زواج الاقارب وليه الرفض ؟؟

السلام عليكم
بعد فتره طويله عن لمنتدى بسب انشغالي بزواج اختي والان اعود
وانا منهلك وتعبان من شيء في خاطري
وهو ليش بنت خالتي رفضتني ليه هي احسن مني
والله حزت بنفسي وكان ودي اموت ولا يجي ذا اليوم اللي مديت فيه يدي لها ولاهلها وقت الحاجة
وبرغم من ذا كله ان عمي بعد ماهو موافق وقايل بنتي ماتستاهل غير مهندس ولا دكتور؟
وترفضني وتقول انا ماحب اتزوج واحد من العايله وانا لو بتزوج بتزوج واحد بطران
لو كان جاملت وقالت انا مابي اتزوج اللحين لاني صغيره مو بأحسن من جوابها هذا
برغم اني متوضف وراتبي والحمدالله يشد عايله وعندي شقه وش السبب في رفضها
نفسي اعرف؟؟؟
لكن ابي منكم توضحون وخاصة البنات ليه ماتتزوجون من الاقارب مع انه احسن الاقربون اولا بالمعروف؟؟

الف مبروووووك زواج اختك ,, وعقبالك

بالنسبة لي كنت من اشد الناس معارضة على زواج الاقارب ,, اذا تسأل ليش؟؟

مو لسبب معين ولكن على المثل اللي يقول ( في البعد سعد ) ويمكن القريب مايقدر زوجته في هالحاله

وصراحه انا مااقدر اطول اكثر من كذا لإني صرت الحين مخطوبه لولد خالتي ..

سبحان الله كل شئ نصيب ...

وانت لاتخاف لابد تلقى زوجة المستقبل...

عسى أن تكره شي ويجعل الله فيه خيرا كثيرا لك


لكل منا وجهة نظر حول زواج الأقارب


وأنا مع البعد

للبعد فوائد أكثر من زواج الأقارب

منها البعد عن الأمراض الوراثيه

زيادة الصله مع المجتمع في أختلاف الإنساب وتواصلهم عن طريق الزواج

أذا لو كل واحد تزوج من قريبته لما تعارفنا كمجتمع مسلم ولا ماتواصلنا لأن كل عائله ستحيط نفسها بأقاربها وتغلق على نفسها

أذا وقع خلاف بين الأزواج فأن وقعه من البعيد أهون من القريب

لأن القريب لن يطلق أن وصل الأمر لطلاق وهذا بحجة مخافته على مشاعر أقاربه من أهل الزوجه 00خاله0أو عمه00أو عم00أو خال 00والضحيه هنا الزوجه التي ستعيش بين نارين

نار الزوج الذي سيظهر الكبت داخل منزله وعليها

وبين نار القرابه التي يستظلون بها

ولكل قاعده شواذ لكنني أنظر الى الأعم

ولا تحزن سيعوضك الله خيرا

أخي الفاضل: الفضي..

زواج الأقارب مثله مثل أي زواج أخر به ايجابيات وسلبيات..

الايجابيات: تظل رابطة الدم من أقوى الروابط وسوف يحافظ عليها ويحترمها مهما كان

وكذلك تقوية العلاقات الأسرية إذا كانت مبنية على الحكمة والعقل والمعرفة الأكيدة

أن الزواج قسمة ونصيب ومهما حصل بين الازواج يظل الاهل بعيدين..

السلبيات: أحياناً أمراض وراثية ولكن أعتقد الآن بعد الفحص قبل الزواج يمكن أن تتلاشى...

وكذلك يمكن أن يتطور أي خلاف بين الأبناء إى قطع للرحم وتشتت الأسر..

وأخيراً يجب الايمان بأن الزواج قسمة ونصيب وكل شيء مكتوب وميسر من عند الله عزوجل..

دمت بكل الخير والود..

أختك سرررراب

أبي أرد عليك بنفس اللغة التي أستخدمتها في الكاتبة ...





أخوي الفضي حيااك الله بعد هالغيبة .....وبالبركة والرفاء والبنين لأختك ..

