صورة مع التحية ل.... ( شاعر المليون ) !!
[poem=font="Simplified Arabic,6,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
ياقصيدي اقضب القاع ... نوّخ للذلول = الركادة ياقصيدي تراها راس مال
والله إني ماخبرتك على رزقك عجول = وش علامك تلكز الضلع وتخج الوصال
الهدا وابشر بعزك إذا حان المثول= شاعْرَك وانت إتْخَبَرني مشاريبه زلال
مايقلّد شعر غيره وْلاهو بالنطول = إنْ عطى يعطي السمينة وصيداته جزال
شاعْرَك لاهو منافق ولاهو بالجفول = تنحني له ألف قمة ويقْصِر ألف جال
ياقصيدي صح شاعرك رجّالٍ كسول = ماضرى لمزاحم الناس في قيلٍ وقال
وْلايقول إلا لأنه يبي فعلا يقول = ولايغنّي لجل الأسياد مرهين الشوال
يوم بعض الناس يملا من لسانه عْدول = ويفتدي لرضا شيوخه عمامه والخوال
وإيتنازل عن مباديه حباًّ بالوصول = والمصالح لعن أبوها ضريبتها ذْلال
وينكسر بيدين سِيْده مثل بنت ٍ خجول = ينحني وإيقبّل الكف وإيبوس النعال
ياكثر ماقال الأصحاب تكفى يامْهَشول = سابق الشّعّار وامدح صناديد الريال
دسّم الشارب بالأنعام لاتسمع عذول = مثل غيرك لاتشيّم ترى الدنيا سجال
كبّر اللقمة وخلّك بها الساحة أكول = الفرص ماكل يومٍ تجي لك بالمنال
مادروا إني مشاكس ولي رايٍ صمول = لاتغيّرني مكانة ولا حاجة لمال
المشاعر قطعة الروح مافيها ميول = المشاعر عند الأجواد أغلى مْن الحلال
وكان هذا من عيوبي فأنا ماني زعول = وكان هذا من خبالي فأنا كلي خبال
ياقصيدي شاعْرَك غير وإنْ قالوا جهول = شاعرك مايلمس القاع إلا بابتهال
ياقصيدي شاعرك غير لو قالوا ملول = مالغير الله يركع ويخضع بالسؤال
كم شرب من مر الأيام في شتى الفصول = وكم شكى طعن المآسي وغارات الليال
وكم تحدّتْه المسافات في عرضٍ وطول = وياكثر ماهو تحمّل من همومٍ ثقال
إنولد في سهلة البرد وبصحرا الذبول = في زمان السيد الجوع والحاكم ريال !
أرضعته أمه شقاها وغذّته النحول = وإنفخت من روحها فيه من لطع الخْلال
شد عوده وابتدت فيه نظرات الفضول = وقام يسأل عن أمورٍ لها ألف احتمال
جاوبنّه سود الأيام وأشّر بالقبول = وسل سيفه للمناطح وهاجر للشمال
وابتدت رحلة عذابه على دق الطبول = ياقصيدي شاعْرَك عاش عمره بالنكال
كان في عمر الطفولة شبيهٍ بالكهول = ماعرف معنى الهدية ولا لمسة دلال
مالقى بالبيت غرفة ولاسقفٍ يحول = بينه وبين أشهب البرد وهْبوب الرمال
ياكثر ماغرّق الماء فراشه بالسيول = وياكثر مااحترقت إيديه من شمس الزوال
وكم كتب درسه على الشمع أوقمرًا أفول = ياكثر ماهي تخونه الياشدّت رحال
وياكثر مابل ريقه بدمعات الذهول = وياكثر مابح صوته ولاأحدٍ فيه سال
وياكثر مانام واقف وبالحزن إمغيول = وياكثر مافش خلقه على كومة رمال
وياكثر مايدعس الشوك حافي بلا نعول = كل شوكة في حياته لها صرخة لحال
الطفل باسه خرافي وزوماته تهول = كل دمعة خوف صارت تحثه للوصال
اكتسب صبر الرجاجيل وإقدام الفحول = وصار يبني من جروحه مشاريهٍ طوال
ياقصيدي شاعرك غير وإنْ ظلّت عقول = شاعرك مرهف إحساسه وعنده طول بال
شاعرك ماهو فقاعة يجي يوم وتزول = ثابت المبدأ يحاول يقرّب للكمال
شاعرك عنده رسالة ولاعنها عُدول = مايلبّي كل صوتٍ ينادي له تعال
ولايجي مع كل طاري ويتبع كل ضول = يدري إن مراكض الناس ضرب من الهبال
ياقصيدي عم صباحاً ولاترضى الأفول = وإن نخيتك يالصميدع تولّم للنزال
والله إنّي ماأهينك لجل بعض الخبول = دام فيني عرق ينبض وفي صدري خيال
إن هجيت أهجي بلاظلم وأمدح بالأصول = وإن نخيت أنخى حرارٍ صدوقين الفعال
وإن شكيت أشكي الى الله من ثقل الحمول = وإن بكيت أبكي لحالي وأسنّد للجبال
وإن ذكرت أمجاد ربعي فهذا قد يطول = والله إني مااحتويهم ولاحولي مجال
مشبعين الذيب ربعي غزيرين الهطول = ساترين المستجيرة كثيرين الفضال
عزوة الناموس ربعي .. ولايرضى الزعول = مالكين الصف الأول بساحات القتال
لابة الويلان ربعي مضرّين الخيول = للدروب المستحيلة على عُصم الرجال
لامِدَحت عيال وايل ترى ماني عيول = أشهد إن عيال وايل من خيار العيال
شعر \ حمدان سالم العنزي[/poem]
