مسكين يا اللي جيتني بالنصيحة
قصيدة لها مناسبة ..
احببت نشرها للتوثيق فقط ..
[poem=font="Simplified Arabic,4,crimson,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
مسكين يا اللي جيتني بالنصيحة =وانته على ما قيل راعي نصايح
تحرمني من فعلٍ أشوفك تبيحه =مهوب أنا اللي كل علمي فضايح
ناسٍ بقضب لسانها مستريحه =ويا كثر من هرجه على الكذب طايح
إذا حكى يفضح وصمته فضيحه =ما كنّه إلا فالتفاهــــات سايح
وإلا يمينه في كرمها شحيحه =وإذا عطى قصده يحوز المدايح
من أرض ( صنعاء ) لين توصل ( أريحه ) =حط اللوايح بس يا هي لوايح
الزيف ,, والخذلان ,, ونفسٍ قبيحه =معها نفاقٍ ,, وأكثر الوقت نايح
عن ( سكة العقّال ) عقله يزيحه = ومع سر غيره ,, لا خذا شوي بايح !!
هذي علومه لو بغاها مليحه =تقول ما عندي سوى غدر فايح
ما ينفع ( الجوال ) دون الشريحه =ويا كثر من يمشي بليّا شرايح
الأولة قلنا : ( يبيها صريحه ) = والثانية قلنا : ( لعله يصايح )
والثالثة : ( كنّ الميانه طريحه ) = والرابعة قلنا : ( ترى العمر رايح )
وشلون ( سبّه ) دام هذا ( مديحه ) = يا كيف ( يزعل ) دام هذي ( مزايح ) ؟!!
كتبت لي شعرٍ على قاف ( ايحه )=قصدي نصيحه ,, وآخر القاف ( ايح )
أبيه يفهم لا تجود القريحه = حرام إن ينسى جميع النصايح !!![/poem]
