السالفة وما فيها كل واحد له ذكريات ومواقف طريفة في الطفولة .
طبعا عشت طفولتي في القرية وقتها كانت الحياة بسيطة جدا لا كهرباء ولا شبكة مياه ولا طرق ولا هاتف .... الخ .
1- سالفة السلقة .
السلقة هذي كلبة لجارتنا أرملة طبعا تحرس لها البيت وكانوا أغلب البدو عندهم كلاب حراسة .. المهم جا يوم انا واخواني ومعنا ولد خالي جاينا ضيف من الرياض واحنا مارين من بيت الجارة قلت في نفسي ليه ما اسوي حركة في الشباب اللي معي كان معي ( نطّيبة ) ههههههههه أكيد كثير ما بيعرف وش هي ( عبارة عن عود على شكل V مربوط في أطرافها مطاط ونضع فيها حجر صغير نصطاد بها العصافير ) المهم يوم قربنا عند السلقة مسيتها بنبطة وحطيت رجلي ركض يوم فزت السلقة ورانا طردي في الشوراع .. طبعا انا ما دري وش صار الا اني احس بالهوا من السرعة يهفهف بقشتي وحاط رجلي ههههههههههه التفت وراي ما عاد شفت احد لا شباب ولا سلقة قمت هديت السرعة وفي مثل لمح البصر الا الملعونة متبركتني مدري وين طلعت لي منه وتعضني في كتفي وأجلس اصيح ويمر رجال جزاه الله خير ويطردها عني وبعدها حرمت امزح معها خخخخخخخخخخخ.
2- سالفة العقرب .
طبعا ايامها وانا صغير بخامس ابتدائي نطلع من العصر الى المغرب في الشارع نلعب تعبت من اللعب وجلست على جدار صغير مبني من حجر .. كنت لابس سروال السنة وفنيلة علاقي ههههههه طبعا ما فيه الا ثوب المدرسة ما نقدر نلعب به المهم مع مغيب الشمس وأنا مفهي ما حسيت الا اللي يتحرك في المكان المحظور .. لا حوووول وش ذا بعد قلت اكيد خنفسانه قمت حركت ملابس الا والعقرب نازلة خخخخخخخخخخخ ومع انها صارت سلامات الا اني صرت اكره العقرب واتخيلها كل وقت ههههههههههه حتى العقارب فيهم أنذال ما يجون الا في الضيق .
3- سالفة البسه ( القطوة )
كنت احب القطاوة وكانت القطاوة وقتها متوحشة مو مثل الحين تجي لعندك تشمشم وتطردها و تترجى فيها تروح ولا عندها فيك .. المهم شفت قطوة قلت الا امسك ابو جدها وطردي انا وياها من درا الى دار ومن سطح الى سطح ومن جدار الى جدار وآخر الأمر وتزبن غرفة تعتبر مخزن طبعا الغرفة هذي مظلمة ( غرفة وسط غرفة ) اها قلت كفشتها الحين بس المشكلة ما فيه نور ولا زم اروح اولع السراج (الفانوس ) واحنا تونا نهار وسين سؤال وش تبي بالسراج قلت يا ولد ما لك الا الكبيرت لقطت اطرف كبيرت ابو شعلة وهات يا توليع عود ورا عود وكلما قرب يطفي اولع الثاني وارمي الاول وفجأة وتطلع القطوة وارمي آخر عود مولع ووراها ركض خخخخخخخخخخ بعد شوي الا الصياح حريق حريق حريق ههههههههههههه والدخان يملا البيت والجيران يتراكضون بالمويه كل واحد جايب مويته اللي في بيته كلها ويطفون النار وانا مسوي نفسي ولا كأني ادري عن السالفة ههههههههههه ... طبعا صارت أزمة مياه في الحي كله والمسكين اللي كان مبرد مويه راحت كلها في اطفاء الحريق خخخخخخ .... المهم وقتها تم تسجيل القضية ضد مجهول خخخخخخخخخخخ .
4- سالفة السيارة
ماكان فيه وقتها عندنا في القرية الا سيارات الشحن الكبيرة مثل وايت المحروقات أو سيارة الشحن الكبيرة أو القلاب وما كان فيه ازفلت اصلا .
المهم كل بعد يومين او ثلاثة نسمع صوت السيارة من بعيد وعلى طول نطلع من البيت ونتعلق فيها من الخلف وهي تمشي لا نها اصلا ما هي مسرعة وغالبا السواقين يعرفون ان الاطفال يتعلقون فيها وبعضهم ما يسرع لا نه عنده انسانية خخخخخخ طبعا احنا نفكها بعد ما يتعدى الشارع اللي احنا فيه من شان الشارع الثاني فيه زباين غيرنا خخخخخ وكل واحد له شارعه المهم واحد مره نذل وايت محروقات تعلقنا معه وبعد شوي حط رجله وابعد بنا عن شارعنا وشكله بيطلع لقرية ثانية يودي لهم قاز قال خلني اوريك في ها الصغار القشران هههههههههه طبعا طاقم التعليق كلهم أكلوا العلقة لانه ما هدأ السرعة وعلى طول خفنا يودينا مكان بعيد وفكينا السيارة وهي مسرعة وانتهى الامر بعدة اصابات بعدها اذا مر من عندنا صرنا نصيح عليه ولا يمكن نتعلق معه ههههههههههههه وشكله ارتاح منا بها الطريقة .
