عرض للطباعة
المحبة ارض
المحبة أرض والفرقا أراضي
والزمن كله ترى لاغبت ماضي
والله إني ما أشوف إلا عيونك
إن رحلت اليوم أو طوّل مراضي
قالوا العـذّال والعـذّال مرضى
وش بلا حالك من الاشواق قاضي
قلت يهجرني حبيبي لين يرضى
علّموا الظالم ترى المظلوم راضي
جرّحوني في هواك وقلت أبشكي
ماهو من جرحي ولكن لـ إعتراضي
وش علي لو قطّعوا لاجلك عروقي
من رضى بالحب .. يرضيه التغاضي
الشاعر الأمير / بدر بن عبد المحسن
الوعد باكر ..
و لو تأخرتي ... لا يجي باكر
ما أبي باكر بدونك
احبسي الفجر فـ عيونك
و إن أشغل طيفي ظنونك
واعديني بعد باكر ...
أنا ظلي تحت شمسك
و لو تغــيـــبي ما هو ظلي ..
و انتي اسمك في حياتي
يهمسه بعضي لكلي ..
آه يا ضعفي و غروري
اعدلي فيني و جوري
و اصدقي .. راعي شعوري
و واعديني بعد باكر ..
هذا وجهك في عيوني
ما رسمته لا وربي ..
و اللي يصرخ في ضلوعي
هذا صوتك ماهو قلبي ..
آه يا شمعة وجودي ..
اشعلي نارك في عودي..
اهجري قلبي و عودي
و واعديني بعد باكر ..
ظماي انت
ظماي انت .. ومن يعشق ضماه غيري
جروحي انت .. ومن يكره دواه
اسقني لو ما ارتويت .. داوني لو ما شكيت
ماهقيت اني اعطش .. في حياتي لغيرك انت
مادريت ان مابه أغلى منك ..الا انت
ما تصور ان عيني مره تغفى وما اشوفك
ما تصور لو يطول الصمت ما اسمع حروفك
تدري احساسي بخوفي هو أماني
لما تسأل عني ليله عن مكاني
ما تصور كيف تحرقني الثواني
شمعه في ليل انتظارك..!
ياللي يسبقني زماني .. من عطش .. ليلي ونهاري
عطني موعد .. وانسى موعد
بس لا... تهجر وتبعد
يا ظما قلبي لقلبي .. وغربة اعيوني عن عيوني
وينك انت
ياترى الليله في صدري
لا ..
في جفني
لا ..
في الشعور اللي خطفني
اه ... لو تدري بشوقي
آه ... .يا ظما الدنيا بعروقي
سيف الغضب
أفداك أنا كلي ..
عودي غصن يابس ..
لا تحرقيني اليوم ..
حر .. وسموم .. وصيف ..
إنتي إجلسي فــ ظلي .. ولا جا الشتاء يمدي
لا تجرديني اليوم .. خليني في غمدي ..
سيف الغضب ماضي خلي الكلام يموت ..
ووقت الغضب ماضي .. لا ترجعيه .. بصوت ..
وش كثر أنا راضي حبيبتي عندي ..
قولي لي يا بعدي .. يومين ماشفتك ..
يومين مالي عيون ..
محروقه أجفاني بشموع إحساسي
كانت دموعي فوق وجهي وانفاسي ..
وظلي على كتفك .. وراسي على زندي ..
أفداك أنا والله لاتسمعي رعدي
ولا يزعجك برقي ..
انا لو شكيت أحلم ..
ما به زمن نندم .. ومابه عمر للخوف ..
إنتي احفظيني فم .. ولا تحفظيني حروف ..
ولو غرقت فــ يم ..
لا تعشقي بعدي ..
رائعة يا النوري
اختيار قمة لشاعر قمة
انا من محبي كلماته ومتابعيها
اسمحي لي باضافة ما احب من كلماته
اوراق الزمن
ادفن يدي .. تحت الثرى ..
واسقيها من جفني ارق ..
يذبل مابين اصابعي ..