اقتباس:

---

لكن ابي منكم توضحون وخاصة البنات ليه ماتتزوجون من الاقارب مع انه احسن الاقربون اولا بالمعروف؟؟

---

عني يعجبني شئ اسمه زواج أقارب (وخاصة أبناء عمومه) ..
يعني لو لقت البنت أنه ولد عمها رجل فيه ما يناسبها وش دعوى ما تقبل فيه ...

مافي ولد عم ...
و خطبها واحد قريب (كأبن الخال أو الخالة ..او العمة ) أو من أبناء العائلة نفسها ..أيضا ..مافي فرق..


المهم تعرفه هي قبل أي احد تكون قريبة منه ومن أخباره.
أما يجيها واحد من خارج معارفها ..وهات يامدح فيه وفي الأخير تنصدم فيه هي وأهلها ..ويالله الخراج منه ..



شوف أخوي الفضي بالنسبة لنا عندنا قاعدة ..
وماهي شرط تكون مقياس لغيري ...

وجه تعرفه ولا وجه تنكره ...


وما ادري ليش في الحقيقة أفضل زواج الأقارب..يمكن هالأسباب تكون دافع ..

1- محافظة على النسب ..
2- إكثار أبناء هذه العائلة ..حيث تبقى متفرعة وتنمو من غير إختلاط فرع ثاني فيها ..

3-القريبة ممكن تغطي على الكثير من عيوب قريبها وهو كذلك ..

شيء أخير ..
لو فرضاً ..تزوجت أجنبي (غير قريب)..ولي ولد عم

لو أشوف زوجي الأجنبي(الغير قريب) يتشاد مع ولد عمي ..وطلبوا فزعتي راح ابيعها وأكون بصف ولد عمي
أجل من الأول وشهوله أوافق على أجنبي ..
8
8
ماعليكم منها (عنصرية موووت)

ولا أحد يجي داعس ومطفي النور ويتفلسف هذا رأيي وحرة فيه :زعلان:

*****


نجي على موضوعك والنقطة المهمة..

اقتباس:

---

وبرغم من ذا كله ان عمي بعد ماهو موافق وقايل بنتي ماتستاهل غير مهندس ولا دكتور؟
وترفضني وتقول انا ماحب اتزوج واحد من العايله وانا لو بتزوج بتزوج واحد بطران
لو كان جاملت وقالت انا مابي اتزوج اللحين لاني صغيره مو بأحسن من جوابها هذا
برغم اني متوضف وراتبي والحمدالله يشد عايله وعندي شقه وش السبب في رفضها
نفسي اعرف؟؟؟

---

أخوي موضوعك ورفضها لك ماهو رفض أجنبي أو قريب..
هم يبون واحد مركز ...وشهادة عالية على حسب ما قرأت من طرحك ..


ثم ولا يهمك الزواج قسمة ونصيب ...وعسى أن تحبوا شيئاً وهو شراً لكم وعسى أن تكرهوا شيئاً وهو خيراً لكم ..


ثق أنه راح يجي يوم تلقى أنك ندمت على التفكير بها ...وليس فقط الأرتباط ..
فالكثير من الرجال يتزوجون من تهواه قلبوهم ولكم ما يالبثوا أن تنقلب عليهم شقاء وتعاسة ..


لعل هناك من تستحق الفضي والفضي يستحقها .فلا تعجل ولا تألم ..وأجعل الخيرة في أمرك دوماً ...






خالص تقديري ..وعقبال ما نبارك لك عبر صفحات غرابيل ..بحول من الله وقوة ..

حياك الله اخوي الفضي مبروك زواج الاخت وعقبالك
الزواج قسمة ونصيب وانا اخوك والف بنت تتمناك=ماكتبه الله
وانا اقول عكس كلامك (زواج من العوائل البعيدة)
===القريب : لاتقربه تأكلك عقاربه0



<<<<<<<< =مثل مجرب واكيد /هذا بالنسبة لي

الفضي ,,



احسن لك ياشيخ .. وتبغى من الاقارب ,, والله ثم والله انك ماتلقى منهم الا اكبر المشاكل ,,..اسال واحد شاف بعيونة انواع المشاكل ,,..

