إيييييه ياحزم الضامي ..يوم كنت ألعب فيك مصاقيل ..
حزم الضامي يقع في شرق غرب شمال .... المهم خلووووها ..
...
...
...
والله وصرت بياع بطيخ ..
ماهو عيب .. ولا حرام .. بس أنا عندي حساسيه من البطيخ :)
..
تطبقت علي الأوامر وصرت في الصباح أرعى الغنم وأعيدها وقت الظهيرة ومن ثم ( أنتع ) الددسن
وأروح بالبطيخ للبلدة ,,
وصرت أنادي بلاش بطيييخ بلااااش ..بطيخ بلاااش .. ألحق المزيون .. بطيخ ببلاش ونص .
ودي أخسر هالشمطاء وأجعلها تكره بيعي في البسطة .
وتعرفت على زميلات البسطات .. بياعة حوائج الحريم ( أم خزنه ) ياكثر ماتخزني بعينها ولا هي بالعتني .
وبياعة الجلود ( أم حبيليص ) بس تضحك على أي شيء عندها فيوز في راسها مفصول ..
وبياعة الفصفص ( أم ميرفت ) عاد أم ميرفت مصريه وتبي تسوي فيها بدويه بالقوه إذا رفعت صوتي
وأنا أقول بلاش بلاش تقول ( أقطع وأخس يا دلعدي ) .. راعية مشاكل مافي واحد في السوق ما ردحت له .
والردح نوعاً من الشتائم المحلية المصريه مع إهتزازات جسمانية بأقوى درجات رختر والتلويح باليدين
ولوي اللسان ..
,,,
أم ميرفت \\ يا بت يا أم حبصيص القزعه هذا تبع من ؟
أم حبيليص \\ هذا يا أو خيتي أم ميرفت جده محماس الي تزوج فطنه .
أم ميرفت \\ الحورمه المنيله بستين نيله الي خطفت محماس مني ,
أم حبيليص \\ أي والله حتى أنا .
( أثاري جدي طموح عجايز البسطات )
أم خزنة\\ هيه أنتي وهي خلاص بلاش كثرت كلام تراني منزعجة من أصواتكم .
( هنا فرصة ذهبية لأم ميرفت إنها تردح ... ولكن يمنعها مشعاب أم خزنه الي ياما فقعت به راس أم ميرفت )
شفتهم أسكتوا !!
أثاري هي العمة المسيطره عليهم وحايستهم ..
قربت البسطه منها علشان تصير صديقتي وأي واحد بالسوق كله يفتح فمه أقوله راجعها هع .
وصارت أيامي مع البسطه وهالعجايز رايح راجع .
ورجعت في ليلة من الليالي لكوخنا لكي أرتااح ولكن أيُما راحة ..
الجده الجديدة دآخله في أذن جدي وشغاله ( ودودودودودود ) وبس أسم ينطق في كل جميله مخيفه ,
عرفت إني هالك هالك لا محالة ,,
ودخلت غرفتي وجلست أتقلب على فراشي خايف من الأيام الجايه وأقول يارب تستر وتعين .
وفي الصباح الباكر وأنا أغسل وجهي سمعت جدي يهاوشها وفرحت ,,
جدي \\ أسمعي يا فطنه لو بعتي بدون إذني أي شيء من حلالي ترا ما يحصل لك طيب .
( أيوه يا جدي يا بطل طلع الوحش الي دآخلك )
وما زال جدي يهاوش \\ حلالي صرتي تبيعينه بأقل الأثمان وش الي مخليك محتاجة كذا
هذا حلالك مثل ماهو حلالي يافطنه ..
( أنا بغيت أعلق نفسي في الشجرة وقلت لا ياجدي يا خاين جحدني وجحد وجودي )
فطنه ما زالت منزله رأسها في الأرض ومسويه مؤدبه وما ترد أبداً ,,
أنا هنا طلع لي قرون وماسك مكنسه وصرت شيطان وضحكت الشياطين ترن في رأسي ( نياهاهاهاها )
وذهبت بغنيماتي للمراعي وأخطط وش أسوي علشان أفقد ثقة جدي في فطنه وأخليه يصحصح لها .