عشب و ورق ..
ادفن يدي .. فوق الثرى ..
يلفها برد وسموم ..
واحس بعروقي يبست ..
ما توصل عروقي الثرى ..
ولا تشرب عروقي النجوم
وينبت على جفني سهاد ..
يذبل ورا صدري الشجن ..
اشقق اوراق الزمن ..
وانام ..
في حلقي الليله جفاف ..
شربت أيامي .. ومضت ..
واللي بقى جرحي الوفي ..
في خاطري باب يرد ..
وسراج دوبه ينطفي ..
اغطي الظلمه بظلام ..
كل ما اشد اصابعي ..
على العيون المتعبه ..
جرحٍ ينام .. وجرحٍ شعر بي وانتبه ..
قام وتبعني لشرفة ظلمه بعيد ..
جاني يقاسمني السهاد .. جاني قصيد ..
ادفن يدي تحت الثرى .. فوق الثرى ..
واعيش انا بباقي يدي ..
نصفٍ يموت .. ونصفٍ درى انه يموت ..
يا سيدي .. ربي انا نقطه فـ بحر ..
علمني كيف اهوى الحياه ..
علمني كيف اهوى القدر ..
علمني بإماني اكون ..
يارب .. اكثر من بشر
الله يعطيك العافية
تناظرين بعيد
تعبت اناظر فوق ..
واتعلق بشوفي ..
تحتي الثرى مشقوق ..
وهمك على كتوفي ..
ولاتناظرين بعيد ..
وبلادي في عيونك
توي قطعت البيد ..
لرضاك .. وبدونك ..
ماعاد فيني اعروق ..
ودمي على سيوفي ..
لاتمطريني ورد ..
مشقوقه كفوفي ..
مثل الثرى .. والقلب ..
قمح ونخل محروق ..
وجدراني حروفي ..
تعبت اناظر فوق ..
تحتي الثرى مشقوق ..
قمح ونخل محروق ..
ماعاد فيني عروق ..
ماتنزلي لخوفي ..؟
هلا بك غربة الروح
سعدت باختيارك هذا و أرجو أن لايكون الوحيد
لك ِ ولكل من مر هنا .
ههههههههههه
ما طلبتي شي
عاد كلماته تجي عالجرح
وهذي مما احب
هيهات
لادمعة في العين تكفي ولا آه
لا من نوى لك صاحبك بالقطيعه
الله على بعض المحبـين ما اشقاه
يرجي زهــر روضٍ تولى ربيعه
ولا مـن خذا له ساعة قال ابنساه
بانسى هوى اللي بـاعني قبل ابيعه
وده يعسر القلب عن غير مشهاه
هيهات ياقلب الخطا لو تطـيعه
الله يجازي الحب مااكبر خـطاياه
شره على اصحاب النفوس الرفيعه
اهـل الوفا واهل الشيم من سواياه
ضاقت بهم دنيا فججها وسيعه
والا الخبيث بمنسم الرجل ناطاه
يوم الغـدر والخبث عنده طبيعه
يالله عسى لي خيرة عقب فرقاه
لوكان فرقا الخل مثل الفجـيعه
الله يا النوري
قلبتي مواجعي بما ساطرحه للبدر
مرت علي ايام وليالي وانا اعزي نفسي بكلماته من جور الظلم
النسيان
تذكر النسيان ... لاعاد تنساه
ياقلب ... وانسي القلب لعل يشفا
يدرى الحبيب ... انه حبيبٍ وابجفاه
ماهو خراب الكون ... لاقفيت واقفا
كان الخطا منى ... فقلبي خطاياه
هو علمه ... وشلون ... يهجر ويجفا
تعب المسافر ... وابعد الموج مرساه
صار المدى له يم ... والشمس مرفا
ومل الهوى نوحه ... وبوحه ... ونجواه
ماعاد لى صبر على الجراح ... تكفا
الى متى ...صدري بيحترق حناياه
كنك على صالي ...عظامي بتدفا
والى متى ... جفنى بيسقيك من ماه
كن الليالي لاصفا الدمع تصفا
تذكر النسيان .... ياقلب وانساه
وانسي ... الجروح اللي مع الوقت تشفا
مرتني الدنيا
مرتني الدنيا .. بتسأل عن خبر ..