طبعا انا مو متزوج ’,

بس الاقارب عندنا ممنوعين ,,. لانهم غير مناسبين ,،’

اول شي .. عيالك بيجي فيهم عاهات .. ثاني شي .. مافي احترام ,. طبعا كل شوي بستند بابوها لانه قريب ,,،

فهذا شي مزعج .. لي بالذات وخلاني احرم قطعيا من الاقارب .. لانهم ..سموم ..((هذا خاص بالمجتمع الذي اعيشة ))..
اما عن مجتمعاتكم .. فماادري ,, يمكن تكون احلى بكثير من الغريبة ,،




فمن رائي ان تبتعد عن الاقارب ,، لانهم اكبر سموم وسمه يقتل البدن ,،, فالبعد كل البعد عنهم من وجهتي نظري ..


هذا رائي يختص بي شخصيا ولااويد اي احد اتباعه

اخوي الكريم... انا بجاوبكـ بكل صراحه ولاتزعل...

انــــــــا ضد زواج الأقارب نهائيا.. << وجهه نظر شخصيه>>


<< والاقارب عقارب>>

اقتباس:

---

والله حزت بنفسي وكان ودي اموت ولا يجي ذا اليوم اللي مديت فيه يدي لها ولاهلها وقت الحاجة
وبرغم من ذا كله ان عمي بعد ماهو موافق وقايل بنتي ماتستاهل غير مهندس ولا دكتور؟

---

عمكـ... هذا رايه؟؟

اقتباس:

---

وترفضني وتقول انا ماحب اتزوج واحد من العايله وانا لو بتزوج بتزوج واحد بطران
لو كان جاملت وقالت انا مابي اتزوج اللحين لاني صغيره مو بأحسن من جوابها هذا
برغم اني متوضف وراتبي والحمدالله يشد عايله وعندي شقه وش السبب في رفضها
نفسي اعرف؟؟؟

---

احيانا مايكون فيه سبب لرفض البنت من اي رجــــــــــــــل....

اعرف وحده رفضت ولد عمها << فقامت الدنيا وماقعدت>> من جهه عمها وزوجته...

وبعدين.. هل انت بترضى تتزوج انسانه بتشوف نفسها عليكـ....

طيب انت ليش زعلت يوم رفضتكـ؟؟؟

المفروض انكـ تكون واثق من نفسكــ وفيه 100 بنت تتمناكـ

ومين عاااااااااااااارف يمكن تتزوج وحده اجمل وافضل منها بكثير


اعلم << انه الخيره فيما اختار الله لكـ>>

<<<<<<<<<<<<<<<<<<<<<<<<<<<<<<<<<<<صدقني... اسال مجرب ولاتسأل طبيب

يمكن تزعل وتتضايق

لكن نهايتها خير لكـ انشاء الله




تمنياتي لكـ بالتوفيق انشاء الله

اختي رحيل الايام اشكرك على ردك اللي بصراحة
شرحتي فيه صدري والحمد لله انك ماطولتي ولا كان دبلتك واصله
ههههههه امزح
وانشاء الله الف مبروك وعقبالنا

هلا بأختي بنت نجد صحيح كلامك ولكن الافضليه في نظري ان زواج الاقارب احسن بكثير فيمكن البنت اللي باخذها ماتعرف في الحياة الزوجية ولا شيء وبالأخص في بيتها ومطبخها فتتزوج واحد ليل مع نهار يسبها ويسب اهلها
وبنسبه للقريب راح يحترمها ويقدرها لانه عارف انه ماخذها
وفيها هالعيوب وراح يتقبل الوضع بكل سهوله ويحاول يغير من طباعها


سراب اشكرك جداً على ردك المتواضع والمريح للبال

اقتباس:

---

المشاركة الأصلية كتبت بواسطة *أهداب*

فرحتيني بوجودك بصفحتي الحزينه
صحيح كلامك انه بتنخدع فيه هي واهلها وانتي اول بنت تأيد
زواج الاقارب


أخوي الفضي حيااك الله بعد هالغيبة .....وبالبركة والرفاء والبنين لأختك ..

امييييييييين

أما يجيها واحد من خارج معارفها ..وهات يامدح فيه وفي الأخير تنصدم فيه هي وأهلها ..ويالله الخراج منه ..





