*أحلى الأيام أيام المدارس *
[align=center]اهلين وسهلين بالأحباب الكرام
أيام المدرسة ياحبايبي أحلى الأيام مافيه هموم ولا مشاكل
إلا أيام الاختبارات بس
نصحي الصبح بعد ساعات من المعارك والهواش والتلعين
(الله ياخذ المدارس)
وكلنا عارفين الدعاء إذا جاء المطر
(اللهم زد وبارك وهدم المدارس)
طبعا الكره بين الطالب والمدرسة من قديم الزمان
كنا نجي للمدرسة والواحد نفسه براس خشمه ماله خلق
وأكيد متأخر لازم يجيك كم عصا على الطاير
بس اللي يخلي الواحد يجي للمدرسة هم الزملاء والأصحاب
والاستهبال اللي يصير في الفصل
خاصة إذا كان مدرس الحصة دلخ ماعندك احد
تكون أحلى حصة وخاصة إذا كانت حصة الجغرافيا
نقعد آخر الفصل وخذ فصفص وسوا ليف
وكان المدرس يترجى إننا نسكت وننتبه للدرس
بس مافيه احد معطيه وجه
وكان يتحمس في الشرح ويقوم واحد من الطلاب
ويقوله تراك أشغلتنا الواحد مايعرف يرتاح في الفصل
بعدين المدرس المسكين تصيبه صدمه وما يقدر يسيطر على الفصل
وزي ماانتم عارفين الحصة الأولى يكون الواحد ماله خلق يضحك
ولا يتحرك
وبعدين يجي درس الانجليزي هذي هي الفسحة بالنسبة لنا
-ماعرفنا نتكلم عربي جالسين يدرسوننا انجليزي بعد-
يدخل الاستاذ ويقول (قدمورننق) وحنا من العناد نرد
وعليكم السلام ويرد علينا (بالمصري)
إنتو ماراحشي تتعلمو أبدا دنتو تيوس
ويقوم واحد ويرد عليه ويقول :
اجل أنت العنز استاد
ويطيح الفصل من الضحك وعاد المصري يقول:
كرامتي دنا إتهزأت
وحنا ضحك وتصفيرورجه
وتجي حصة التوحيد هذي أكسل حصة ولا تنهضم ولا بفلاش
بسبب المدرس لازم مطوع وهدوء وكل الكلام لغة عربية فصحى
ولا احد يقدر يتكلم ولايستهبل
ويبدأ النوم يسيطر على الموقف الواحد من الكسل فاتح عين
ومغمض العين الثانية إحباط
وإذا خلصت الحصة نسجد سجود الشكر من الفرحة
بعدين تجي الفسحة ويالله طابور عند المقصف وزحمة
وروائح الله بها عليم تحوم الكبد
ونقعد نفطر ونتقهوى وتخلص الفسحة ويرن الدرس
ويجي المراقب معه عصا (خيزرانة) طوله
وخذ جلد وضرب من زود الحماس اللي فيه يبدأ يضرب بالعقال
ندخل الفصل تبدأ حصة الأدب والنصوص وأدلخ واحد
في المادة أنا مااعرف أحفظ القصايد والله ادرسها كل الليل
بس مافيه فايدة
يدخل الاستاذ يالله اللي مو حافظ يقوم واقف
طبعا من الغباء انك تقوم بسرعة لأنه يمكن مايسَمع وتسلم الجرة
بس إذا كانت ماسكه معاه تسميع الله يعين اللي مو حافظ وجالس
راح في خرايطها
يقومني الاستاد ويقول يالله سمَع احاول اجمع القصيدة في راسي
التفت حولي انتظر احد يغششني أو ينزل علي وحي بس مافيه
جواب استسلم للأمر الواقع وأقول (ماحفظت استاد)
ويوقفني الدرس كله وقبل مايطلع يجيب العصا وافتح يدينك
وست ضربات حتى تتبنج إيدي من الضرب
وما اقدر أصيح أو اصرخ لأنه عيب وإذا شبع من الضرب
طلع من الفصل.
وفي الحصص الأخيرة لازم نسوي
(قيلولة الصباح)
هذا من أهم الواجبات عندي نوم حتى تجي الطلعة
ونفل من المدرسة الواحد مايقدر يشيل روحه من التعب
بس والله الطلعة لها طعم خاص
تطلع تشوف تفحيط خاصة إذا كان فيه عيال حلوين
وتشوف هوشات ومضاربات يعني أفلام إكشن
أو نروح عند مدرسة البنات ونستمتع بالمشاهدة خاصة إذا كان
الجو فيه هواء
آآآه والله الواحد إذا تذكر أيام المدرسة إنه يجيه الصياح
ذكريات جميلة أما الحين كسل وضياع
وعلى طاري المدارس كنا وحنا صغيرين
إذا سألنا الواحد وش ودك تصير إذا كبرت(وش حلمك)؟؟
كنت أرد :طيار أو دكتور مالت علي
الحين أتمنى أصير حارس أمن في مستشفى ما أقدر
بس الشكوى لله
*والحين أيها الشعب الكريم أبغى منكم تتذكرون بعض المواقف
اللي صارت معكم في المدرسة ويا ليت تقولونها لي حتى نضحك
كان معكم مستر
**المــــــــــسافــــــــ ــــــــــــــــر**[/align]