مابه جديد ..
عشاق ليلة تفارقوا ..
وصاروا بعيد ..
لا طاحت نجوم السما .. ولا تاه في الظلما قمر ..
لا تاقف الدنيا .. وتسأل عن خبر ..
مابه جديد ..
اسهل من الكذبة .. على شف الطفل ..
فرقى الأحبه يا هوى ..
أحلى من الحلم اللي ودي لو كمل ..
كانت ليالينا سوى ..
لا طاحت نجوم السما .. ولا تاه في الظلما قمر ..
لا تاقف الدنيا وتسأل عن خبر ..
مابه جديد ..
لا تاقف الدنيا .. على أول طريق ..
فرقى الأحبه يا هوى ..
لا تسأل جروحي متى خان الرفيق ..
عهد المحبه والهوى
لا طاحت نجوم السما .. ولا تاه في الظلما قمر ..
لا تاقف الدنيا وتسأل عن خبر ..
مابه جديد ..
مداوي الجرح بجراح
يا اللي جبين الصبح من مفرقك لاح
ليتك تركت الليل يملأ سمايه
كان الهنا ما جا حياتي .. ولا راح
ولا فقدت اليوم نورك هنايه
جرحتني يامداوي الجرح بجراح
وأنا أحسب إنك صادقٍ في دوايه
وكانك على جرح المحبين ترتاح
إرتح .. قطعت اليوم تالي رجايه
وابشر ترى روحي نست كل الأفراح
وتهدّمت تبكي عذابي معايه
جرحتني يا مالك الروح برماح
صدك .. عسى يرضيك مني شقايه
الموعد الثاني
خذاك .. الموعد الثاني ..
نويت ... تغيب .. وتنساني ..
مشت بك .. خطوتك لبعاد ..
وتركت .. لدمعتي ميعاد ..
مثل ذا الوقت تلقاني ..
وخذاك ..الموعد الثاني ..
أحبك .. كلها كلمه ..
ونظرة شوق خداعة ..
عطتني ..بالأمل دنيا ..
غريبه .. يومها بساعه ..
خذتني .. غصب عني لك ..
حسبت إني قمر ليلك ..
واثر شوفك تعداني ..
وخذاك ..الموعد الثاني ..
صديق الليل ..
لو تندم .. على جرح تركته لي ..
لا انسي قلبك المسكين ..
حبيب جرحك قبلي ..
ولكن سكتك تحتار ..
ابد .. بين الندى والنار..
والى منه قضى المشوار..
بدا مشوارك الثاني ..
حياك غربة الروح ..
أعجبتك الاختيارات واسمي ماعجبك :redface:
ومصرة ( اني النوري )
ولا يهمك كلنا نون نسوه ..
إليك ..
صعب السؤال
صعب السؤال .. ليه نفترق !!
صعب السؤال .. وين نلتقي
إنتي الجنوب .. وأنا الشمال ..
وما بيننا .. بحر .. ورمال
لكن نحب .. والله نحب .. وفوق الخيال
.. صعب السؤال
يا اللي اجمل من كلامي عنك وأقرب من سكوتي
آه يا طول المسافة بين احساسي وصوتي
ما هو غريب .. إني أسألك
و إنتي أنا .. كيف أوصلك !!
لا مستحيل .. هذا الرحيل
من يقطع الصمت الطويل
ويــدلنـــي ..
قصيدتي .. وين الحروف .. جف القلم
يا ضايعه .. ببرد الكفوف .. رعشة ألم
قصيدتي .. إلا الندم .. إلا الندم
بتسافرين .. وانتي معي
وبترجعين .. وانتي معي
قصيدتي .. لا تسمعي .. غيري قصيد
يا ساكنة افـ ورق الحشا .. وحبر الوريد
فاتر اللحظ
فاتر اللحظ .. ياعذب اللمى ..
