هيضتني ياخوي وأزعجت الإحساس
من بعد هجراني طروق القصايد
***
خليتني في وادي الفكر عسّاس
أجمع شتات مشردات الطرايد
***
من بعد قفل الباب عن كل هوجاس
أدعيتني مرمى الهجوس الجدايد
***
تشكي غثا من كلمتن جات من راس
من بعدها طاحت سلوم وعوايد
***
لِن الكلام أحيان جوهر ونبراس
وأحيان معدوم الثمر والفوايد
***
يا كثر هذر يورِّث العقل وسواس
ويا قل حكي مسطرين الفرايد
***
خذلك من صحاح الموازين مقياس
وقيس البشر وقت الرخا والشدايد
***
تلقى العجب فـ معامل الناس للناس
وتلقى العنا في قربهم والمكايد
***
ما أقول ذا من ظرف طاري وحسَّاس
حـكمـه ترددها شـعـوب وبـدايـد
***
يدوي صداها بين حيفا ومكناس
وتسمع نباها تحت خضر الجرايد
***
خذ ما صفا يا طيِّب الجد والساس
واترك علوم مغيرين العقايد
***
جرِّب قبل لا تضرب أخماس بأسداس
والتجربه برهان لاجيت كايد
***
لولا السهم ماينعرف نفع الأقواس
ولولا اللحم ما جاء حسام وحدايد
........................
وسلامتكم.
