أمســـــــــــكوا ســــــــرايلكم .... وشدوهااااا بالحيــــــل ؟؟؟ لأن
[align=center]يوم جمعه وماعندي دوام وعزوبي, ويوم الجمعه عندي هو يوم النظافه
قمت الصبح بدري انظف الشقه الله واكبر عاد يالشقه ماغير غريفه وبلكونه وفي الدور الثالث
وغسلت المواعين ( كلها صحنين ) وغسلت ثوبي وسروال السنه وانشرهم على حبل في البلكونه
وانا احط راسي اخذ لي غفوه قبل صلاه الجمعه
قمت استعد للصلاه واكوي شماغي وافتح البلكونه ابي اجيب الثوب من على حبل الغسيل اكويه لقيت الثوب والسروال مالقيته هقوتي انه طار مع الهوا ويتكدر خاطري
شي صعب انك تفقد غالي وعزيز عليك وخاصه اذا كان سروال لك معه عشره وكاتم سرك
وسروالي اللي طاح غالي عندي بالحيل له معي يجي فوق العشرة اشهر سروال ابو بطه الأصلي
واناظر مع البلكونه مادري وين طاح هو طاح في حوش بيت بن طخيس ولا في حوش بيت بن قعيس
المشكله هالحين ماعندي سروال سنه غيره بس عندي سروال اخر طويل سروال بجامه اللي انا لابسه ولونه بني غامق على اخضر و شاريه من العام والصراحه كان سروال عادي لونه ابيض بس يوم تغير لونه غيرت اسمه لسروال بجامه
وانا البس ثوبي فوق سروال البجامه وانزل واطق الباب على بن طخيس واساله عن سروالي طاح يمكن طاح في حوش بيته ويدور وماحصله على كلامه
وادرعم على بيت بن قعيس واسأله عن السروال ويدور وماحصله
انا بصراحه شاك ان واحد من هالشيبان طامع بالسروال سروال من النوع الطيب ابوبطه ومغسول اكيد بينطمع فيه
واجلس في راس الشارع اراقب الشيبان واشوف بن طخيس معه العصا رايح المسجد وانا اللي امشي وراه وهو يدخل المسجد ونصلي وعقب الصلاة يقوم ابن طخيس ويكبر يتسنن وانا اوقف وراه يوم سجد بن طخيس وانا انزل راسي في الأرض وارفع ثوبه من ورى بشويش واويق من حدر ثوبه ابي اشوف السروال اللي هو لابسه هو سروالي واشوف حبل يتدودل من سرواله (سرواله من نوع اللي يربط بالخيط )
وانا اسحب الحبل من حدر ثوبه الا يوم انقطع الحبل في يدي وخفت بن طخيس يسلم ويشوف حبل سرواله في يدي ثمن وش يفكني منه والتفت يمين ويسار اشوى ماحد شافني واشوف بن حويل العميان جالس يسبح ويهلل وانا اللي احط الحبل فوق راسه
ويسلم بن طخيس ... يوم وقف وهو اللي ينصل سرواله ويرفع سرواله بسرعه ويدور الحبل يبي يربط سرواله و يتلفت ويشوف الحبل فوق راسك يابن حويل ويطمر وهو ماسك سرواله بيده لاينصل وياخذ الحبل من فوق راس بن حويل وهو اللي يقمع بن حويل على راسه بالعصى ويدخل يده من حدر ثوبه ويربط سرواله والشويب بن حويل يتخبط بيده لايشوف ولايدري وش السالفه
وانا اتسنن واطلع من المسجد وفي بالي هالحين بن قعيس واشوفه يمشي قدامي
و بن قعيس كل جمعه امتعود يسير على بنته متزوجه ولد عمها وساكنين في الدور الثاني في نفس العماره اللي انا ساكن فيها
واسبق بن قعيس وادخل العماره واجلس حدر الدرجه ويدخل بن قعيس مع باب العماره وهو اللي يطلع على الدرجه ماسكن الدرابزين وانا تحت اويق من حدر ثوبه ابي اشوف سرواله هو سروالي
واناظر وافرك عيوني وش اشوف بن قعيس ماعليه سروال لابس وزار
واطلع الغرفه واسبقه وانا مسلم عليه كيف حالك يابو وزره الله يستر عليك
وادخل شقتي وبالي مشغول مع السروال مادري وش وضعه بعدي
ماخذيت لي شوي الا جرس باب شقتي يرن !!
قلت : من عند الباب ؟
قال : افتح الباب ياولدي انا بن قعيس !!
قلت : قعيس اجل ادخل من حدر الباب ههههههه الله يستر عليك
وافتح الباب واقلطه وعيا يدخل ابركها من ساعه وقال انه عازمني على الشااليه حقه !!
قلت : وش شاليه هههههه ماتخلي سوالفك قل انك تبيني اوصلك زريبه الغنم حقتك ابشر يلبن قعيس الله يستر عليك
ضحك بن قعيس وقال : وش عندك يامدرعم من طلعنا من المسجد وانت تقول لي الله يستر عليك.. الله يستر عليك
قلت : من اللي شفته نصيحه مني لك يابن قعيس اذا بغيت تطلع درج لاتطلع من جهه الدرابزين خلك بعيد من جهه الجدار حتى ماحد يقول لك الله يستر عليك غيري يابو وزره
وحنا نطلع من الشقه ونركب موتري وحنا ماشين قال بن قعيس عطشان يبي من البقاله شاني واوقف عند سوبر ماركت واشتري شاني وارجع ابي اركب يوم فتحت باب الموتر طلعت ريحه من السياره فقعت راسي ريحه خايسه قلت الله يحوم سبدك يابن قعيس سويتها وتصرفني للسوبر ماركت وانا اتلطم وافتح الدرايش واركب الموتر
قال : جرحت شعوري يامدرعم
قلت : اصلا منين يجيك الشعور وانت اقرع
وصلنا شاليه بن قعيس اللي هي الزريبه ويقعد يعلف الغنم ويسقيها مويه ويناديني امسك له وحده من الغنم يبي يحلبها واقمز وامسك له العنز وانا اناظره وهو يحلب وانا ارجف بن قعيس هو مع سحلته من اللي شفته !!!
شفت سروالي السنه ملبسه عنزه شماله[/align]