يا قريب الدار.. يا بعد السما ..
لوجرحت الروح .. لودمعي همى
يا ظما المجروح .. ما بعدك ظما
في هجير الشوق .. ظللني بهدب
من عذاب الجرح .. داويني بعتب
اسقيني منك .. رضى والا غضب ..
لوجرحت الروح .. لودمعي همى
يا ضما المجروح .. ما بعدك ظما
يا غريب الدرب .. واشواقك سفر
العنا في القلب .. والشكوى نظر
يا قمر بانشدك .. عن نور القمر
لوجرحت الروح .. لودمعي همى
يا ظما المجروح .. ما بعدك ظما
يا سواد العين .. والدمعه شجن
لا يصير العمر .. للفرقى ثمن
الدقايق .. شمع .. ذوبها الزمن
لوجرحت الروح .. لودمعي همى
يا ظما المجروح .. ما بعدك ظما
سواد العين
ياسواد العين .. فـ عيوني سواد
النظر دخان .. وأنفاسي لهب
من نثر في مطلع الشمس الرماد
ومن جمع في موقد اللوعه حطب
كانها الفرقا .. فهي همٍ وكاد
مير اظن الياس ياخل السبب
ياالبعاد اللي ورى طولك بعاد
ماورى الدرب العسير الا الصعب
وش بقي لي من الرجا كود العناد
وش جنيت من الهوى غير التعب
لو يرد العشب لومي للجراد
كان لمت السحب في جرد الحدب
وهل يخفى القمر
اعذريني والله اني اليوم معمية
وكأني قريته النوري
انت الربيع
وانت الفصول
وانت الحنان لو ما تعود
اعذريني حبيبتي الله يثبتنا لكن غفلت على الاسم مع الذكريات المؤلمة للقصائد
[align=right]
يقول البدر :
ليت الشوارع تجمع اثنين صدفه . . .
لاصار شباك المواعيد مجفي . .
وليت الروابي تشرب دموع وطفه . . .
ويصب لمع بروقها وسط طرفي
هذا وتو الليل ماراح نصفه . .
ياليل بعض الي مضى منك يكفي
http://www.up.7ail.net/files/24778.jpg
[/align]
صوتك يناديني
تذكٌر .. صوتك يناديني ...
تذكر ... تذكر ...
تذكر الحلم الصَغير ...
وجدار من طين وحصير ...
وقمَرا ورا الليل الضرير ...
على الغَدير ...
لاهَبٌت النسمَة تكسر ...
جيتي من النسيان ...
ومن كل الزمان ...
اللي مَضَى ... واللي تغٌير ...
صوتك يناديني تذكٌر ...
ناديتي ... خانتني السنين ... اللي مَضت راحت
ناديت ... ماكن السنين ... اللي مضت راحت
كنا افترقنا البارحة ...
البارحة .... صارت عمر ...
ليله ... أَبَدْ عيٌت تمرٌ ...
ياجمرة الشوق الخَفي ...
نسيت أنا وجرحك وفي ...
يتذَكر الحلم الصغير ...
ريانَة العُود ... نادي ...
نادي الليَالي تعُود ..
بشوق الهَوى ... بوعُود ...
بوجهي اللي ضيعته زَمَان ...
في عُيُونك السٌود ...
ياالضحكة العَذبة ...
عَنك الصٌبر ... كِذبه ...
وفيك العُمر موعود ...
اشتقت للحلم الصغير ...
واشتقت لجدار وحصير ...
وقمَرا ورا الليل الضرير ...
على الغدير ...
ان هبت النسمَة تكسر ...
جمرة غضى
جمرة غضى .. أضمها بكفي
أضمها حيل . .