5-سالفة العسكريم .
العسكريم = الآيس كريم
طبعا أيامها في القرية بعد التطور صار فيها سوبر ماركت و هو ( المخبز ) وشوي معلبات تونه وجبنه ومربى حبحب وصلصة وأحيانا فول مدمس وثلاجة على غاز وفيها عسكريم وببسي وميرندا وعصير قها ههههههههه
طبعا العسكريم هذا عبارة عن شراب فيمتو مع ماء وسكر ويحطونه في اكياس نا يلون صغيره وفي الثلاجة الين يتجمد وتعال يا ولد استمتع بأحلى عسكريم من ((باسكن روبنز ))
قدر الله وسافرت من القرية الى جدة عند اخوي الكبير في العطلة وهذي اول مره اشوف فيها مدينة فيها كهرباء وطرق وحياة المهم طلعت انا واخوي وصاحبه كان وقتها في رجلي جرح من اثر مسمار من ايام الشقا في القرية لا ني امشي حافي ولا علاج ولا تطهير ولا يحزنون قال اخوي اول شي اوديك المستشفى ههههههههه عرفت اني قربت من المستشفى من ريحة المطهر ( السافلون ) ما كنا نشم ريحته الا في المستوصف سنويا اذا فيه تطعيم خخخخخ
المهم تعالجت وطلعنا السوق قال أخوي عبد الرحمن تبي آيس كريم قلت ايه قال خويه وعندكم آيس كريم في القرية قلت ايه عندنا قال كيف شكلوعاد الأخ من أهل جده قلت : شربيت ( توت ) نحطه في باغة ( كيس نايلو ) ونحطه بالثلاجة لين يصير ثلج ونمصه ههههههههههه ما تو ضحك يوم قلت شربيت وباغه ونمصه خخخخخ قال خويه ايش يعني شربيت وايش يعني باغة .. لا حوووول يبي لي مترجم قلت يا خي شربيت اللي برمضان وباغة يعني باغة خخخخخخخخخخ (مانعرف شراب التوت الا برمضان مع التطلي واللقيمات ) .
المهم نزل الرجال وجاب عسكريم وعطوني واحد وكنت راكب في المقعد الخلفي والدنيا ظلمة ولا أدري وش اللي عطوني أتلمسه ما هو عسكريمي اللي انا خابر قام الاخ وولع لمبة السقف قال جرب الايسكريم حق جده وقول لي رايك يا عبد الرحمن قلت طيب المهم كان معه ملعقة خشب ملفوفة بورق هذي على طول حطيتها بمخباي على انها حلاوة او لبان يعني ملحوق عليها وفتحت علبة الايسكريم وتعال يا لحس بالاصابع خخخخخخخخخخخ والثوب راح فيها واليدين كلها حلا شوي نزلوني عند البيت وقالوا بيروحون مشوار وانا دخلت البيت وكل ملابسي مدهونة ايسكريم واتلمس مخباي واطلع اللبان واعض واعض واعض الا خشب خخخخخخخخخخخخ أول مره اشوف لبان خشب ههههههههههههه وبس .
آخر وحده بدون عنوان وهذي المهم بعد تطور قريتنا وصارت محافظة تم افتتاح مطار اقليمي عندنا وسافرت على اول رحلة قلت اشوف الاهل واشوف المطار حقنا ومسوي فيها وطنية ههههههههه نزلت المطار وكل شي تمام بدون عفش طبعا خفافي ولابس البشت وكاشخ وكل الناس تناظر ههههههههه تخيلت نفسي وكيل وزارة خخخخخخخخخ المهم شكل واحد صكني بعين او وحده مدري وانا ما شي ابي اطلع من الباب الا راسي طراااااااااخ بالقزاز ... العن شكل شركة النظافة شكلهم منظفينه زين ههههههههههههههههههههههههه هههههههههههه من زود نظافة القزاز فكرته مفتوح أثره قزاز والباب غير بمكان ثاني خخخخخخخخخخ الا والعالم اللي يقول اسلم واللي يقول ما تشوف شر واللي يقول بسم الله عليك وسلامات خخخخخ ودورني ما عاد تلقاني هههههههههههه قال وكيل وزراة قال بعدها طابت نفسي من البشت .
ان شاء الله ما كنت ثقيل عليكم بسوالفي
بايو والى لقاء في سوالف جده غير ههههههههههه
