الله من ضيقة الصدر .... ((( تعالو ضروري )))
الله من ضيقة الصدر ... بالله عليكم ..ماتجيكم حالات تندبل اتسبودكم فالواحد يدور أي شيء يبي ضيقة ذالصدر تروح.
ذالحاله تلبستني ذات ظهرية جميع وسائل الترفيه ما اقدرت تطلعني من دبلة التسبد اللي أنا فيها.... طبعا صعب ان الواحد يجلس مكتوفي الايدي لازم يتصرف ,,,
اول شيء قررت اني اسويه اطالع اخوي الصغير وهو منسجم يطالع الفديو .. من زود الانسجام يقطر سعبوله وهو مايدري..قلت ياولد فرصة لقيت شيء يوسع صدرك ..جبت (ستوب ووتش) ساعة واقفة<- - -اموت بالترجمة ... فقلت باحسب كم يستغرق السعبول وقت من يوم يطلع من خشته الين يوصل سره ..ثلاث مرات احسب (من جد فاضي)..واخذت المتوسط فاكتشفت ان السعبولة الواحده تستغرق زمن مقدارة اربع دقايق وثلاثين ثانية وثلاثة أجزاء من الثانية ... معناته ان اخوي يبي ينزل خلال ساعة وحده اللي هي وقت مشاهدته للفيديو حوالي اربع طعش سعبولة ..فلو قلنا ان الف طفل في نفس الوقت يشاهدون نفس الفيلم ...معناته اننا نستهلك اربع طعش ألف سعبوله خلال ساعة واحده .... وبما ان السعبوله الواحده حجمها ثلاث سم مكعب لذوي الخشش الصغيرة وخمس سم مكعب لذوي الخشش الكبيره ...اذا فالقضية اصبحت ظاهره وتشكل خطر على مخزون السعابيل في مجتمعنا ... هذا غير اذا حسبت لكم السعابيل وقت الذروة .. يعني وقت النوم ...اذاً اخواني واخواتي يدا بيد لمنع الهدر السعابيلي القادم حفاظا على سعابيل اجيالنا القادمة.
خلونا من السعابيل ... برضه الى الحين ضايق صدري.. لاو الله البلشه برضه مازلت افكر وش اسوي ..وش اسوي وش اسوي...هكذا سولفت مع نفسي.
جتني فكره ثانية واتوقع انها راح تاخذ مني بعض الوقت وبنفس الوقت استفيد من وقتي ... قلت ليش ما اتعلم التحنيط ... يعني اصير محنطاتي ... بس وش احنط؟؟؟صعب احنط أخوي .. لو اني ما اظن امي بتفقده ..لكن القضية انسانية.
مافيه الا حل واحد...غرفة أختي ..خابرها جايبتن طير لونه اصفر على برتقالي على بنفسجي على أحمر ..يعني كنه شاشة التلفزيون قبل مايفتح ... تسللت بهدوء والحمد لله كانت اختي برا الغرفة ... تليت العصفور مع علباته ههههههههه (واحد طالع له اقرون)... والعصفور الضعيف على باله باقعد العبه واسبحه مثل اختي...ايه هين ,,بلاك ماتدري وش بيجيك ,,, طلعت للسطح وجبت اكتاب العلوم .... عاد اول خطوة لازم اموت العصفور علشان ابدا بالتحنيط .... مسكت راسه وطرااااخ..بحافة الطاولة,,بس عيا يموت ,,
لاحووول طيب خل اجرب طريقه ثانية ... يقولون حط عطر واكتمه حطيت عطر بمنديل .. وكتمت خشة العصفور ..بس برضه مافيه فايده ...لا والله البلشه أثر التمويت صعب ياحللات بكيماوي والا بيولوجي... عاد صراحه دبل تسبدي ذالعصفور لازم يموت والا وشلون احنطه؟؟ وبرضه صعب احنطه وهو حي ..جاء في بالي فكرة ... رحت فتحت باب السطح ومثلكم عارفين أبواب السطح عندنا بالسعودية هي اقوى شيء حديد صبة مايشيله ولا عشرة رجاجيل ..كان الحرامي بيدخل بانزال مظلي ...
