(يازايرً قلبي)
يازايرً قلبي هلابك وسهلين
القلب دارك والمعاليق بيديك
افرش لك الخافق ورود ورياحين
ومن الهوى لا هب بالعوج اذريك
والخفقه احبسها على شان تغفين
اخشى عليك النبض صوته يصحيك
احط من خوفي على الصدر كفين
واضمك بصدري وبالهمس اناجيك
ومرات اشيلك من خفوقي الى العين
منزلك الآخر يابعد روح مغليك
والشعر اقوله في دلالك دواوين
وانتي تنقي مايناسبك ويرضيك
لو للشعر مرسى ومكان وعناوين
انا اشهد انه ياغلاتي بشواطيك
لله خلق لك ياحياتي مكانيين
قلبً يماري بك وعينً تراعيك
لي كل يومن مع جنابك سلامين
في الصبح انا اصبح وباليل امسيك
يازايرً قلبي وياساكن العين
تو ماتبارك منزلك وسط غاليك
وليد السلطان
