قدر الله علي ورحت لسوق اليوم (وش صار 00تعالوا شوفوا)
يالله أنك تحييهم
ياهلا والله ومسهلا
تو ماسفرت وانورت واستهلت وامطرت
تخبرون هالأيام ماقبل العيد والذبح والذبيح والصلخ وتقطيع التسبده <<آآه ياتسبديه
هذا غير حسحسة الروس المبتوره
وكعادتنا الميمونه في كل سنه إنا ياهالحريم ولايهونون الرجال<<خاصتن اللي قاموا ينافسونا على الموضات وعيالها
نطير قبل العيد لسوق نشتري من هاللي يسدحونه الباعه ويهكون علينا أنه أخر حبه وتلقونه بالمخزن حقهم مجدوعن بكل صوح وحنا ياغافلين لكم الله نصدقهم ومغير نقش
عاد هاللحين خبركم داخلين على موسم الشتاء وتقول الناس أعوذ بالله بيهاجرون لديرتن مابها سوق مغير يقشون كل مابطريقم
المهم قدر الله علي ورحت لمركز (يطلق عليه الهرم)<<تراه والله وش أزينه ملابسه حقات البيت والملابس الداخليه للأطفال بس مدري من اللي لاعبن عليهم ومخليهم يغلون أسعارهم
رحت وحست مع هاللي يحوسون وأخذت اللي أبي ومسكت سرى
قسمن بالله تقل يوزعون مجانا
شي الله لايوريكم
ايه وأجي أنا <<بقايااا المسالمه اللطيفه الوديعه اللي ماتحرك ساكن (وه بس ياحبيلي وبرائتي)
واصف مع خلق الله معي بنوتتي بعربيتها وأغراضي ماسكتها بيدي(بتعلمكم أن أغراضها شويه)
وتجي وحدتن داعستن الطبلون (من أحدى الدول الشقيقه) وتدخل قدام 00بيني وبينها وحده00وتقوله الحرمه لو سمحتي أنا قبلتس<<ياحبيل السعوديه طالعتن علي مؤدبه
ومير تعصب قالت أن شاء الله تبيني أمسك سرى عشان جزمه(وأنتم كرامه)<<هذه إضافه من عندي وإلا هي والله ماقلت شي وجها مغسولن بتايدن الأصلي
عاد ومير أقز اللي وراها وأثاريها ماسكتن كيستن كبر جدي وأنا أنغزاللي قدامي<<بمعنى لاتخلينها تدخل
بس ماش الله يهديها مدري هي مافهمت مدري قلبها طيب مدري هي خافت من هالعربجيه تقوم وتتوطاها خلتها تدخل
وأنا أناظرها وأتأمل بها إلا وتجي وحدتن محترق طبلونها وتدخل قبلي<< عاد أنا هنا:مزون:
والله فرحت قلت خلني أحط حرتي بها:swords:
ياحياتس الله لقد أنكي جيتي وولدك الى حتفك<<طبعن بقلبي ورد هذا النص
طبعا مازال السكون مخيم علي ومخليتها معترضه نص الطريق
ومير تتكلم اللي وراي يقالك تبي تفزع لي قالت لو سمحتي الدور على هذي ثمن أنا ثمن أنتي تعالي ورى
قالت لا والله أنا معي بزر وماراح أنتظر الدور بدخل قبلكم <<وراتس معتس مرسوم ملكي وإلا مطبوعن على جبهتس حالتن خاصه
ايه سكت
وسكت
وسكت
<<اللي يشوفني يقول مسكينه ماعندها من الشر طاري
يوم مشى السرى شوي ومير تدخل ولدها
ومير أتكلم<<نطقت حظرت جنابها قلت لو سمحتي دوري
وقسمن بالله تناظرني تقل تناظر جدار وتدخل
ايه هين وأنا بقايوه والله ماتمشين ولا على جثتي
وألف بعربيت أبنيتي(السلاح الفتاك في مثل هذه الأزمات) وأصقع ولدها بالعامود :icon_evil
وطلع لسانها وتهاوش وماتشوفين وبزران ومن هالهذر 000000
سااااااااااااكته مغير أصقع بالعربيه
وخرت ولدها بتدخل (طالت وتشمخت) وأغرس يدي بكتفها وأسحبها هناااااااااك وأدخل واخليها
وأخيرا أقتنعت بعد هالسحبه المعتبره وترجع ورى
مايستفاد
لا تتنازل عن حقك ماهما تكن الأسباب
ترى بعض الحريم ماهنا غير لسان تلالي به وإلا إذا جيت للجد والله ماعندها ماعند البزر (خوذي حقك بهدؤ)
إذا شفتي ناس يعاكسون عطي الولد نظره خلي ماعاد يعرف راسه من كرياسه ويدور الأمن من أي جهه بيجونه و دخلي خشتس بإذن البنت وعطيها كلمه تهز بدنها<<للأسف لم يرد هذا الموقف في هذه القصه لطول القصه وخوفاً من الملل على قلوب زوارنا الكرام
وهذا والله أعلم وصلى الله وسلم على نبينا محمد
تم تحرير هذا الموقف الساعه الثالثه إلا ربع صباح الأحد الموافق التاسع من شهر ذي الحجه
الروحه تراها صايرتن السبت اللي هو اليوم بعرف الناس البسيطين أمثالي اللي يسهرون ومايعترفون أن اليوم خلص إلا إذا ناموا وقاموا
أما الدقيقين بالوقت فهو مساء البارحه
تمت
بقايا