المهم فتحت الباب شوي ... وحطيت راس العصفور بين حافة الباب الخلفية وبين الجدار ...وطراااخ اصك الباب .... هههههههههههه مايحتاج اعلمكم وش صار .. يالله مايخالف نحنط الجسم مايحتاج راس ههههههههه ... يا الله اخيرا قضينا من المهمه الاولى
نجي للتحنيط .. صراحه يوم قريت الكتب لقيته معقد شوي ..قلت ياولد مايمنع انك تخترع طريقة جديدة قمت دخلت اصابعي في بطن لعصفور وطلعت كل اللي في بطنه جلست اطالع بالقلب والكبد والكرشه وانا مستااااانس ... المهم طلعت اللي في بطنه ,,,, رحت للمكيف الصحراوي اللي في السطح واخذت من القش حقه ... ودحيت (والدحي هو التعبئة بقوة).. ودحيت بطن العصفور ... ثم قمت وخطت اللي انتم خابرين علشان مايطلع اللي في بطنه ... ثم حسب تعليمات الكتاب يقول لازم تضرب العصور مرتين بالجدار ثم تذبه فوق عند سطح الخزان الين ييبس ..وبعدها بالهناء والشفاء...نفذتها حرفياً صكيته بالجدار مرتين ...ثم زودت ثالثه من عندي مالها داعي بس زيادة بالحقد والكراهيه... وذبيته على السطح ... والى يومكم اليوم واختي حزينة تقول ان عصفورتها زعلت عليها لانها ماوكلتها وطارت < - - -- صراحه حسيت اني نذل بس تغلبت على ذالشعور مع الوقت.
استغرقت مني عملية التحنيط حوالي خمس واربعين دقيقة بس برضه الى الحين مندبلتن تسبدي .. ياربي وش ازين بعد؟؟
جاء في بالي فكرة ..مادامني في السطح ورى ما اقعد اطلطل على الجيران واشوف وش يسوون .. بس ماش اشوفها فكره مالها داعي ...يبي لنا شيء غير.
قلت ياولد مالك الا حالة التأمل اللي يقولون عنها ,,, بس وش اقعد أتامل فيه ...؟؟ في ذالطبيعه والا ذالجو عندنا اللي مادري وش يبي ... قلت ياولد خلني أتأمل في نفسي خصوصا وانا اعيش معاناة لاني من فئة الشيون الى درجة خيالية ...خلوني اعلمكم سالفتي مع ذالشين اللي فيني مادام انا فاضي ..وانتم ماقعدتوا تقرون فيذا الا انتم فاضين بعد ...
انا شين ... ربي خلقني شين طول عمري شين ...وش اسوي ...سويت عمليات تجميل مانفع ..قدمت على قرض ترميم مانفع .....ياربي وش اسوي؟
تقول امي اني اول مانولدت من شيني مسكوني بالبيز حق الشاهي ما احد يبي يلمسني ... وان الدكتور قاعد ينغزني بعود المكنسة ويقلبني يمين ويسار يبي يشوف أنا آدمي والا كرشة طلي.
اخواني كلهم حلوين ..كل واحد احلى من الثاني الا انا,,,,,ليييييه؟؟؟ ليه انا شين؟
كبرت واكبرت معي مشكلتي دخلت المدرسة في الفصل مايحتاجون مساحة لاني موجود يعني الطلاب يدرسون وانا مساحة الفصل.
كان مدرس العلوم اذا جاء يشرح عن المفصليات اللي هن الجراد واللي انتم خابرين.. يجيبني كوسيلة ايضاح. كانوا الطلاب كلهم يفهمون الحمد لله انهم ماكانوا يدرسوننا العنكبوتيات والا الصاروريات او البعرصيات.
ياربي وش اسوي... كبرت وكبرت مشكلتي معي صارت اشباهي مادري وشلون قايلة ...تعقدت من المرايات ... مادري وش اقول لكم خشمي صار كنه طار طقاقة.... خشتي كنها ازبيرية شايب ..بس الظليمة شينة اذا ابتسمت صارت كنها زبيرية ولد شباب ..... عيوني اللهم لك الحمد تقل بكلة عبدة صغيرة بس الحمد لله وحدة منهن كبيرة اشوي. اذا قعدت تحسبني جريش مكبوب على غضاة .لا والا الجسم وش اقول ووش اخلي مادري بس اقرب مالي صندوق بردقان واطيته ددسن.
