من البارح وانا عيني غمامه وانتظارك نور
يلامسني رعدك ولا برق مبسم مواعيدك
تجف شفاه ساحلك الهزيل وخاطري ممطور
تبيني ؟ دوك من عشب النوايا ليا امحلت بيدك
ترى ماني بمتنبي رجاك ولاني بكافور
ولا انت بعبد لملوك الغرام ولاني بسيدك
تعبت اجمع حصى رمل المواجع واحذف الطابور
واسلم لك يدين العشق وانت تمد لي قيدك
دخيلك لامتى وانا سراج بليلك المكسور
علامك صرت تشرب فرحتي في كاس تنهيدك
عليك من الجفا بابٍ حزين وحارسين ونور
وعلي من المواصل نظرتي لامرني جيدك
تجمعت بدروبك واحتريتك والزمن منثور
على متن الجروح تنقض الحرمان فوق ايدك
حبيبي لو يطاولني غيابك ما علي قصور
حضوري زارعه بين النعاس وبين تسهيدك
مدام ان المواقف ثابته خل الظروف تدور
بكيفك لو خلعت الهم عيدي لابسٍ عيدك
احبك كثر ما جيت متواضع وانت رحت غرور
واحبك كثر ما تبخس غلاي وكثر ما ازيدك
للشاعر : طلال صالح العتيبي
