسي ) ودول بقي فاضيين و مقضينها موبايلات .
وزى ما إحنا شايفين إن الفرقة ما فيهاش خط وسط لأن فكر المدير الفنى لفرقة البنات الهاى كلاس ( كابتن هانى واوا ) إن منطقة ( الوسط ) منطقه ممنوعه رقابيآ وما ينفعش نلعب فيها علشان اللعب فيها ( بيعمل قلق )
********************
أما ( فرقة البنات البيئة ) فبسم الله ما شاء الله اللهم لاحسد بتتكون من :
لحراسة المرمى ( نحمده ) 15 سنة أشغال شاقة
خط الضهر ( عطيات ) و ( عدلات ) 13 جنحه و4 جنايات
وخط الوسط ( سنية ) و ( فوزية ) 7 سنين سرقه بالإكراه
وزى ما إحنا شايفين إن فكر المدير الفنى لفرقة البنات الهاى كلاس ( الكابتن هانى واوا ) بيختلف تمامآ عن فكر المدير الفنى لفرقة البنات البيئة ( الكابتن سيد سنجة ) واللى بيعتمد علي ( منطقه الوسط ) إعتماد كلى لآن فى إعتقاده إن ( منطقة الوسط ) هى منطقة التحضير واللى فيها اللعب كله ( وبتجيب من الأخر )
*********************
وبيحكم اللقاء الحكم الدولى ( وائل كلبشة ) من مديرية امن الجيزة
*********************
ونبدأ مع بعض اللقاء وضربة البداية مع سوزى00سوزى مررت الكورة لنانسي دخلت عليها فوزية 00فوزية قطعت الكورة من نانسي00نانسي قعدت تعيط إزاى فوزية تقطع الكورة منها وصفر الحكم ووقف اللعب ودخل العلاج الطبيعى لنانسي وإداها (كلينكس) علشان تمسح دموعها00!!ومرة تانية الكورة مع فوزية00فوزية لعبتها عالية لسنية00سنية أخدت الكورة علي صدرها طلعتها من مناخيرها وبعتت (مسا حاير طاير) لنحمده اللى واقفه في الجون زى الأسد00الكورة مع سنية دخلت عليها هايدى00سنية مش عارفه تعدى بالكورة من هايدى00راحت سنية مطلعه (مطواة ) من جيبها و( غزت ) هايدى في جنبها00صفر الحكم وراح مطلع الدفتر( الأحمر ) لسنية لتعمدها الخشونة في اللعب وعملها قضية وجت عربية البوكس أخدت سنية علي السجن00 وجت عربية الأسعاف أخدت هايدي علي المستشفي وخدولها جنبها (غرزتين ) 00وإنتهزت سوزى فترة توقف اللعب وطلعت من جيبها ( المراية وصباع الروج والمسكرة والآى لينر ) وقعدت تظبط الميك آب بتاعها 00 والفرقتين دلوقتى هايلعبوا ناقصين
الكورة مع سوزى دخلت عليها فوزية قطعت الكورة منها00لعبتها لعدلات00دخلت عليها نانسي00عدلات ( إتحزمت ) ورقصت نانسي وعدت عدلات منها ولعبتها علي جنب لعطيات00عطيات عندها لمباجو وجنبها بيوجعها ما عرفتش تستلم الكورة كويس وتطلع منها رمية تماس00لولا هاتلعب رمية التماس00لولا ( لبست الجوانت) علشان إيديها ما تتوسخش من الكورة 00ولعبتها بسرعه لسوزى00دخلت عليها عدلات00عدلات ثبتت سوزى ( بالسنجة )00 وأخدت منها الكورة00سوزى طلعت الموبايل وعملت ( ميسد كول ) لماهيتاب اللى كانت واقفة تغمز بعينها للحكم ومش واخده بالها من الماتش00عدلات معاها الكورة ورايحه ناحية الجون دخلت عليها لولا00عدلات شخطط فيها00لولا إتخضت وعدلات إنفردت بالجون وشاطت شوطة جامدة جت الكورة في وش ماهيتاب وأغمى عليها والكورة دخلت جون00وصفر الحكم معلنآ الهدف الأول( لفرقة البنات البيئة) ولكن( فرقة البنات البيئه) إعترضوا علي الحكم لأنهم عايزين يحسبوا الجون ده ( بأتنين )
ماهيتاب حارس مرمى فرقة البنات الهاى كلاس لسه مغمى عليها00جت نحمده من أخر الملعب بكل أخلاق رياضيه ومعاها (فحل بصل) وفوقت ماهيتاب من حالة الأغماء بس دخلتها في حالة ( توهان )00 وخلتها في ( البلالا )00الكورة دلوقتى مع نانسي00لعبتها لسوزى00دخلت عليها عطيات مسكت سوزى من شعرها 00مرمطت بيها أرض الملعب00صفر الحكم فاول علي عطيات وطلعلها( الدفتر الأصفر وعملها محضر )00والكورة فاول00ولولا هاتشوط الفاول00لولاحطت الكورة علي الأرض ( وعقمتها كويس هههههه دكتورة بقي يا جماعه ) وشاطت لولا شوطة جامده في المقص محرزة هدف التعادل00
طلعت عطيات وفوزيه وعدلات ( المطاوى ) وطلعوا يجروا ورا نحمده حارس المرمى بتاعهم لأن نحمده كانت السبب في التعادل لأنها كانت قاعده جنب عارضة الجون ( بتعمل محشي وبتنضف فراخ )00وصفر الحكم والغي المباراة ولم لعيبة ( فرقة البنات البيئة بمدربهم ) وراح مكلبشهم وعملهم كلهم ( محضر تحرى )00
وإنتهت المباراة
************* ************* ************* *************
إيه الموضوع الطويل قوى ده أما إنك عضو رزل صحيح وبايخ إحنا فاضيين نقرا ده كله ههههههه
( يا جماعه اللى يشتم يشتم في سره هههههههههه)
************* ************* ************* ***********