كرهت جواد العلي وكرهت راشد الماجد ومصطفي قمر وريكي مارتن وذاك حق تيتانيك واللي مع باك ستريت بوي وعمي بعد كرهته ..أي واحد زين صرت اكرهه ما احبه .
ياربي وش اسوي...شين وين ما اروح وين ما اجي شين صار عمري عشرين وتجاوزت مرحلة البلوغ ..قلت ايه ان شاء الله يبي يتلاحق وجهي ويزين ..مافيه فايدة كل ما اكبر يكبر معي شيني .
خلصت الثانوي ودخلت كلية الطب بس مع الاسف مادخلوني كطالب لا دخلوني كفأر تجارب,, ياربي حتى فار التجارب احلى مني ابيض كله مليحة ..فاظطروا انهم يحولوني لكلية الطب البيطري.
الحمد لله تخرجت طبيب بيطري...بس صرت كل ما اقرب من ابقرة والا عنز والا بعير مادري تتغير تعابير وجيههن ,,مرة البقرة ماقدرت تحمل من شيني انطقت تكلمت ..قالت تكفى اذا شفتني تعامل معي على اني زرافة بس لاتقرب عندي .. رحت لالبان الصافي سببت ازمة لهم باللبن بدل مايعطن البقر حليب صارن يطرشن يعني يرجعن (الله يكرمكم).
من وساعة وجهي قررت اني اسافر .. لا ووين هو له ؟؟للبنان !!! لبنان ياجعلك الفاقوش اللي يفقش عدوك .. وش اسوي باروح اسوي عملية تجميل أو بالاصح ترميم .. لانهم يمدحونهم بالشغلات هذي .. فعلا حجزت موعد ورحت للبنان بالحجر الصحي يعني تهريب مع اكبر الاحتياطات الامنية لان الدكاترة صاروا يعتبروني من اسباب تفشي ظاهرة الاجهاض عندنا.
..وصلت للبنان وكلي امل اني اطلع حلو.. جاء الدكتور وهو لابس ذوليك الصفر حقات الاشعاع النووي ومعلنين حالة التأهب القصوى ,, قال لي شف يا ابني... انا باعطيك عدة خيارات شف اللي يناسبك وانا ماعندي مانع .. انا ممكن اخلي اشباهك بطة والا وحيد القرن أو تمساح .. لكن اني اسمكر وجهك وارجعك مثلنا... هذي ولا كنسولتو من اكبر مستشفيات التجميل في العالم.
صابني احباط ...ما قدرت اتحمل ... وزادت مشكلتي لما حسيت ان عندي ميول للجنس الآخر(اقصد الحريم لاني عارف انكم تبون تقولون اكيد جنسه الآخر فقمات) .. ودي احب ودي اغازل ودي ارقم ودي اشبك ذالبنات .. نزلت الى ادنى المستويات لحجيات ماهنا باشين منهن نيجيريات تقل بعارين مافيه فايده ما احد عطاني وجه ... اذكر اني رقمت لحجية تبيع فصفص في البطحاء شكلها تقل لصتك جمس منفقع في طرق القصيم وصاكته الشمس الين داخ .. وش سوت بنت اللي مانيب قايل راحت اتصلت على الهيئة وقالت صكوا علي بس لايرقمني هذا ..اتصلت على الجوازات وقالت سفروني بس لايرقمني هذا .. اتصلت على حقوق حماية الانسان ..اتصلت على بوش قالت شف هذا ارهابي.
حقين الهيئة يوم جو.. طالعوني .. يمين يسار فوق تحت .. قالوا ليت كلن مثلك كان تبطحنا في مكاتبنا لاشغل ولا مشغلة.
صنفوني ضمن الاسلحة الاشد خطور وفتكا .. واني مادة مشعة وقابلة للانفجار .. يعني ما احد يدخن جنبي ودايم ملصقين على ظهري علامة الخطر ... ياربي وش اسوي؟؟؟؟
آخر شيء قررت اني انتحر,,خلاص ما اقدر اتحمل لا يمكن اعيش بالشكل هذا ... خلاص تعقدت تعقدت تعقدت (صورة واحد طايح على السرير يصيح).