أبي الدفا .. لو تحترق كفي
وأبي سفر لليل
بردان أنا تكفى .. أبي احترق بدفا
لعيونك التحنان .. فعيونك المنفى
جيتك من الإعصار .. جفني المطر .. والنار
جمرة غضى
والله الجفا برد .. وقل الوفا برد
والموعد المهجور ما ينبت الورد
ياحبي المغرور .. ياللي دفاك اشعور
رد القمر للنور .. واحلى العمر .. في وعد
بردان .. بردان أنا تكفى.. أبي احترق بدفا
يا أول الحب .. شفتك أنا مره
واهديت لك قلب
ورديت لي جمرة
ومن يومها كان الرحيل
وليل الشتا .. القاسي الطويل
وآه يا الحنين
لليل باب له حارسين
برد وسحاب
اختيارت رائع
بنت الربع
غربة الروح
بارك الله فيكن
لكن مني أجمل تحية
تقبلن مرورى
كاسب العز
على العين والراس ياغربة
والاعتذار قبلناه وحضورك أحلى مافي الموضوع
وربي يبعد عنك كل ألم .
نواف الغلا
تشريف واختيار دليل الذوق
أشكرك
كاسب العز
تحية وتقدير لحضورك الجميل
أشكرك
ورائعة جديدة للبدر ..( البتول )
كل أرضٍ تشيلك ياثقيل الحمول
وكـل وقـتٍ كـريـمٍ بالـرضـا والـزعـل
وين مارحت تلقى لـك حبيـب وعـذول
ويـن مـا كنـت تلقـى مثـل ياسـك..أمـل
ياطـريـق التـرجـي والـولـه والنـحـول
والله إنـي مشيتـك... لـيـن حــد الثـمـل
مالقيت فوصولي لغيـر قبـري وصـول
ولا عرفت فحياتي مثل عرفـي الجهـل
لا تظـن المسافـر مـن يسـوق الرحـول
من وقف دون حلمـه عاجـزٍ مـا رحـل
وما لمخلوق منجا في الحذر والجفـول
مـا تصيـب السهـام ولا يطيـش الاجـل
الليالـي خـوات.. مـيـر منـهـي البـتـول
والحـوادث عشايـر ميـر ويــن الفـحـل
ليلـةٍ لـك .. وليلـه بالفـرح مــا تـطـول
وليـلـةٍ مــن شهـدهـا ذب راس الجـبـل
أتذكّر فـي عيـن الشمـس طفـلٍ خجـول
شالتـه فـي هدبهـا وقــت لـيـن إشتـعـل
أعجب الناس وهجه بالجدل والفضـول
ما دروا عن (جمال الجرح) لين إندمل
والله انـي كتبتـه فـي العطـش والذبـول
ليـن غصنـه تـعـدل بـالـورق وإعـتـدل
والله إنــي كتبـتـه لـيـن قــال الجـهـول
والله إنــي كتـبـتـه وانـتـشـى واحـتـفـل
ما أتفه الشعر كانه هالحكي اللي نقـول
لا تـعـدى المـديـح ولا تـعـدى الـغــزل
إن لثمت الزهـور وصاحبتنـي الحقـول
ماهقيت ان صافي الشهـد عيـب النحـل
مابقى في ضلوعي كـود ريـح معمـول
وثـوب شـاشٍ عليـه مـن الندامـه وحـل
ألتفـت للطريـق ومـا عـبـر مـنـه زول
فـي جفونـي تزاحـم عبـرتـي والـوجـل
طـلـت يالعـمـر والا قلعـتـك لا تـطـول
طاولـتـنـا اللـيـالـي بالـسـهـر والـمـلــل
إن تعـبـنـا نــحــب ولا لـقـيـنـا قــبــول
مـا تسـر الامـانـي .. ولا يفـيـد الـعـذل
لـكـن .. الله كـريـم وكــل هــمٍ يـــزول
ما علـى الله بعيـد .. ولا جفـاك المحـل
كـل أرضٍ تشيلـك .. يـا ثقيـل الحمـول
وكـل وقـتٍ كـريـمٍ بالـرضـا والـزعـل
مميز يعطيك العافيه