[align=center]اذا قالوا لك (البزر ما ينسى ) قل صح ولا يكثر كلامك
وانا ودي اكتب مذكراتي(على باله نيلسون مانديلا)ولا (ملك المغرب السابق)
بس طبعا مذكراتي ايام المبزره
اذكر اني بالأبتدائي داااااااااااااايم اصيح اذا طلعت النتيجه؟!!
اكيد فيه واحد ولا وحده (هدر) جا في باله عشاني ساقط
لا يادلخ انت وياه
لأن عندي اخو اكبر مني بسنه(دحيم) وسقط بثالثه ابتدائي وعادها وصرت معه انا وياه بفصل واحد.
المهم وكل سنه الله يصلحه ياخذ دور ثاني
وانا وياه نستلم النتيجه مع بعض. وانا فاتحن كشرتي ومبسوط(دافور يومه صغير ومن الاوائل)
اجي القاه ساقط ويقعد يصيح
وطول ماحنا ماشين في الطريق للبيت(يطقونها كعابي) يقول دحيم: الله يلعن امه هالمدرس هو اللي سقطني
الله لا يوفقه
هو كلب
اصلا هو حاقد علي.
ومن هالكلام الرخيص
وانا (امشي له طبعا) اخاف يصطرني كف اذا قلت له هذا من بلادتك
وراحت الدنيا وجت وحنا على هـالحال.
بس ابشركم بثانيه متوسط تعديته
بس المشكله بديت ارجع(ريوس) بدت الكساله والدباشه (تنتشر في خلاياي مخي)
خلصنا من هالسالفه.
مره وانا ناجح من خامسه لسادسه ابوي عطاني (خمسين ريال) وانا وقتها في قمه السعاده.
المهم طلعنا البحر مع العايله. والقى (كشك) واشتري منه (مونوبولي) عارف انك بتقولون قدييييييييييييم؟! بس السالفه لها ثلاثين سنه(تكفى يالشايب)
المهم واشتري اللعبه واروح لبوي وانا فرحان . طالعني (نظرات تروع) قال بكم شريتها؟!
قلت بخمسين؟!
الا و(التفله) ارض جو تنطلق من براطمه على وجهي
ويرد علي ذاك الرد اللي (كسرني وحطمني نفسيا) يسمع بهالكلمه كثيرا عشان كذا قالها لكم
المهم قال لي :يالله اخلص رح ردها.اصلا انت منتب كفو دراهم تنحطن بيدك
انا بصراحه (يجيني صداع) اذا لقيت دراهم في مخباي. وكريم(مادح نفسه يبي له رفسه)
ومره في ثانيه متوسط ابوي شرى له ساعه جديده وقلت يابوي عطني ساعتك القديمه(ماركه وغاليه)
وعطانياها.
واشوف واحد من عيال حارتنا. قال لي ساعتك حلوه وانا فاهم علوم الرجال غلط قلت له تفداك.
واخذها (التبن)
وارجع للبيت وراح يومين على السالفه الا ابوي يسألني وين الساعه؟!
حاولت اصرفه يمين يسار؟ هو طبعا عارف (الدلخ) اللي عنده. قال اخلص من عطيتها؟
قلت فلان.
وطبعا تعرفون وش سوا لي؟! مثل ماقلت لكم قبل شوي
بس زاد عليها كف
واروح وانا اسحب رجولي تسحيب(تقطعت نعالي) الله يعزكم من كثر مااسحبها.
واطق على الولد البيت؟
ويطلع وش تبي؟
وانا اقول له هات الساعه؟
المهم عطاني الساعه وهزئني تهزيء الله لا يوريكم
(التربش) كني اشحد منه.
وضحك على بكم كلمه .
الرجال مايرجع في كلمته
الرجال اذا عطى ماياخذ
ومن هالرخيص
المهم وانا ضايع بين ابوي وبين هالتربش.
أنتظروا الجزء الثاني[/align]