وصلت مراعينا لقيت غنم غريبه وكأنها أول مره تشوف عشب وأقعد أصايح عليها وكل الغنم الغريبه
أسمعها تقول أنقلع هناك أنت وغنمك يا بياع البطيخ ,,,
صرت مطنزة حتى على مستوى المواشي ,,
وعنز تقول \\ عطنا بطيخة قرعا أنا حامل ومتوحمه عليها ,,,
والغنم ( ها ها ها ها هاااي )
( يا حليلكم مسوي دم خفيف وحركات )
وأفك عليهم حجلااان نباحه يصحي الحجر وركضت يم الراعي الي معهم ناوي أكفخه .
وهنا أتت الصدمه يوم ألتفت لي الراعي بكل هدوء ورزانة ,,
وصرت مثل جدي ( آآآه يا قلبي ... آآآه يا قلبي )
عيون حوراء .. خدود ورديه .. ممزوقه القد أظن إنه تنطق كذا ,,
وجه منور أحلى من القمر ,,
وقالت \\ نحم وش حندك .. ( عندها مشكله في حرف العين )
قلت \\ ووووووووش وش نحم أنتي من .؟
قالت \\ أنا حمشا .
بندر \\ ايش ؟
عمشا \\ حمشا أنت ما تسسسسسمع حمشا ,.
( قلبي طآآآر وعمشا كفوف طقاقه ... من اول حروف حكتها صابني زار )
بندر \\ أنا آسف غلطت على غنمكم ...
حجلاااااان أرجع أرجع ,,
عمشا \\ لا حاتي حاتي ماصاشي . أنت وش أسمك ؟
بندر \\ أنا أنا أنا مادي من أنا ,, أنا أنا ...
عمشا \\ وش فيك أنت مجنون ؟
بندر \\ إيه صرت ألحين مجنون .
عمشا \\ أقول تحدل لا أحدلك بالحصا الي في يدي .
بندر\\ أنا بندر جاركم في الكوخ هذاااك .. وولد وسيم وطولي 100 سم وأحبـ..
عمشا \\ تحب مين يا ولد الـ.. والـ.. ..
( ومسكت عصاها ولوحت بها علي )
أنا هربت من وجهها قلت لا تشوه وجهي بعدين ما أصير وسيم :)
وراحت من عندي وأنا قلبي يتبع خطاها . وعيني تذرف الدمع .
وقلبي طربق طربق ..
رجعت الظهر لكوخنا وأتجهز للبسطة وكذا أحسني فرحان ومبسوط .
دخلت السوق ونزلت البطيخ وأنا بالي مشغول مع عمشا هذي الي دهورتني ,,
أم ميرفت \\ هو ماله مالوش حس يا أم حبصيص .
أم حبيليص \\ والله مادري يا أوخيتي بس خليني أتنشده ,.
بندر .. بندر ..وصمخ
بندر \\ هااااه يا عجوز النار وش تبين تراك طلعتيني من مود حلو لشكلك العفن ..
أم حبيليص \\ وش فيك اليوم ما أنت في الموجه وسرحان وضايع تفكيرك ..
بندر \\ آآآآه يا أم حبيليص قلبي قلبي يمه وش بيه قلبي . آآه يويويويوييووووه
أم ميرفت \\ جرى أيه يا دلعدي هو انته حتقلب فيها عراقي .. قول إيه مالك .
بندر \\ وأنت وش دخلك خليك في فصفصك لأجيب لك قرد يلعب في هالبسطه ألحين
يالله أنقلعي ,,.
أم خزنه \\ ورع تأدب .
بندر \\ طيب طيب فكينا منك .
....
وشفت تاجر أغنام غير معروف في السوق وناديته ..
بندر \\ عندي لك 100 رأس للبيع تشتري ؟
تاجر الأغنام \\ تكفى ليمني عليهم والله لي فترة أبي أشتري بس الكل رافض يبيعني علشان أنا غريب .