3-القريبة ممكن تغطي على الكثير من عيوب قريبها وهو كذلك ..
3- هذا هو المطلوب اغطي عليها وتغطي علي عيوبنا


أخوي موضوعك ورفضها لك ماهو رفض أجنبي أو قريب..
هم يبون واحد مركز ...وشهادة عالية على حسب ما قرأت من طرحك ..
واقول بعد صحيح كلامك في نقطة يبون واحد مركز وشهاده عاليه
بس حتنا جامعي ومرتبتي بالوظيفه كل شاب يتمناها بس راح يندمون لاني قبل يومين بس عارف عنها شيء ونادم اني بغيت اخذها وراح يشوفون اللي يستاهل بنتهم صح
وانا اصلاً ندمان على اني فكرت فيها ولو مجرد تفكير فمابالك
اني كل شو وانا اتذكر قول اختي وهي تقول البنت ماتبيك ابتعد عنها احسن وافضل ماتستاهلك ولا عمي لما يقول بنتي ماتاخذ غير مهندس ولا دكتور والنعم بالعم اللي بغيت اخذ بنته واتبها قدام الناس ان هذا هو عمي (حاااااااااااقد)
ثم ولا يهمك الزواج قسمة ونصيب ...وعسى أن تحبوا شيئاً وهو شراً لكم وعسى أن تكرهوا شيئاً وهو خيراً لكم ..


ثق أنه راح يجي يوم تلقى أنك ندمت على التفكير بها ...وليس فقط الأرتباط ..
فالكثير من الرجال يتزوجون من تهواه قلبوهم ولكم ما يالبثوا أن تنقلب عليهم شقاء وتعاسة ..


لعل هناك من تستحق الفضي والفضي يستحقها .فلا تعجل ولا تألم ..وأجعل الخيرة في أمرك دوماً ...






خالص تقديري ..وعقبال ما نبارك لك عبر صفحات غرابيل ..بحول من الله وقوة ..

---

اشكرك من قلبي اهداب

سندهم هلا والله وغلا تو مانورت صفحتي
بس وانت الصادق(زواج من العوائل البعيده احسن)


رمسون حلوه منك نقطة عيالي بيجي فيهم عاهات وبعدين حرام عليك لاتتفاول واقعد معنس في شقتي<<<ياالاهبل هذي الكلمة للبنات
بس من جد اكبر سموم وسمه يقتل البدن واللي هو زواج الاقارب

هلا والله ببنت الشيوخ ولصراحة لم رفضتني قومت الارض وقعدتها تدرين ليه لانه مو من حلاتها وانا مابمدح نفسي
بس بصراحة انا احسن منها بكثير وبسبه لها شايفه حالها مدري على ايش على الجمال ولا شهادة الثانوية اللي معلاقه بالمطبخ ولا بعد طالبه دكتور

اولا الف مبرووووووووووووووووووك زواج اختك وعقبالك ان شالله
اولا على قولتهم الاقارب عقارب
شوف ابضرب لكمثل اذا انفصلو الاقارب اهل هاللي كانو متزوجين وتطلقو بتتوتر العلاقه بينهم وربي انا اعرف ناس اقاربي تقاطعو يمكن حوالي 15 سنه بسبب الطلاق,..................................... ...........
بعدين بنت عمك وخالتك لاتفكر فيهم وربي اا تزوجت انت بينقهروووووووووووووون منك ومن اللي اخترتها وبيقعدون يقارنوووووون بينهم وبين زوجتك............................


بعدين ابعد عن الشر والقريب وغني لوووووووووووووووووووة احسن لك من جهه المشاكل الزوجيه اكيد هي بتقول لاهلهاااااااااا وبعدين تتوتر العلاقه بينكم كشخصين وزوجين قراااااااايب
افضل انك تاخذ وحدة بعيدة اريح لك ولهااااااااا.....
الله يوفقك ويزوجك بنت الحلال
...........................
والرفاء والبنين <<<<<<<<<حبيت انوووووووووة لاهداب ان هالكلمه ماتجووووووووووووووز لانها من كلام اهل الجاهليه......
مع ان اهداب ماشا الله احسها متدينه

هلا نور الكون كلامك كله نور وحكم
واشكرك وانا بصراحة معجب بكل ردودك
وتقبلي فائق تحياتي وشكراً

وعقبال مانسمع خبرك ونقول مبروك

اقتباس:

---

المشاركة الأصلية كتبت بواسطة الفضي

هلا نور الكون كلامك كله نور وحكم
واشكرك وانا بصراحة معجب بكل ردودك
وتقبلي فائق تحياتي وشكراً