جاء اليوم المعهود للانتحار.. شريت حبل وركبت في غرفتي مروحة وكتبت رسالة الوداع وجبت الكرسي اللي في الحمام علشان ارقى فوقة ... كل شيء تمام وجاهز للتنفيذ... يم جيت انفذ ماش حسيت انه يوجع وخفت اموت .. قلت ماهنا الا اني اخلي باب الغرفة مفتوح علشان تشوفني امي ثم(ن) تنقذني ويتعاطفون معي ويشوفون حل لمشكلتي... ربطت الحبل بالمروحة وحطيته حول ارقبتي وطلعت فوق الكرسي..والباب مفتوح ... اخيرا مرّت امي من قدام الغرفة ... تدرون وش سوت نادت الشغالة قالت سكري غرفة ذالشين اهي اهي اهئ..
قلت اكيد امي ماشافتني خلني افتح الباب مرة ثانية .. وكررت نفس الحركة .. شفت امي مادري وش تقول للشغالة تقر في اذنها ... جت الشغالة توقعت انها بتقول لي انزل وانا أعشم نفسي بالاماني... ماطالعتني,, وراحت للمروحة ..قلت هييييه انتِ خير ان شاء الله وش اتسوين؟؟؟؟ قالت هزا ماما كلام سوي مروحة رقم واحد ,!!!!!! آآآآآه وش اسوي بعمري؟؟ الناس تبي تفتك مني .
انتهت سالفتي مع الشين حقي ... بس برضه الى الحين ضايق(ن)صدري ومندبلت(ن) تسبدي لازم اشوف لي حل مع ضيقة الصدر هذي ...رقيت فوق لغرفة اختي الثانية قلت هاه وش تبين ..قالت ماناديتك <- - - يدور مشاكل ... قلت الا ناديتيني ,,, سويت نفسي زعلان ..قمت فتحت دولابها وفتحت الدريشة وشبكت المسجل وطولته اعلى شيء وصفقتها كف ثم نزلت ...مريت من عند اخوي شت المركا اللي متركي عليها ... مريت على المطبخ ناديت الشغالة.. قلت لها متى بتروحين اندونيسيا(من جد فاضي).. قالت بعد سنة .. قلت طيب تبين اساعدك بضف أغراضك ..؟ قالت لا ساعدني بضف وجهك ....لاحوووول .. طلعت مرة ثانية فوق دخلت غرفة اختي ..قلت وش تبين قالت ماناديتك ... قمت صكيت الدولاب وصكيت الدريشة وفصلت المسجل ..وبرضه صفقتها كف ونزلت.
الله من موتة الحييييييييل ... طلعت برا ..رقيت فوق السور .. فكيت اللمبة(وفي رواية لنبة) اللي فوق باب الحريم .. وديتها عند باب الرجال وفكيت اللي فوق باب الرجال وحطيتها عند باب الحريم.
برضه مازال الوقت طويل ..يانعنبو ابليس الساعة صارت ثلاث ساعات ... رحت فتحت شنطة اختي الصغيرة طلعت دفاترها كلهن .. وسطرت كل الصفحات الى آخر شيء .. وأشق صفحه من كتابها حق المطالعة واطلع.
الظاهر كل ذالخرابيط ماهيب سادة ... لازم أخلي نشاطي اكبر شوي.. ليش ما اطيح بالمخدرات ... مادامي فاضي وماعندي شغل ورى ما اصير مدمن ...؟؟
استغفر الله ياربي..وش اللي مدمن .. اقول انثبر بس ,,, اقو ل مالي الا ارجع للتأمل مرة ثانية ... وش رايكم اعلمكم سالفتي يوم اني زين ..أدري تقولون توك تقول انك شين..عادي وسعوا اصدوركم كل الدعوة سباحين.
المهم ... ياوسع اصدوركم اللي قعدتوا معي الى الحين ...اذا انك قريت كل اللي راح فلتعلم اني اقول لك ياحبي لك منذو مبطي واسمحلي على كثرة خنبقاتي... بس ودي اقول لكم ترى الفضاوة شينة والفراغ شين ..فاشغلوا اوقاتكم وأوقات عيالكم ..والا الله يعينكم على بلاويهم ...والله يعين طيوركم على البيبان .
وخلوني أسألكم آخر شيء.... إذا ضاقت اصدوركم وش اتسوون؟؟؟
جروح
