++عيطموسٍ في غنجها تستحلك يالحرام++
أســــــــــــــعد الله مساءكم بالخيـــر
عودة بعد انقطاع
بما نرجو ان يعانق أذواقكم
[poem=font="Arial,5,purple,normal,normal" bkcolor="silver" bkimage="" border="none,5,deeppink" type=2 line=0 align=center use=ex num="0,black"]
ذابت اعروق المحبه بين رجوى وانتقام= ولاحت الدمعه بعين اللي على الشده عنيد
واختلج ف الصدر ونة عاشقٍ عشقه هيام= ماسمع به ياغناتي غير معبودٍ مجيد
ياربيع العمر قالوا العرب كثر الكلام= يجرح العاشق اسواتي والحكي ماهو يفيد
ضاعت أيامي وشابت كل شعره ف الغلام = وأنت لاهي مادريت العمر تاليته يبيد
أتغنى في وصالك خمسة أعوامٍ وعام = والعمر يدرج سرقني تايهٍ فكري بليد
وش تبين أكثر من اللي ساقلك كاس الغرام = بين جمع امن العذارى ثاني العيد السعيد
وش تبين أكثر امن اللي ضاع ف الدنيا وهام = ماله الا الذكريات وحب مخلوقٍ وحيد
وش تبين أكثر امن اللي أفطر بيوم الصيام = يوم شافك من أهباله يحسبن اليوم عيد
واحتملت الشرهه اللي شالها اعزازٍ اكرام = مادروا عن جرح قلبن يِشتكي منه الوريد
جيتلك والقلب فيه امن المحبه والوئام = أرتجي نظرة اعيونٍ رمشها الساهي يبيد
رمش عينٍ لا لمحته عسكرٍ تضرب سلام= ساحر أهدابه يحالي عسكرن شافوا عقيد
عيطموسٍ في غنجها تستحلك يالحرام=تستبيحك بالدلال وتنتهج نهجٍ جديد
عود موزٍ مال غصنه بين كبر واحترام = فيه خفه مع رزانة صاحب الراي السديد
في عيونه طيش جاهل وبه رهبة امام = به جنون العقل يسري ليا سمع القصيد
ومدلهم الليل يسري فوق متنه مايظام = ينعش القلب المولع لا لمحته من بعيد
لا اقبلت مثل الغزال ولا ادبرت مثل الحمام = والبلا وان كان قفت قلت ياليته يعيد
عاشقٍ فيه السراب وعاشقٍ فيه الغمام = يسلتذ بطعن قلبن مانوى عنها يحيد
خلها بيني وبينك لا تمادى ف الخصام = لا تمادى في عذابك لا يجي راسك عنيد
زانك الله في عيون المستصيب المستهام = وصاغ لك نزف الحنايا فوق لوحن من جليد
كل ماهبت هبوبك قلت يالله ياسلام = مرحباً وأهلا هلابك عِد مامال الجريد
لو كتبت البحر كله ماوفيتك بالتمام = البحر ينقص وزينك كل ماشفته يزيد
الحلا فيك امتساوي جل معبود الانام = أكبر اعيوبك غديتي لسيد الخفرات سيد
غطرفي له ياقصيده وانزعي عنه اللثام = خلي اجروح الهواوي من طعونه تستزيد
ايه أحبك وانت تدري عن غرامي يامدام = مااستحي من قول أحبك واعلم ان الله شهيد[/poem]