ويقولون الأقرب أبدى ..
بندر \\ لا أنا متحضر عادي عادي عندي تعال في الليل وقت رجوع الغنم وأنا أعطيك الغنم .
تاجر الأغنام \\ تـم .
....
رجعت للبيت وصرفت جدي قلت له الددسن خرب وفيه البسطه حقت جدتي .
والشمطاء جبت لها شاهي وقلت يا جده أحلى شاهي لأحلى جده ..
الجده فطنه \\ وش الطاري يابندوور العفن .
بندر \\ أفا يا جده والله بس حسيت إني مقصرمعك وأنا تراني أحبك .
الجده فطنه \\ هات الشاهي جاء في وقته راسي مصدع من سالفة خراب الددسن .
بندر \\ فديت قلبك والله خذي .
وبعد ما أخذت الشاهي الي أنا حاط فيه منوم ( فيله ) طآحت ونامت .
شلتها على فراشها ورجعت لشبك الغنم وبعت للتاجر الغنم وحطيت الفلوس في صندوق الجده الشينه .
ورجع جدي ونام وفي الصباح .. كعادته يعد الغنم ولقاها ناقصه نقص هائل .
وقام يصايح وينادي .
جدي \\ حلااااااااالي .. يا حراااااميه ..
فطنه \\ وش فيك يالعود المخرف .
جدي \\ وين حلالي يا بنت الـحراميه .
فطنه \\ أي حلال .؟
جدي \\ تستغبين أنتي ووجهك .
فطنه \\ والله مادري وش تقول .
جدي \\ الغنم ناقصة 100 راس وين رآآآآآآحت .؟
فطنه \\ مادري ...
جدي \\ بندر وين بندر بندآآآآآآآآآآآر.
بندر \\ هلا هلا جدي وش فيك معصب يا قلبي .
جدي \\ لا تستخف دمك يا الخبل وين الـ 100 رأس ,
بندر \\ أسأل جدتي .
فطنه \\ ايش ايش
جدي \\ بندر تكلم ليه أسأل جدتك .
بندر \\ أخاف ما تصدقني لأنها حبيبة القلب وناسي حفيدك ..
جدي \\ بندر تكلم لا أحووسك ألحين ,,.
بندر \\ طيب طيب لا يطق لك عرق .. جدتي باعتهم أمس لبياع غريب رفضوا الناس يبيعون له
وهي باعت له علشان ما تقدر تلاقي حلالك . وما دري وين ودت فلوسها .
وهددتني لو تكلمت بتطردني من البيت لأنك بتطيعها ولا تقدر ترد كلامها ..
فطنه \\ حسبي الله عليك يالكذاب .
بندر \\ جدي أنا في وجهك منها إذا بتطردني وإنك تسمع كلامها أطردني بس لا تكرهني .
(( جدي مسك شعرها وضرب ضرب وهو يصايح وين الفلوس حقت حلالي .. وهي تصايح ما أدري
حتى فتشني ... ))
ورآح يفتش الغرفه وفتش صندوقها ولقى الفلوس ... وطردها وطلقها ..
( أنا هنا تحسرت وتندمت بس قلت هذا جزاء من يقف في طريق سعادتي أنا وجدي )
ولقيت جدي بعد ما طردها زعلان وحزين ..
بندر \\ جدي خلاص لا تزعل نفسك .. بأخطب لك أم ميرفت ..
جدي \\ تصدق يا بندر .
بندر \\ مادري على حسب سالفتك .
جدي \\ أنا مابي أحد دآخل البيت اليوم روح جيب لي الحبل خلني أعلقك في الشجره .
بندر \\ لا لا يا جدي ..
وهو يمسكني من شعري ويسحبني للشجره ويعلقني من رجولي إلين الصباح ..
وعاد وأنا في التعليقه ما تعبت أوأشتكيت لأني كنت وقت التعليقة فكري وقلبي مع عمشا ..
وأتمنى الصباح يطلع علشان أروح أبحث عنها في المراعي وأسولف معها .
....
....
....
....
إلى اللقاء في الحلقة القادمة .