وعقبال مانسمع خبرك ونقول مبروك

---

<<<<<<<<<<<<<<الله يخليك تسلم اخووووووووووووووووووووي
هاه عساك نسيت بنات عايلتك ماتفكر تخطب منهم؟؟؟؟؟؟؟؟؟؟؟
مشكووووووووووور اخوي عالدعوة :11oud9: :11oud9:
عقبال مانسمع خبر ملاكك

لكن ابي منكم توضحون وخاصة البنات ليه ماتتزوجون من الاقارب مع انه احسن الاقربون اولا بالمعروف؟؟
ليه ؟
اول الاسباب مثل ماحصلك هذا انت زعلان وماخذ بخاطرك منهم ولو مهم اهل ماكان شرهت عليهم وزعلت
صح ولا مش صح:11ccer:
انا من الناس اللي يرفضون لاني عشت هاالتجربه نوعا ما ::(
زواج الاقارب كله مجاملات وطلايب واتفه سبب يخرب علاقات اسره كامله

وللعلم كونك تؤيد زواج الاقارب مو من قناعه الا من ايمانا التام ان هذا واجب وامر مفروض
زمن التحجير وبنت العم لولد العمى وعدم الخروج عن القبيله ولى وراح بمفهومه هذا
لكن لما نسأل هل تؤيد او ترفض نلقى انفسنا مكانك سر للاسف

هلا والله بضيفه جواهر اعجبني رايك
بس هذا الكلام اللي قاله عمي وبنته ماهو مجامله؟؟؟؟؟؟

مبروك زواج اختك وعقبال مايجيها كتاكيت يسمونك خالووو

رفض عمك وبنته لك يمكن يبون يتجنبون المشاكل لان اتفه الاسباب اللي تصير بين العائلة حتي لو كان عيالهم مايبون يدخلون نفسهم يدخلونهم غصب

فية ثلاثة اخوان متزوجين ببنات عمهم واخو البنات خاطب اخت العيال مده بعدها قال ماعاد ابيها وفك الخطبة (تراها قاهرني لو هو عندي كان دهسته بالسيارة )تدرون ايش سووا اخوان البنت طلقوا زوجاتهم مع ان كل واحد منهم اطفال يعني شوفوا بدال مايطلعون خطاء واحد راحت فية ثلاث عوائل ثانية لو كانوا خواته متزوجين من بعيد وصارت هالمشكلة ماكان صار الطلاق لاكن القسمة والنصيب

واللي صار لك قسمة ونصيب وراح ان شاء الله تلقى احسن منها اما سالفة يبون دكتور لبنتهم اهم شيء الرجال الصالح الخلوق مع اهلة ومع الغير واحتمال يكون عذر عشان المشاكل زي ماقلت اول

تحياتي أخوي

هلا ببسمه من زمان عنك وينك؟؟؟
انشاء الله اصير خال لاني صرت عمي لخمسة وباقي الخال وماعندي غير
اختين وحده تزوجت والثانية صغيره
<<<<<يحكي قصة حياته


المهم:
يمكن على قولتك يبون يتجنبون المشاكل
بس القصة حقتكم تحزززن من يشوف مصيبة غيره تهون عليه مصيبته

وثانكس على اروق رد

يقولون الأقارب عقارب...


صراحة أنا مع من يكن ضد زواج الأقارب..

والسبب فعلا زي ماقالو أكثر الإخوة ..لأتفه سبب ممكن تخرب بيوت عواااايل..

وقد قيل " مروا الأقارب أن يتازوروا ولا يتجاوروا"..فكيف بأن يقتربوا أكثر وأكثر وهو الزواج..

ولنا بمن سلف والقصص التي نسمع خير دليل..

وربما يؤدي أبغض الحلال الى الله_إن حدث_ الى قطيعة رحم كاملة...!!

وياخي على مايقولوا حسِّن النسل...ههههه ...يعني غيِّر...


ولاتنسى أخي : أن الزواج قسمة ونصيب...مهما تفعل وتفعل فلن تأخذ إلا من هي مكتوبة لكـ..


ومبروووكـ زواج أختكـ وعقبالكـ...



تحياتي لكـ...



*
**

،،،جريح الوقت،،،