عتـــــــــاب من عجايب إلى كل عضو ومشرف في الغرابيل ........!!!!!!
سلام الله عليكم ورحمته وبركاته ..... ردوا السلام في مشاركاتكم لو سمحتوا !!!
في البداية أحب إني أنوّه >>> حلوة أنوّه !!!
ايه أنوه لحضراتكم يا إخواني وأخواتي الأفاضل بأني عتبانة عليكم بكل ما أوتيت من قوة ...قولوا ليه.....
لأني وبكل صراحة لما أكتب أحب ان الكل يتفاعل معاي .. ومن ملاحظتي على المشاركة السابقة ان كل واحد فيكم ((( من اللي ردوا علي طبعا ))) كتب الرد وانحاش .. ولا عاد طب يشوف وش أنا كاتبة له ...
يعني بكل صراحة لما أكتب موضوع وبعدين أرد على الردود ما ألقى أحد يرجع ويشوف وش ردي عليه .. أنا ما أقصد نقلب المواضيع شات .. لأ بس يعني أحيانا يكون واحد معلق تعليق يموت من الضحك وأجي أرد عليه بكلام أو بسؤال أو بتعليق أحب اني أشوف ردة فعله عليه .. بس للأسف ... أدخل لموضوعي وما أسمع إلا صوت ريااااااااح ... وأشوف غباااااار >>> والله تجيني كتمة من ذالغبار ...
وكأن مشاركتي شجرة كانت من يومين خضرة وصارت صفرة يابسة... بظرف يومين بس ..
مدري وش أسوي ؟؟؟ أقعد أرسل لكل واحد رسالة خاصة وأقول .. هيه يالأخو تراني رديت عليك رح شف وش كتبت لك !!!! ولاّ يالحبيبة تراني رادة عليتس وش رايتس تطلين شوي؟؟
ولاّ تبون أصك لكم إعلان من الإدارة على إيميلاتكم عشان تروحون تشوفون ؟؟؟؟
والله ما برّد قلبي غير موضوعين كتبتهم ... ((( موضوع الضبان ))) اللي حسيت اني شفت ناس ماعمرهم ردوا علي بس في هالموضوع ردوا وأبدعوا في ردهم مثل همس المشاعر اللي صار لي سنتين تقريبا أشوفه بالمنتدى سواء بهالمنتدى أو بمنتدانا السابق بس ما عمره رد على مواضيعي .. من جد عرفت يوم رد إني أبدعت في موضوعي من كل النواحي سواء بالفكرة أو بالعرض أو بالرد ..
والعالم صارت تروح وتجي وتكمل ردود وترد أكثر من مرة مثل سيف العشق..
وبنات ملاقيف والله وسعوا صدري ..
يعني بالعربي موضوع حسيت اني عرفت أكتب فيه .. وتحمست إني أدور على مواضيع تساويه أو أفضل منه ...
وموضوعي الثاني ((( موضوع القهوة ))) اللي صار كل واحد يدخل ويتقهوى وبعدين يجي ويرد على ردي وانقلب شوي سوالف بس كلن تقهوى .. وانبسطت فيهم والله ..
مدري ليه ماعاد أحد يكتب أو يبالي بالرد اللي يكتبه ؟؟؟
يعني المفروض ان كل واحد يعطينا رايه و يوضح وجهة نظره سواء بمواضيع الصرقعة أو الشعر والخواطر أو الرياضية أو التليفونات أو المطبخ أو السيارات ....إلخ إلخ إلخ ...
هذه الملاحظة حسيت إنها تقرقع في خاطري ... قلت يا بنت ترى يمكن في غيرتس يعاني من نفس هالمشكلة.. ليه ما تطرحين وجهة هالنظر اللي سبعة على ستة وتتكلمين بهاللسان اللي يقطر من العسل شارحة و موضحة هالنقطة ويصير كأن الكلام لتس يا جارة ؟؟؟
أتمنى ما أكون طولت عليكم .. وإني جبت لكم زبدة المشكلة وقشطتها ....
تقبلوا جميعاً خالص تحياتي ...
والزعل مرفوض والعتب عادي نتقبله ترى ....
